1 ବେନ୍‌ ନାରୁଣ୍ଡ୍‌ ଶାସନ ବଲ ପାହେମ୍‌ ଆଦ୍‌ତଣ୍ଡ୍, ଅଣ୍ଡ୍‌ ଜ୍ଞାନତିଙ୍କ୍‌ ବଲ୍‌ ପାହେମ୍‌ ଆଦ୍‌ତଣ୍ଡ୍‌; ମାତର୍‌ ବେନ୍‌ ନ୍ୟାୟ୍‌ତିଙ୍କ୍‌ ପାସ୍କିତଣ୍ଡ୍‌, ଅଣ୍ଡ୍‌ ପଶୁ ଲେକାମ୍‌ । 2 ସତ୍‌ ନାରୁଣ୍ଡ୍‌ ସଦାପ୍ରବୁନାଗ୍‌ ଅନୁଗ୍ରହ ପାହେମ୍‌ ଆଦ୍‌ତଡ଼୍‌, ମାତର୍‌ କାରାପ୍‌ ଆଲ୍‌ସାନଡ଼୍‌ ଅଣ୍ଡ୍‌ ଦୋଷି ମାଡ଼ିତଣ୍ଡ୍‌ । 3 ଦୁଷ୍ଟଡ଼୍‌ତଡ଼୍‌ ବେନ୍‌ବା ନାରୁଣ୍ଡ୍‌ ସାୟେ ମାନ୍‌ନଡ଼୍‌, ବାତେଙ୍କ୍‌ଇତ୍କେ ଦାର୍ମିକତେ ମୁଲେ ବେସୁଙ୍କ୍‌ ଗୁଞ୍ଚେମ୍‌ ଆୟ । 4 ଗୁଣବତି ନାଟାଡ଼୍‌ ନିଜର ମୁଦ୍‌ପାନ୍‌ ସଜ୍‌ଇନା; ମାତର୍‌ ସିଗ୍ ଇସମାନ୍ଦାନ୍‌ ନାଟାଡ଼୍‌ ତାନ୍‌ ବୁଲାସାରେ ଉର୍‌ଙ୍ଗ୍‌ତେ ଲେକାମ୍‌ । 5 ଦାର୍ମିକିଡ଼୍‌ ଚିନ୍ତେ ନାର୍ଗେ; ମାତର୍‌ ଦୁଷ୍ଟ ମାଡ଼ାନଡ଼୍ ଗଟ୍‌ ବୁଚା ମାଡ଼ାନାଦ୍‌ ଇନା । 6 ଦୁଷ୍ଟନଡ଼୍‌ ଆୱୁକାନ୍‌ ମାଇଦିଙ୍କ୍‌ କେପିମାନ୍ଦାନ୍‌ ଗଟି କେତିତଡ଼୍‌, ମାତର୍‌ ସାୟେତ୍‌ ନାରୁଡ଼୍‌ତେ ପାୟୁର୍‌ ଅଡ଼୍‌କିଙ୍କ୍‌ ରକ୍ଷା ମାଡ଼ିତ୍‌ । 7 ଦୁଷ୍ଟନଡ଼୍‌ ତାଃକିଆସ୍‌ ମେଣ୍ଡେ ମାନ୍‌ନଡ଼୍‌, ମାତର୍‌ ଦାର୍ମିକ୍‌ନଡ଼୍‌ ଲନ୍‌ ସାରେଦିନେ ମାନ୍ତେ । 8 ନାରୁଡ଼୍‌ ନିଜେତ୍‌ ସାୟେତ୍‌ ବୁଦ୍ଦ୍ ଅନୁସାର୍‌ତେ ପ୍ରଶଂସା ପାହେମ୍‌ ଆଦ୍‌ତଡ଼୍‌, ମାତର୍‌ ବେନନାଦ୍‌ କାରାପ୍‌ ହୃଦୟ, ଅଣ୍ଡ୍‌ ପାସ୍କି ଆଦ୍‌ତଣ୍ଡ୍‌ । 9 ବେନ୍‌ ନାରୁଡ଼୍‌ ଗାରେ କାଦିଇଲେ ଅଣ୍ଡ୍ ନିଜେତିଙ୍କ୍ ପ୍ରଂସଶା ମାଡ଼ିତଣ୍ଡ୍; ଆ ନାରୁନାଗାଙ୍କ୍‌ ବେନ୍ ନାରୁଣ୍ଡ୍ ପାସ୍କି ଆଦ୍‌ତଡ଼୍‌, ନୁ ଅନ୍ ପାକେ ଦାସ ଦାସୀ ମିନ୍ଦେଡ଼୍ ଆ ନାରୁଣ୍ଡ୍ ଦନ୍ୟ । 10 ଦାର୍ମିକ ନାରୁଡ଼୍‌ ନିଜେତ୍‌ ପଶୁତେ ଜିଉତିଙ୍କ୍‌ ପ୍ରେମ ମାଡ଼ିତଡ଼୍‌, ମାତର୍‌ ଦୁଷ୍ଟନଡ଼୍‌ ଦୟା ଇଲ୍‌ୱେନଣ୍ଡ୍‌ ଲେକାମ୍ ଆଦ୍‌ତଣ୍ଡ୍‌ । 11 ବେନ୍‌ ନିଜର ବୁମ ଚାଷ୍ ମାଡ଼ିତଡ଼୍‌, ଅଣ୍ଡ୍‌ ନାର୍ଗେ କାଦି ପାହେମ୍‌ ଆଦ୍‌ତଣ୍ଡ୍‌; ମାତର୍‌ ବେନ୍‌ ବେକାର୍ ବିଷୟତେ ଅସିତଣ୍ଡ୍‌, ଅଣ୍ଡ୍‌ ବୁଦ୍ଦିଇଲ୍‌ୱଣ୍ଡ୍‌ ଆଦ୍‌ତଣ୍ଡ୍‌ । 12 ଦୁଷ୍ଟ ନାରୁଡ଼୍‌ କାରାପ୍‌ ପାଡ଼୍‌ୟିମାଡ଼ାନଡ଼୍‌ ୱାଲେତିଙ୍କ୍‌ ପସନ୍ଦ୍‌ ମାଡ଼ିତଣ୍ଡ୍‌; ମାତର୍‌ ଦାର୍ମିକ୍‌ନଡ଼୍‌ ମାନ୍ଦେ କାୟା ଆଦାନାଦ୍‌ । 13 ଦୁଷ୍ଟ ନିଜେତ୍‌ ପାୟୁର୍‌ତେ ଅଦର୍ମତେ ମାଇଦିଙ୍କ୍‌ ଉଡ଼ିୟ୍‌ଦାଗ୍‌ ରାଲିତଣ୍ଡ୍‌, ମାତର୍‌ ଦାର୍ମିକ୍‌ ଦୁଃକାମ୍‌କନ୍‌ ଉଦ୍ଦାର୍‌ ପାହେମ୍‌ ଆଦ୍‌ତଣ୍ଡ୍‌ । 14 ନାରୁଣ୍ଡ୍‌ ନିଜେତ୍‌ ପାୟୁର୍‌ତେ କାୟେ ସାୟେ ତିଞ୍ଜ୍ ପାଞ୍ଜିତଣ୍ଡ୍‌, ମେଣ୍ଡେ, ନାରୁନ୍‌ କାଇଦେ ତିଆର୍ ଆତ୍ତେ ପାଡ଼୍‌ୟିଦେ କାୟେ ଅକିଙ୍କ୍‌ ଇଦାନଙ୍କ୍‌ ଆଦ୍‌ତେ । 15 ମୁର୍କନ୍‌ ଆର୍‌ ଅନ୍‌ ନିଜେତ୍‌ କଣ୍ଡେତେ ସାୟେ; ମାତର୍‌ ବେନ୍‌ ଜ୍ଞାନି ନାରୁଣ୍ଡ୍‌, ଅଣ୍ଡ୍‌ ସାୟେତ୍ ବାକ୍ୟ କେଞ୍ଜିତଣ୍ଡ୍‌ । 16 ବୁଦ୍ଦ୍‌ଇଲ୍‌ୱେ ନାରୁଣ୍ଡ୍‌ ହଟାତ୍‌ କିଜ୍ରାମ୍‌ ଆଦ୍‌ତେ; ମାତର୍‌ ଚତୁର୍‌ ନାରୁଡ଼୍‌ ସିଗ୍‌ ମୁସିତଣ୍ଡ୍‌ । 17 ସାୟେତ୍‌ ସାକ୍ଷି ନ୍ୟାୟ୍‌ ପେସ୍‌ପ୍ପିତଣ୍ଡ୍‌; ମାତର୍‌ ମିଚ୍‌ସାକ୍ଷି ନୁ ବୁଚା ଗଟି କେତାନଣ୍ଡ୍‌ । 18 ବେନ୍‌ ବେନନ୍‌ ମିନ୍ଦେଣ୍ଡ୍‌ ବାତ୍‌ତେ ଆଲ୍‌ସକଟ୍‌ କେତାନନ୍‌ ଆ ନାରୁନ୍‌ ଗଟି ଚୁର୍‌ତେ ରେଃତେ ଲେକାମ୍ ୱେସିତ୍‌; ମାତର୍‌ ଜ୍ଞାନି ନାରୁନ୍‌ ଗଟ୍ ସାୟେ ୱେସିତ୍‌ । 19 ସତ୍‌ କେତାନଡ଼୍‌ ପାୟୁର୍‌ ସାରେଦିନାତାଦ୍‌ ଆଦ୍‌ତେ; ମାତର୍‌ ମିଚ୍‌ କେତାନଡ଼୍‌ ୱାଞ୍ଜେର୍‌ ଇସୁର୍‌ ସମୟ୍‌ ଆଦ୍‌ତେ । 20 କାରାପ୍‌ ଚିନ୍ତେମାଡ଼ାନଡ଼୍‌ ହୃଦୟତାଗ୍‌ ବୁଚା ଗଟି କେତାନଡ଼୍ ମାନ୍ତେ; ମାତର୍‌ ସାୟେ ଶାନ୍ତି ଇଦାନଡ଼୍‌ ସାର୍‌ଦେ ଆଦ୍‌ତେ । 21 ଦାର୍ମିକ୍‌ତେ ପର ବାତ୍‌ତେବା ବିପଦ୍ ଗଟେମ୍‌ ଆୟ; ମାତର୍‌ ଦୁଷ୍ଟ ନାରୁଡ଼୍‌ କାରାପ୍‌ ନିଣ୍ଡିତେ । 22 ମିଚ୍‌ କେତାନଡ଼୍‌ ପାୟୁର୍‌ ସଦାପ୍ରବୁନ୍‌ ପାସ୍କାନ୍‌ ବିଷୟ; ମାତର୍‌ ବେନଡ଼୍‌ ସତ୍ୟ ବେବାର୍‌ ମାଡ଼ିତଡ଼୍‌, ଅଡ଼୍‌ ତାମ୍‌ ସାୟେତ୍‌ ବିଷୟ ଇଞ୍ଜ କେତିତଡ଼୍‌ । 23 ଚତୁର୍‌ ନାରୁଣ୍ଡ୍‌ ନିଜେତ୍‌ ଜ୍ଞାନତିଙ୍କ୍‌ ମୁସିତଣ୍ଡ୍‌; ମାତର୍‌ ମୁର୍କନଡ଼୍‌ ଜ୍ଞାନ୍‌ ପୁନ୍‌ୱେ ବିଷୟ୍‌ ପେସ୍‌ପ୍ପିତ୍‌ । 24 ପାଡ଼୍‌ୟି ମାଡ଼୍‌ନଡ଼୍‌ କାଇ ରାଜତ୍ୱ ମାଡ଼ିତ୍‌; ମାତର୍‌ ମଣ୍ଡି ନାରୁଣ୍ଡ୍‌ ୱିଟେ ପାଡ଼ିୟ୍‌ ମାଡ଼ିତ୍‌ । 25 ନାରୁନ୍‌ ଚିନ୍ତେ ମାନ୍‌ତିଙ୍କ୍‌ ମଦଲ୍‌ ମାଡ଼ିତ୍‌; ମାତର୍‌ ସାୟେତ୍‌ ବାକ୍ୟ ଅଙ୍କ୍‌ ୱେଡ଼୍‌କେ ତାତିତ୍‌ । 26 ଦାର୍ମିକ୍‌ ନାରୁଡ଼୍‌ ନିଜେତ୍ ଗାରେତଡ଼୍‌କିଙ୍କ୍‌ ଆର୍‌ତଃତିତ୍‌; ମାତର୍‌ ଦୁଷ୍ଟନଡ଼୍‌ ଆର୍‌ ଅଡ଼୍‌କିଙ୍କ୍‌ ବୁଲ୍‌କା ମାଡ଼ିତ୍‌ । 27 ମଣ୍ଡି ନାରୁଣ୍ଡ୍‌ ୱେଟେତାଗ୍ ରେଃସ୍ ମାନ୍ଦାନ୍‌ ପଶୁତିଙ୍କ୍‌ ଆଟଣ୍ଡ୍‌; ମାତର୍‌ ତିପାଲ୍‌ତେ ନାରୁଣ୍ଡ୍‌ ନାର୍ଗେ ଦାମିନ୍‌ ସମ୍ଫତ୍ତି ପାହେମ୍ ଆଦ୍‌ତଣ୍ଡ୍‌ । 28 ଦାର୍ମିକ୍‌ନଡ଼୍ ଆର୍‌ଦାଗ୍‌ ଜିଉନ୍‌ ମାନ୍‌ତେ; ମେଣ୍ଡେ, ଆଗେ ଆଦାନ୍‌ ଆର୍‌ଦାଗ୍‌ ଡଲାନାଦ୍‌ ମାନ ।