1 ጬጪሼ ዲዛይታስ ሃይሳፌ ጉዬን ሂዶታይ ዬና፤ ቤኒ ዎዴ ዛቢሎኔ ቢታኔ ኒፍታሌሜ ቢታ ካዉሺዴስ፤ ሲንፌ ያና ዎዴን ጊዲኮ ሜዲቴራኔ ኣባ ኦጌን ዴኢዛ ቢታኔ ዮርዳኖሴ ሻፋፔ ሄ ፒንን ዴኢዛ፥ «ኣይዛቤቲ ዴኢዛ ጋሊላ ቢታ» ኢዚ ቦንቻና።✝9፡1 ማቶ 4፡15

2 ማን ዴኢዛ ዴሬይ

ዎልቃማ ፖኦ ቤኢዴስ፤

ሃይቆ ኩዋ ጋርሳን ዲዛ ዴሬታስ

ፖኦይ ፖኢዴስ።✝9፡2 ማቶ 4፡16፤ ሉቃ 1፡79

3 ኔኒ ካዎቴ ዳርሳዳሳ፤

ኢስታስ ኡፋይሳ ቦላ

ኡፋይስ ጉጃዳሳ፤

ኣሳይ ካ ሺሺሼኔ

ዲኢ ኤኪዳ ሚሽ ጊሼቲሼ

ኡፋዬቲዛ ማላ

ኢስቲካ ኔ ሲንን ኡፋዬታና።

4 ካሴ ኔኒ ሚዲያሜ ቢታ

ጾኒዳ ማላ

ኢስታ ዴጺዛ ቃምባራ፥

ኢስታ ሃሼ ቦላ

ዎዳ ዱርቃኔ

ኢስታ ዋዪሲ ሃሪዳ

ጉፌ ሜንዳሳ።

5 ኦላንቻታ ጫማይ ኡባይ፥

ሱን ሞሬቲዳ

ማይኦ ኡባይካ

ታማን ዱኔ ጊዲ ኤጻና።

6 ሄኮ ኑስ ናይ ዬሌቲዴስ!

ኣቱማ ናይካ ኑስ ኢሜቲዴስ!

ሃላቃቴ

ኢዛ ሃሼ ቦላ ጊዳና፤

ኢዛ ሱን፥

«ማላሊሲዛ ዞራንቻ፥

ዎልቃማ ጾሳ፥

ሜርና ኣዋ፥

ሳሮቴ ሃላቃ» ጌቴታና።

7 ኢዛ ካዎቴ ኣኮቴሲኔ

ኢዛ ሳሮቴስ ዛዋይ ዴና፤

ሃቺፌ ዶሚዲ

ሜርና ጋካናስ

ባ ካዎቴ፥

ሱሬ ፒርዳኒኔ

ጺሎቴን ኤሳና፤

ሎኤ ኦይኪዲ ሚንና፤

ዳዊቴ ካዎቴ ኣራታን

ኢዚ ኡታና፤

ዴራ ኡባ ሃራና፤

ኡባፌ ዎልቃማ

ጎዳ ቃናቴይ

ሄሳ ፖላና።✝9፡7 ሉቃ 1፡32-33

8 ጎዳይ ያቆቤ ዛሬታ ቦላ

ፒርዳ ቃላ ኪቲዴስ፤

ኢዚካ ኢስራኤሌ ቦላ ፖሌታና።

9 ኤፍሬሜኒኔ ሳማሪያን ዴኢዛ

ዴሬ ኡባይ

ሄሳ ጾሲ ኦዳይሳ ኤራና፤

ኦቶሮኒኔ

ሞቴን ዴንዲዲ፥

10 «ጹቤፔ ኦሴቲዳ

ጊምቤቲ ላሌቲዳ፤

ኑኒ ጊዲኮ

ማሴቲዳ ሹቻን

ዛሪ ጊምባና፤

ኤቲ ቃንጼቲዳ፤

ኑኒ ጊዲኮ ኢስታሶሆን

ዚጋ ላማና» ጊዳ።

11 ሄሳ ጊሻስ ጎዳይ

ኤራሶኔ ሞርኬታ ሚንና፤

ኢስታ ሞርኬታ ኢስታ ቦላ

ዴንዲ ኤሃና።

12 ኣርሼይ ሞኪዛ ባጋፌ

ኣራሜ ቢታ ኣሳቲኔ

ኣርሼይ ዉሊዛ ባጋፌ

ፊሊስጼሜ ቢታ ኣሳቲ

ባንታ ዶና ሃንጊዲ

ኢስራኤሌ ሚታና።

ሄሲ ኡባይ ሃኒንካ

ጎዳ ሃንቆይ ኢርጺቤና፤

ኢዛ ኩሼይካ

ዴንዲዳሶፔ ሲሚቤና።

13 ዴሬዚ ጊዲኮ ባና ሾጪዳ

ጎዳኮ ሲሚቤና፤

ኡባፌ ዎልቃማ

ጎዳካ ኮዪቤና።

14 ሄሳ ጊሻስ

ጎዳይ ሁኤኔ ጎይና፥

ዛምባ ሃጋኔ ማቃ

ኢስራኤሌፔ ኢሲ ጋላስ ቄጻና።

15 ጪማቲኔ ቦንቼቲዳይቲ ሁኤ፤

ዎርዶ ታማርሲዛ ናቤቲ ጎይና።

16 ሃይሳ ዴራ ካሌዛይቲ

ባሌቴስ፤

ካሊዛ ዴሬይካ ኦጌፔ

ካሬ ኬዚዲ ቶይላቴስ።

17 ሄሳ ጊሻስ ጎዳይ

ናቴ ናይታን ኡፋዬቴና፤

ዪኦታሲኔ

ኣምኤታስ ቃቴና፤

ኡባይካ ኢታ ኦዛይታኔ

ጾሳ ያሻቴ ባይንዳይታ፤

ኡባ ኣሳ ዶናፔ

ሃራሲዛ ቃላይ ኬዜስ፤

ሄሲ ኡባይ ሃኒንካ

ጎዳ ሃንቆይ ኢርጺቤና፤

ኢዛ ኩሼይካ

ዴንዲዳሶፔ ሲሚቤና።

18 ዴራ ኢታቴ ኪንዲቾኔ

ኣጉን ጹጊዛ ታማ ማላ፤

ፒ ጊዳ ዎራይ ጹጌቲሺን

ኬዚዛ ጩዋ ቱሳ ማላ

ሲቲ ጊዲ ፑዴ ኬዜስ።

19 ኡባፌ ዎልቃማ ጎዳ ሃንቆን

ቢታይ ጹጌታና፤

ዴሬይካ ታማን ጌሊዛ

ሚ ማላ ጊዳና፤

ኢሻይ ኢሻስ ቃቴና።

20 ኡሻቻ ባጋራ ቱጻና፤

ጊዶ ኣቲን ጋፋ ቴቄና።

ሃዲርሳ ባጋራ ማና፤

ጊዶ ኣቲን ካሌቴና።

ኢሶይ ኢሶይ ባ ዬሊዳ

ናይታ ማና።

21 ሚናሴይ ኤፍሬሜ ማና፤

ኤፍሬሜይካ ሚናሴ ማና፤

ኢስቲ ኢሲፌ ጊዲዲ

ዩሁዳ ቦላ ዴንዳና።

ሄሲ ኡባይ ሃኒንካ

ጎዳ ሃንቆይ ኢርጺቤና፤

ኢዛ ኩሼይካ ዴንዲዳሶፔ

ሲሚቤና።