Mateus 6

25 Doawäajen saj Ekj junt: Sorcht nich om jun Läwen, waut jie äten un waut jie drinkjen sellen; uk nich om junen Kjarpa, waut jie auntrakjen sellen. Es daut Läwen nich mea aus daut Äten? un de Kjarpa mea aus de Kjleedunk? 26 Kjikjt no de Väajel vom Himmel; dee seien nich un arnten nich un saumlen nuscht en de Spikjasch, un jun Voda em Himmel foodat dee doch. Sent jie nich väl bäta aus dee? 27 Oba wäa von junt kaun siene Hecht derch Sorjen eene Ell*6:27 Eene Ell es soo bie 18 Zoll ooda 45 Zentimeeta. biesaten?

28 Un wuarom moak jie junt Sorjen äwa de Kjleedunk? Kjikjt no de Lelje opp de Stap, woo dee waussen. Dee oabeiden nich uk spennen dee nich, 29 un doch saj Ekj junt, selfst Salomo wia en aul siene Harlichkjeit nich soo aunjetrocken aus eene von dise. 30 Wan oba Gott daut Graus von de Stap, daut vondoag doa steit un morjen en dän Owen jeschmäten woat, soo kjleet: wudd Hee junt daut nich väl mea doonen, Oo jie Kjliengloowsche? 31 Doawäajen sell jie nich sorjen un sajen: Waut sell wie äten? ooda waut sell wie drinkjen? ooda wuamet sell wie ons kjleeden? 32 Wiels no daut aules sieekjen de Heiden; oba jun himlischa Voda weet, daut jie daut aula brucken. 33 Oba sieekjt daut ieeschte no Gott sien Rikj un no siene Jerajchtichkjeit, un aul dise Dinja woat junt biejelajcht woaren. 34 Doawäajen sell jie nich fa dän Morjen sorjen, wiels dee Morjen woat fa sikj selfst sorjen. Jieda Dach haft jenuach met siene ieejne Ploag.