1 ସାୟେତ୍ ଉତ୍ତର କପାକନ୍‌ ଦମକ୍‌ ମାଡ଼ିତ୍‌; ମାତର୍‌ କାରାପ୍‌ ବାକ୍ୟ କପାମ୍‌ତା ଲାଗିଅଦ୍‌ତେ । 2 ବୁଦ୍ଦ୍‌ମାନ୍ଦାନଡ଼୍‌ ୱାଞ୍ଜେର୍‌ ନିଜାମ୍‌ ଜ୍ଞାନ ନାଡ଼୍‌ସ୍ପିତ୍‌; ମାତର୍‌ ମୁର୍କଡ଼୍‌ ପାୟୁର୍‌ ଜ୍ଞାନ୍‌ଇଲ୍‌ୱେ ଗଟି କେତିତ୍‌ । 3 ସଦାପ୍ରବୁନ୍‌ କଣ୍ଡା ସାରେପାକେ ମାଞ୍ଜ୍‌ ଅଦର୍ମ ନୁ ସାୟେ ନାରୁଙ୍କୁ ଏଞ୍ଚିତ୍‌ । 4 ଶାନ୍ତିତେ ୱାଞ୍ଜେର୍‌ ଜିଉନ୍‌ତେ ମାଡ଼େଇନା; ମେଣ୍ଡେ, କାରାପ୍‌ ୱାଞ୍ଜେର୍‌ ଆତ୍ମା ଉଃତିତ୍‌ । 5 ବୁଦ୍ଦ୍‌ଇଲ୍‌ୱେନଡ଼୍‌ ନିଜର ବାବାନ୍‌ ନିୟମ୍‌ ବେକାର୍‌ ମାଡ଼ିତଣ୍ଡ୍‌; ମେଣ୍ଡେ, ବେନ କେତାନ୍ ଗଟ୍ କେଞ୍ଜିତଣ୍ଡ୍‌, ଅଣ୍ଡ୍‌ ବୁଦ୍ଦ୍ ପାହେମ୍‌ ଆଦ୍‌ତଣ୍ଡ୍‌ । 6 ଦାର୍ମିକତେ ଲନ୍‌ ନାର୍ଗେ ସମ୍ଫତ୍ତି ମାନ୍‌ତେ; ମେଣ୍ଡେ, ଦୁଷ୍ଟନ୍‌ ଗୁଡ଼୍‌ପାନାଦ୍‌ ଦନ୍‌ ନଷ୍ଟ ଆଦ୍‌ତେ । 7 ବୁଦ୍ଦ୍‌ମାନ୍ଦାନନ୍‌ ପାୟୁର୍‌ତେ ଶିକ୍ଷା ନାଡ଼୍‌ସିତ୍‌; ମାତର୍‌ ମୁର୍କନ୍‌ ମନ୍‌ ଆଲା ମାନ୍‌ । 8 ଦୁଷ୍ଟନଡ଼୍‌ ବଲିଦାନ୍‌ ସଦାପ୍ରବୁନାଗ୍ ପାସ୍କାନ୍‌ ବିଷୟ ଆଦ୍‌ତେ; ମାତର୍‌ ନାରୁଡ଼୍‌ ନାରୁଡ଼୍‌ତେ ପ୍ରାର୍ତନା ଅନ୍‌ କଣ୍ଡେତ୍‌ତେ ସାୟେ ତନ୍ଦିତ୍‌ । 9 ଦୁଷ୍ଟନ୍‌ ଆର୍‌ ସଦାପ୍ରବୁନ୍‌ ପାସ୍କାନ୍ ବିଷୟ; ମାତର୍‌ ଦାର୍ମିକତେ ଆଦାନଡ଼୍‌କିଙ୍କ୍ ଅଣ୍ଡ୍‌ ପ୍ରେମ ମାଡ଼ିତଣ୍ଡ୍‌ । 10 ବିପତନ୍‌ ପର ଦୁଃକାମ୍‌ତେ ଦଣ୍ଡ୍ ଆଦ୍‌ତେ; ମେଣ୍ଡେ, ବେନ୍‌ ନାରୁଡ଼୍‌ ଗଟ୍ ମାନେମ୍ ଆୟିଣ୍ଡ୍, ଅଣ୍ଡ୍‌ ଡ଼ଲିତଣ୍ଡ୍‌ । 11 ପାତାଲ ନୁ ନଷ୍ଟ ପଡ଼୍‌ୟେ ସଦାପ୍ରବୁନ୍‌ ଗାରେ ମାନ୍‌ତେ; ଆସୁଙ୍କ୍‌ ନାରୁଣ୍ଡ୍‌ ମାର୍‌କିଡ଼୍‌କିଙ୍କ୍‌ ହୃଦୟ ଅଦିକ୍‌ ଆୟ ? 12 ନିନ୍ଦ୍‌ମାଡ଼ାନଣ୍ଡ୍‌ ଶିକ୍ଷା ପାହେମ୍‌ ଆଦାନଙ୍କ୍‌ ବଲ୍‌ ପାହେମ୍‌ ଆୟଣ୍ଡ୍‌, ଜ୍ଞାନିନ୍‌ ଗାରେ ଆନଣ୍ଡ୍ । 13 ୱେଡ଼୍‌କେତ୍‌ ମନ୍‌ ମକମ୍‌ତିଙ୍କ୍‌ ସାର୍‌ଦେମାଡ଼ିତ୍‌; ମେଣ୍ଡେ, ମନତେ ଦୁଃକତେ ଆତ୍ମା ଉଃତିତ୍‌ । 14 ବୁଦ୍ଦିମାନ୍ଦାନ୍‌ ମନ୍‌ ବୁଦ୍ଦ୍‌ ମେଃକିତ୍‌; ମାତର୍‌ ମୁର୍କଡ଼୍‌ ପାୟୁର୍‌ ବୁଦ୍ଦ୍‌ଇଲ୍‌ୱାଦ୍‌ କାଦି ତିନ୍‌ତେ । 15 ଦୁଃକି ନାରୁଡ଼୍‌ ସାରେ ଦିନ୍‌ କାରାପ୍‌; ମାତର୍‌ ବେନ୍‌ ୱେଡ଼୍‌କେତ୍ ହୃଦୟତନ୍‌, ଅନ୍‌ ନିତାଲ୍‌ ତିନ୍‌ତଣ୍ଡ୍ । 16 ଶାନ୍ତିଇଲକଟ୍‌ ଆସ୍ ନାର୍ଗେ ସମ୍ପତି ମାନ୍ଦାନ୍ ବାଦୁଲ୍‌ତେ ସଦାପ୍ରବୁଙ୍କ୍‌ ୱେର୍‌ସ୍‌ ଇଚୁର୍‌ ମାନ୍ଦାନାଦ୍‌ ସାୟେ । 17 କପାମ୍‌ତେ ମେନ୍ଦୁଲ୍ ମାନ୍ଦାନ୍ ପଶୁତ୍ ଆୱୁଙ୍ଗ୍‌ ତିନ୍ଦାନ୍‌ ବାଦୁଲ୍‌ତେ ପ୍ରେମ ମାନ୍ଦାନ୍‌ ପଡ଼୍‌ୟେତ୍‌ କୁସିର୍‌ ତିନ୍ଦାନାଦ୍‌ ସାୟେ । 18 କପାତେ ନାରୁଡ଼୍‌ ରାମକ୍‌ ମାଡ଼ିତଡ଼୍‌; ମେଣ୍ଡେ, କପାମ୍‌ ମାଡ଼ାନଙ୍କ୍‌ ଶାନ୍ତି ନାରୁଡ଼୍‌ ଜେଇ ରାମକ୍‌ ମାଡ଼ିତଡ଼୍‌ । 19 ମଣ୍ଡିନ୍‌ ଆର୍‌ କୟେୱେଲୁମ୍‌ ଇନା, ମାତର୍‌ ସାୟେତ୍ ନାରୁନ୍‌ ଆର୍‌ ଅସାର୍‌ ଇନା ମାଡ଼ିତ୍‌ । 20 ବୁଦ୍ଦ୍ ମାନ୍ଦାନ୍‌ ମାର୍‌ ବାବାଙ୍କ୍‌ ୱେଡ଼୍‌କେ ମାଡ଼ିତଣ୍ଡ୍‌; ମାତର୍‌ ମୁର୍କନ୍‌ ନାରୁଣ୍ଡ୍‌ ମାର୍‌ ନିଜର ୟାୟଙ୍କ୍‌ ପାସ୍କିତଣ୍ଡ୍‌ । 21 ମୁର୍କନ୍‌ ପର ବୁଦ୍ଦ୍‌ଇଲ୍‌ୱେନଣ୍ଡ୍‌ ୱେଡ଼୍‌କେ ତଃତିତଣ୍ଡ୍‌; ମାତର୍‌ ବୁଦ୍ଦିମାନ୍‌ ନାରୁଡ଼୍‌ ନିଜର ଆର୍‌ ସାୟେ ମାଡ଼ିତଣ୍ଡ୍‌ । 22 ସାୟେତ୍ ଶିକ୍ଷା କେତାନାଦ୍‌ ଅବାବ୍‌ ଲେକାମ୍‌; ମାତର୍‌ ନାର୍ଗେ ନାରୁଡ଼୍‌ତଡ଼୍ ଆଦ୍ ସାରେଦିନ୍‌ତିଙ୍କ୍‌ ଆଦ୍‌ତେ । 23 ନିଜେତ୍‌ ପାୟୁର୍‌ତେ ଗଟିନେ ନାରୁଡ଼୍‌ ୱେଡ଼୍‌କେ ଆଦ୍‌ତଡ଼୍‌, ମେଣ୍ଡେ ସାରେ ସମୟ୍‌ତେ ଗଟି କେତାନାଦ୍ ବେସର୍‌ ସାୟେ । 24 ମଦଲ୍‌ତେ ପାତାଲ୍‌ତିଙ୍କ୍‌ ୱିଡ଼୍‌ସାନ୍‌ ମାଇଦିଙ୍କ୍‌ ବୁଦ୍ଦିମାନ୍‌ ନାରୁଡ଼୍‌ ମାଇଦିଙ୍କ୍‌ ଜିଉନ୍‌ତେ ଆର୍‌ ପର ଆଦ୍‌ତେ । 25 ଗର୍ବି ନାରୁଡ଼୍‌ ଲନ୍‌ ସଦାପ୍ରବୁ ଉଃସ୍‌ସିଦ୍‌ତଣ୍ଡ୍‌; ମାତର୍‌ ରାଣ୍ଡିନ୍‌ ସିମା ଅଣ୍ଡ୍‌ ନିୟମ୍‌ ମାଡ଼ିତଣ୍ଡ୍‌; 26 କାରାପ୍‌ତେ ସଦାପ୍ରବୁନ୍‌ ଗାରେ ପାସ୍କାନ୍‌ ବିଷୟ; ମାତର୍‌ ମନ୍‌ଦେ ଗଟି ସାୟେ ଆଦ୍‌ତା । 27 ଲୋବି ନିଜର ଲତ୍‌ତେ ନାରୁଙ୍କ୍‌ ଦୁଃକ୍‌ ଇଦ୍‌ତଣ୍ଡ୍‌, ମାତର୍‌ ବେନ୍‌ ନାରୁଡ଼୍‌ ଲାଞ୍ଚ୍‌ତିଙ୍କ୍ ପାସ୍କିତଣ୍ଡ୍, ଅଣ୍ଡ୍‌ ବାଦ୍‌କିତଣ୍ଡ୍‌ । 28 ଦାର୍ମିକ୍‌ତେ ମନ୍‌ ଆଲ୍‌ସି ମେଣ୍ଡେ ଉତ୍ତର ଇଦ୍‌ତଣ୍ଡ୍‌; ମାତର୍‌ ଦୁଷ୍ଟଡ଼୍‌ ପାୟୁର୍‌ କାରାପ୍‌ ଗଟି ପେସ୍ପିତଡ଼୍‌ । 29 ସଦାପ୍ରବୁ ଦୁଷ୍ଟନଡ଼୍‌ଆଗାଙ୍କ୍‌ ଜେକେ ମାନ୍‌ତଣ୍ଡ୍‌; ମେଣ୍ଡେ, ଦାର୍ମିକିଡ଼୍‌କନ୍‌ ପ୍ରାର୍ତନା ଅଣ୍ଡ୍‌ କେଞ୍ଜିତଣ୍ଡ୍‌ । 30 ମକମ୍‌ତେ ୱେସ୍‌ ମନତିଙ୍କ୍‌ ୱେଡ଼୍‌କେ ମାଡ଼ିତ୍‌; ମେଣ୍ଡେ, ସାୟେତ୍‌ କାବୁର୍‌ତେ ମେନ୍ଦୁଲ୍‌ତିଙ୍କ୍‌ ଢାଟାମ୍ ମାଡ଼ିତ୍‌ । 31 ବେନ୍‌ ନାରୁଣ୍ଡ୍‌ ଜିଉମାନ୍ଦାନ୍‌ ଶିକ୍ଷା କେଞ୍ଜିତଣ୍ଡ୍‌, ଅନ୍‌ ଜ୍ଞାନିଡ଼ାଗ୍‌ ବାସେ ମାଡ଼ିତଣ୍ଡ୍‌ । 32 ବେନ୍‌ ନାରୁଡ଼୍‌ ନିୟମ୍‌ ମାନେମ୍ ଆୟଣ୍ଡ୍‌, ଅଣ୍ଡ୍‌ ନିଜର ଜିଉତିଙ୍କ୍‌ ପାସ୍କିତଣ୍ଡ୍‌; ମାତର୍‌ ଶିକ୍ଷା ବେନ୍‌ କେଞ୍ଜିତଣ୍ଡ୍‌, ଅଣ୍ଡ୍‌ ସାୟେତ୍‌ ବୁଦ୍ଦ୍ ପାହେମ୍‌ ଆଦ୍‌ତଣ୍ଡ୍‌ । 33 ସଦାପ୍ରବୁନ୍‌ ବିଷୟ ୱେର୍‌ଦାନ୍‌ ଜ୍ଞାନ୍‌ତେ ଶିକ୍ଷା; ମେଣ୍ଡେ, ନମ୍ରତା ସନ୍‌ମାନ୍‌ତେ ମୁନେ ମାନ୍ତେ ।