1 ኑኒ ኦድዳባ ኦን አማንዴ?

ጎዳ ቀሰይ ኦደስ ቆንጭዴ?✝

2 እ እያ ስንን መላ ቢታን አጭዳ ዱሩማ መላ፤

ፃጶ የድዳ ዶላ መላ ድጭስ።

ኑኒ እያ ሎይ ፄሎና መላ

ማል ዎይኮ ቴም ባዋ።

ኑኒ እያኮ ሺቆና መላ

ጩቹ ማልኦ ግደና።

3 እ አሳን ካትስ፥ እፀትስ፤

እ መቶፐነ አዛኖፐ

ሻከት ኤሮና አስ ግድስ።

አስ እያ በአናፐ ግድ

ባ ሶምኡዋ ዎራ ዛርያ አሳዳ ካትስ፤

ኑኒ እያ ቦንችቦኮ።

4 እ ቱማ ኑ ዋይያ ባዉ ኤክስ፤

ቃስ ኑ ዳቡራ ቶክስ።✝

ሽን ኑኒ፥ እ ፆሳን ደሸትድ ኩንድዳዳነ

ማዱንፅዳዳ ቆፕዳ።

5 ሽን እ ኑ ናጋራ ግሾ፥

ጫደትድ ማዱንፅስ፤

ኑ ቆሁዋ ግሾ ሾጨትድ ሊቅስ።✝

እያ ሴራን ኑኒ ሳሮ ደምዳ፤

እያ ማዱንን ኑኒ ፓፅዳ።

6 ኑኒ ኡባይ ኦገ ባልዳ ዶርሳዳ ዎራ ብዳ፤✝

ኑ ኡባይ ኑ ኦግያ ኦግያ ብዳ።

ሽን ጎዳይ ኑ ኡባ ናቁዋ

እያ ቦላ ዎስ።

7 እ ኡንኤትስ፤ ቆሄትስ፤✝

ሽን ባ ዶና ዶይቤና።

ሹካናዉ ኤፍያ ኡርገ ዶርሳዳ ላገትስ፤

ባ እክስያ ሜድያ ኡራ ስንን

ስእ ግያ ዶርሳ መላ አይኮካ ፖግቤና።

8 ኤንቲ እያ ኡንኤንነ ጌላ ፕርዳን ኤፍዶሶና፤

እ ታ አሳ ናጋራ ግሾ ሾጨትድ፥

ደኦን ደኤይሳታ ቢታፈ ክችዳይሳ

እያ ኮቻፈ ኦን አኬክዴ?

9 እያ ዶናን ባል ባይና፥ እ፥ ኢታባ ኦና፥

ባ ሀይቁዋን ኢታ አሳታራ ታይበትስ፤

እያ ዱፎይ ዱረ አሳታራ ግድስ።✝

10 ሽን እያ ቆሄተይነ እያ ኡንኤተይ

ጎዳ ሸነ ግድስ።

እ ባና ናጋራ ያርሾ ኦያ ዎደ

ባ ኮቻ በአና።

እያ ላይይ አዱቃና፤

ጎዳ ሸነይ እያ ኩሸን ፖለታና።

11 ባ ሸምፑዋ ዋያፐ ጉየ፥

እ ደኦ ፖኦ በአና፤ ኡፋይታና።

ታ ፅሎ አይለይ ባ ኤራተን ዳሮታ ፅልሳና፤

ኤንታ ቆሁዋካ ቶካና።

12 ሄሳ ግሾ፥ ታኒ እያ ግሹዋ

ግታ አሳታ ግዶን እማና፤✝

ምኖታራ እ ድኡዋ ሻከታና።

እ ባ ሸምፑዋ ሀይቆስ አድ እምድ፥

ኢታታራ ፓይደትስ።

እ ዳሮ አሳ ናጋራ ቶክስ፤

ጌላታስ ጋናትስ።