Mateus 4

Jesus vom Soton vesocht

1 Dan wort Jesus vom Jeist en de Wiltnis nenjebrocht, om doa vom Diewel vesocht to woaren. 2 Un aus Hee vieetich Doag un vieetich Nachten jefaust haud, hungad Am nohäa. 3 Un de Vesieekja kjeem no Am un säd: Wan Du Gott sien Sän best, dan saj, daut dise Steena Brood woaren. 4 Hee oba auntwuad un säd: Daut steit jeschräwen: "De Mensch läft nich auleen von Broot, oba von jieda Wuat, daut von ut Gott sien Mul jeit." 5 Dan neem de Diewel Am en de heilje Staut un stald Am opp de Tempel-Spetz 6 un säd to Am: Wan Du Gott sien Sän best, dan schmiet Die rauf, wiels daut steit jeschräwen: "Hee woat siene Enjel äwa Die befälen, un see woaren Die opp de Henj droagen, daut Du dienen Foot nich aun eenen Steen steeten woascht." 7 Jesus säd to am: Wada steit doa jeschräwen: "Du saust Gott, dienen Harn, nich vesieekjen." 8 Dan neem de Diewel Am wada met sikj opp eenen sea huagen Boajch nopp un wees Am aul de Kjennichrikjs von de Welt un äare Harlichkjeit 9 un säd to Am: Dit aula woa ekj Die jäwen, wan Du ver mie dolfaulen un mie aunbäden woascht. 10 Dan säd Jesus to am: Wajch met die, Soton! Wiels daut steit jeschräwen: "Du saust dän Harn, dienen Gott, aunbäden un Am auleen deenen." 11 Dan veleet de Diewel Am; un kjikj, Enjel kjeemen un deenden Am.