Evangelium Matäus 4

Jesus roopt vea Fescha

18 Aus Jesus aum Galiläische Mäa jinkj, sach Hee twee Breeda, Simon, dee Petrus jenant wort, un sien Brooda Andreas, dee daut Nat en daut Mäa schmeeten, wiels see wieren Fescha. 19 Un Hee säd to äant: Folcht Mie no, un Ekj woa junt to Menschenfescha moaken! 20 Un soofuaz veleeten see äare Nats un foljden Am. 21 Un aus Hee von doa wieda-jinkj, sach Hee twee aundre Breeda, Jakobus, dän Sän von Zebedäus, un Johanes, sienen Brooda, em Schepp met äarem Voda Zebedäus, äare Nats flekjen, un Hee roopt äant. 22 See veleeten soofuaz daut Boot un äaren Voda un foljden Am.