1 ବୁଦ୍ଦ୍‌ମାନ୍ଦାନ୍‌ ମାର୍‌ ନିଜର ବାବାନ୍‌ ଗଟ୍‌ କେଞ୍ଜିତଣ୍ଡ୍‌; ମାତର୍‌ ନିନ୍ଦେମାଡ଼ାନଣ୍ଡ୍ ଗଟ୍‌ କେଞ୍ଜଣ୍ଡ୍‌ । 2 ନାରୁଡ଼୍‌ ନିଜେତ୍‌ ପାୟୁର୍‌ତଡ଼୍‌ ସାୟେ ବେବାର୍ ମାଡ଼ିତଣ୍ଡ୍‌; ମାତର୍‌ ବିଶ୍ୱାସ୍‌ତାଗ୍ ମିଚ୍‌ଗଟି କେତାନନ୍‌ ଜିଉନ୍ ଦଣ୍ଡ୍‌ ଆଦ୍‌ତଣ୍ଡ୍‌ । 3 ବେନ୍‌ ନାରୁଡ଼୍‌ ନିଜେତ୍‌ ମକମ୍‌ତାଗ୍‌ କେପାନଙ୍କ୍‌ ନେଃତିତଣ୍ଡ୍‌, ଅଣ୍ଡ୍‌ ନିଜେତ୍‌ ଜିଉନ୍‌ ରକ୍ଷା ମାଡ଼ିତଣ୍ଡ୍‌; ମାତର୍‌ ବେନ୍‌ଆୟି ଚିନ୍ତେ ମାଡ଼କଟ ଗଟି କେତିତଣ୍ଡ୍‌; ଅନାଦ୍‌ ନଷ୍ଟ ଆଦ୍‌ତେ । 4 ମଣ୍ଡି ନାରୁନ୍‌ ମନ୍‌ତାଗ୍‌ ପାସ୍କେ ବାତେବା ପାହେମ୍‌ ଆୟିଅଣ୍ଡ୍‌, ମାତର୍‌ ପାଡ଼୍‌ୟିମାଡ଼ାନଣ୍ଡ୍‌ ଜିଉ ସାୟେ ମେନ୍ଦୁଲ୍ ଆଦ୍‌ତେ । 5 ଦାର୍ମିକ ନାରୁଡ଼୍‌ ମିଚ୍‌ତିଙ୍କ୍‌ ପାସ୍କିତଣ୍ଡ୍‌; ମାତର୍‌ ଦୁଷ୍ଟ ନାରୁଣ୍ଡ୍‌ କାଡ଼ିୟିତେ ଗାବ୍‌ ଇନା, ମେଣ୍ଡେ ଅଣ୍ଡ୍‌ ସିଗ୍‌ ଆଦ୍‌ତଣ୍ଡ୍‌ । 6 ଦାର୍ମିକ୍‌ନଡ଼୍‌ ସାୟେତ୍‌ ଆର୍‌ଦେନଙ୍କ୍‌ ରକ୍ଷା ମାଡ଼ିତ୍‌; ମାତର୍‌ ଦୁଷ୍ଟନଡ଼୍‌ ପାପ୍‌ତିଙ୍କ୍‌ ଉଲ୍‌ଟାମାଡ଼ିତଡ଼୍‌ । 7 ବେନ୍‌ ନିଜେତିଙ୍କ୍‌ ଦନ୍‌ମିନ୍ଦେ ଇଞ୍ଜ ତଃତିତଣ୍ଡ୍‌, ମାତର୍‌ ଅନାଦ୍‌ ବାତେ ଇଲେ; ବେନ୍‌ ବା ନିଜରତିଙ୍କ୍‌ ଗରିବ୍‌ ତଃତିଣ୍ଡ୍‌, ମାତର୍ ଅନାଗ୍‌ ନାର୍ଗେ ଦନ୍‌ ମିନ୍ଦେ । 8 ନାରୁଡ଼୍‌ ସମ୍ପତି ଅନାଦ୍ ଜିଉନ୍‌ ଉଦ୍ଦାର୍‌ ଇନା; ମାତର୍‌ ଗରିବ୍‌ ନାରୁଡ଼୍‌ ଦମକ୍‌ କେଞ୍ଜଣ୍ଡ୍‌ । 9 ଦାର୍ମିକ୍‌ତେ ୱେସ୍‌ତିଙ୍କ୍‌ ୱେଡ଼୍‌କେ ମାଡ଼ିତ୍‌; ମାତର୍‌ ଦୁଷ୍ଟନଡ଼୍‌ କୁପିତିଙ୍କ୍‌ ପିଃତିତଣ୍ଡ୍‌ । 10 ଅହଙ୍କାର୍‌ତାଗାଙ୍କ୍‌ ମାତର୍‌ ରାମ୍‌କ୍‌ ପେୟିତିତା; ମାତର୍‌ ଆ ନାରୁଡ଼ାଗ୍‌ ଜ୍ଞାନ୍‌ ମିନ୍ଦେ । 11 ମିଚ୍‌ତେ ପାହେମ୍ ଆତ୍‌ତେ ଦନ ନଷ୍ଟ ଆଦ୍‌ତେ, ମାତର୍‌ କାଇଦେ ଗାଡ଼୍‌ସ୍‌ତେ ଦନ ପେର୍‌ସିତ୍‌ । 12 ଆଶା ମାଡ଼ାନାଦ୍‌ ଲେଟ୍‌ ମନ୍‌ତେ ଦୁଃକାମ୍‌ ବିଷୟ; ମାତର୍‌ ପାସ୍କାନାଦ୍‌ ସାୟେତ୍ ଜିଉନ୍‌ ମାଡ଼େ ଲେକାମ୍‌ । 13 ବେନ୍‌ ନାରୁଡ଼୍‌ ଶିକ୍ଷାତିଙ୍କ୍‌ ପାସ୍କିତଣ୍ଡ୍‌, ଅଣ୍ଡ୍‌ ନିଜେତ୍‌ ପର ବିପଦ୍‌ ତାତିତଣ୍ଡ୍‌; ମାତର୍‌ ବେନ୍‌ ଶିକ୍ଷାତିଙ୍କ୍‌ ୱେର୍‌ଦ୍‌ତଣ୍ଡ୍‌, ଅଣ୍ଡ୍‌ ପୁରସ୍କାର୍‌ ପାହେମ୍‌ ଆଦ୍‌ତଣ୍ଡ୍‌ । 14 ଡଲାନ୍‌ ଉଡ଼ିୟ୍‌ଦାଗାଙ୍କ୍‌ ମାଲ୍‌ପାନ୍‌ ମାଇଦିଙ୍କ୍‌ ଜ୍ଞାନ୍‌ତେ ନିୟମ୍‌ ଜିଉନ୍‌ତେ ଇଲ୍‌କେ ଇନା ଆଦ୍‌ତେ । 15 ସାୟେତ୍‌ ବୁଦ୍ଦ୍‌ତେନନ୍ କାୟେତେ ଆଶିର୍ବାଦ୍‌, ମାତର୍‌ ମିଚ୍‌କେତାନଡ଼୍‌ ଆର୍‌ ଗାଟି ତିପାଲ୍‌ତାଦ୍‌ ଆଦ୍‌ତେ । 16 ସାରେ ଚତୁର୍‌ ନାରୁଡ଼୍‌ ବୁଦ୍ଦ୍‌ତେ ପାଡ଼୍‌ୟି ମାଡ଼ିତଣ୍ଡ୍; ମାତର୍‌ ମୁର୍କ ବୁଦ୍ଦ୍‌ଇଲ୍‌ୱେନଣ୍ଡ୍‌ ଏକାମ୍ ମାଡ଼ିତଣ୍ଡ୍‌ । 17 ଦୁଷ୍ଟନଡ଼୍‌ କାବୁର୍‌ କେତାନଡ଼୍‌ ବିପଦ୍‌ତାଗ୍‌ ରାଲିତଡ଼୍‌; ମାତର୍‌ ସତ୍‌ତେ କାବୁର୍‌ କେତାନନ୍‌ ମେନ୍ଦୁଲ୍‌ ସାୟେ ମାନ୍ତେ । 18 ବେନ୍‌ ନାରୁଡ଼୍‌ ଶାସନ ମାନେମ୍‌ ଆୟଣ୍ଡ୍‌, ଅଣ୍ଡ୍‌ ଗରିବ୍‌ତେ ନୁ ସିଗ୍‌ ଆଦ୍‌ତଣ୍ଡ୍‌; ମାତର୍‌ ବେନ୍‌ ମନ୍‌ ଅଦ୍‌ତଣ୍ଡ୍‌, ଅଣ୍ଡ୍‌ ସନ୍‌ମାନ୍‌ ପାହେମ୍‌ ଆଦ୍‌ତଣ୍ଡ୍‌ । 19 ହୃଦୟ୍‌ତେ କାମ୍‌ ପୁରାଆତ୍କେ ଜିଉତିଙ୍କ୍‌ ମିଙ୍ଗିତ୍‌; ମେଣ୍ଡେ, ମୁର୍କ ନାରୁଣ୍ଡ୍ କାରାପ୍‌ତିଙ୍କ୍‌ ୱିଡ଼୍‌ସାଙ୍କ୍‌ ଇଚ୍ଛା ମାଡ଼ଣ୍ଡ୍‌ । 20 ଜ୍ଞାନିନ୍‌ତଡ଼୍‌ ଉଡ଼୍‌କେ, ଆସୁଙ୍କ୍‌ ନିମେ ଜ୍ଞାନି ଆଦ୍‌ତିନ୍‌; ମାତର୍‌ ମୁର୍କନଡ଼୍‌ତଡ଼୍‌ ଉଡ଼୍‌କେ ତିପାଲ୍‌ ଆଦ୍‌ତିନ୍‌ । 21 ପାପିନଡ଼୍‌ ପେର୍କେ କାରାପ୍‌ ତଲିତ୍‌; ମାତର୍‌ ଦାର୍ମିକିନଡ଼୍‌ ସାୟେତାଦ୍‌ ପୁରସ୍କାର ଆଦ୍‌ତେ । 22 ସାୟେତ୍‌ ନାରୁଡ଼୍‌ ନିଜେତ୍‌ ନାତିଡ଼୍‌ ମାଇଦିଙ୍କ୍‌ ଅଦିକାର୍‌ ୱିଡ଼୍‌ସିଆଦ୍‌ତଣ୍ଡ୍‌; ମାତର୍‌ ପାପିନ୍‌ ଦନ ଦାର୍ମିକିନଡ଼୍‌ ମାଇଦିଙ୍କ୍‌ ଗୁଡ଼୍‌ପି ଆଦ୍‌ତେ । 23 ଗରିବ୍‌ତେ ଚାଷ୍‌ତଡ଼୍‌ କାଦିତେ ନାର୍ଗେ ଆଦ୍‌ତେ; ମାତର୍‌ ଅନ୍ୟାୟ୍‌ ମାଇଦିଙ୍କ୍‌ ବେନ୍‌ ବେନନାଦ୍‌ ଦଂସ ଆଦ୍‌ତେ । 24 ବେନ୍‌ ଡ଼ୁଡ଼୍‌ ବ୍ୟବହାର ମାଡ଼ାନଙ୍କ୍‌ ବୁଲ୍‌ ମାଡ଼ିତଣ୍ଡ, ଅଣ୍ଡ୍‌ ନିଜର ମାର୍‌କିଙ୍କ୍‌ ପାସ୍କିତଣ୍ଡ୍‌; ମେଣ୍ଡେ ବେନ୍‌ ଆଦିଙ୍କ୍‌ ପ୍ରେମ ମାଡ଼ିତଣ୍ଡ୍‌, ଅଣ୍ଡ୍‌ ନାରୁଡ଼୍‌ମୁନେ ଜାପେନେ ଦଣ୍ଡ ପାହେମ୍‌ ଆଦ୍‌ତଣ୍ଡ୍‌ । 25 ଦାର୍ମିକ୍‌ ନିଜେତ୍‌ ଜିଉତିଙ୍କ୍ ପାଞ୍ଜ୍‌ନା ତିନ୍‌ତଣ୍ଡ୍, ମାତର୍‌ ପାପିନଡ଼୍‌ ଡଙ୍କେତାଗ୍‌ ପାଞ୍ଜ୍‌ୱାଦ୍ ମାନ୍‌ତେ ।