1 ሄኮ፥ ጎዳ ኩሸይ

ህንተና አሻናዉ ቃምቤና፤

እያ ሀይይ ስአናዉ ቱልቤና።

2 ሽን ህንተ ናጋራይ ህንተፈነ

ህንተ ፆሳፈ ግዶን ሻሄተ መስ።

እ ስኦና መላ ህንተ ናጋራይ

እያ ሶምኡዋ ህንተፈ ገንስ።

3 ህንተ ኩሸይ ሱን፥

ህንተ ብራይ ናቆን ቱንስ፤

ህንተ ዶናይ ዎርዶ ኦደቴስ፤

ህንተ እንፃርሳይ ኢታባ ዙዙሜስ።

4 ፅሎተን ሞተይ ባዋ፤

ሱረተን ፕርደይካ ባዋ።

ኤንቲ ጮ ፓላማን ጬቀቶሶና፤

ዎርዶ ኦደቶሶና፤

ጭሞ ቃንትድ ኢታተ የሎሶና።

5 ኤንቲ ሾሻ ጱጱለ ሀጶሶና፤

ሻንጎ ሃዳ ዳዶሶና።

ሄ ጱጱለታ ምያ አስ ሀይቄስ፤

ጱጱልያፈ እሶይ መቅኮ፥

እያፐ ሾሽ ከዬስ።

6 ኤንቲ ዳድዳ ሻንጎ ሃዳይ ማኦስ ሀነና፤

እያራ ባንታ አሳተ ካማናዉ ዳንዳኦኮና።

ኤንታ ኦሶይ ኢታ፤

ጌላ ኦሶይ ኤንታ ኩሸን ኩምስ።

7 ኤንታ ቶሆት ኢታባ ኦናዉ ዎፆሶና፤

ፅሎ ሱ ጉሳናዉ ኤሶቶሶና።

ኤንታ ቆፋይ ኢታ፤ ኤንቲ ብዳ በሳ ኡባን

ቆሆይነ ቦሽ ደኤስ።

8 ኤንቲ ሳሮተ ኦገ ኤሮኮና፤

ኤንታ ኦግያን ሱረ ፕርድ ባዋ።

ኤንቲ ባንታ ኦግያ ጌላይዶሶና፤

ሄ ኦግያራ ሄመትያ ኦንካ ሳሮ ደመና።

9 ሄሳ ግሾ፥ ሱረ ፕርድ ኑፐ ሃክስ፤

ፅሎተ ኑኮ ሺቀና።

ኑኒ ፖኦ ኮዮስ፥ ሽን ማ ግድስ፤

ዋጋጋ ፖኦ ኮዮስ፥

ሽን ሳካና ማን ሄመቶስ።

10 ኑኒ ቆቀዳ ድርሳ ግምብያ ቦላ ታታፎስ፤

ሴታ ጋላስ፥ ሳእ ለምእን ሄመትያዳ በቶስ፤

ዎልቃራ ደእያ አሳ ግዶን

ኑኒ ሀይቅዳ አሳ መላ ግድዳ።

11 ኑኒ ኡባይ ባባንዳ ዋሶስ፤

ሆለዳ ካዮትድ ኦሎስ።

ኑኒ ሱረ ፕርዳ ኮይዳ፥

ሽን ደምቦኮ፤

አቶተ ኮይዳ፥ ሽን እ ኑፐ ሃክስ።

12 ኑ ባላይ ነ ስንን ዳርስ፤

ኑ ናጋራይ ኑ ቦላ ማርካቴስ።

ኑ ናቆይ ኑራ ደኤስ፤

ኑ ቆሁዋ ኑ ኤሮስ።

13 ኑኒ ማካልድ፥ ጎዳ ካዳ፤

ኑ ፆሳ አግድ ጉየ ስምዳ።

ጌላተነ ገነ ኦደትዳ፤

ኑኒ ዎርዶ ቃንትድ ዎርዶ የልዳ።

14 ሱረ ፕርድ ጉየ ሱገትስ፤

ፅሎተ ኑፐ ሃክስ።

ቱማተ ዳባባን በቴስ፤

አማነተ ገላናዉ በሰ ይስ።

15 ቱማተ አዉንካ በንተና፤

ኢታተፈ ሃክያ አስ ቆሆስ አድ እመቴስ፤

ጎዳይ ሱረ ፕርድ ባይናይሳ በእድ አዛንስ።

16 ኡንኤተይሳታ ማድያ አስነ

ኤንታዉ ጋናትያ አስ ባይናይሳ

ጎዳይ በእድ ማላለትስ።

ሄሳ ግሾ፥ እያ ቀሰይ እያዉ አቶተ ኤህስ፤

እያ ፅሎተይ እያ ካትስድ ኦይክስ።✝59:16 እሳ 63:5.

17 እ፥ ፅሎተ ትራን ዎያ ኦላ ሚሸዳ ማእስ፤

ባ ሁጵያን አቶተ ባርኔፃ ዎስ፤

ሀሎ ከስ ማኦዳ፥ ሀንቆ አፍላዳ ማእስ።

18 እ ኤንታዉ ኤንታ ኦሱዋዳ ኦሱዋዳ ዛራና፤

ሀንቁዋ ባ ሞርከታስ፥

ሴራ ባራ ኤቀተይሳታስ ጭጋና፤

ዩሾይ አባን ተቀትዳ ቢታታስ ኤንታ ኦሱዋዳ እማና።

19 ጎዳ ፔኖይ ዎልቃማ ጎተዳ ድእሸ ያና ግሾ፥

ዉሎሀ ባጋን ደኤይሳት ጎዳ ሱንስ ያያና፤

ዶሎሀ ባጋን ደኤይሳት እያ ቦንቻና።

20 "ፅዮነስነ ያይቆባ ዘረ ግዶን

ባንታ ናጋራፐ ስመይሳታ ዎዘይስ ያና።

21 ታዉ ኤንታራ ደእያ ጫቆይ ሀይሳ፦

ህንተ ቦላ ደእያ ታ አያናይነ

ታኒ ህንተ ዶናን ዎዳ ታ ቃላይ፥

ሀችፈ ዶምድ፥ መርና ጋካናዉ፥

ህንተ ዶናፐ፥ ህንተ ናይታ ዶናፐነ

ህንተ ናይታ ናይታ ዶናፐ ሻከተና"

ያጌስ ጎዳይ።