1 ଜ୍ଞାନ ବାତେ କାର୍‌ଙ୍ଗ ? ବୁଦ୍ଦ୍ ବାତେ ଗାଟିଲେଙ୍ଗ୍‌ ମାଡ଼୍‌ ? 2 ଅଣ୍ଡ୍‌ ଆର୍‌ଦେ ଗାରେ ମାନ୍ଦାନ୍‌ ଡ଼େଙ୍ଗ୍‌ ପଡ଼୍‌ୟିତାଗ୍‌, ଆର୍‌ଦେ ସାରେ କାଇଲାନ୍‌ ପଡ଼୍‌ୟାନାଗ୍‌ ନିତିତଣ୍ଡ୍‌ । 3 ଅଣ୍ଡ୍‌ ନଗରତେ ଆର୍‌ଦେ ଗାର୍ରେ, ନଗରତେ ନେଙ୍ଗାନ୍‌ ପଡ଼୍‌ୟିତାଗ୍‌ ମାଞ୍ଜ୍‌ ଗାଟି ଲେଙ୍ଗ୍‌ଦେ କାର୍‌ର୍ଙ୍ଗି କେତିତଣ୍ଡ୍‌, 4 ହୋ ନାରୁନଡ଼ି, ନାନ୍‌ ମିକିଙ୍କ୍‌ କାର୍‌ଙ୍ଗୁତାନ୍‌; ମେଣ୍ଡେ, ନାରୁଣ୍ଡ୍‌ ପିଲାକିନ୍‌ ପର ନାୟାଦ୍‌ ଲେଙ୍ଗ୍‌ମିନ୍ଦେ । 5 ହୋ ମୁର୍କ ନାରୁଡ଼୍‌, ଜ୍ଞାନ୍‌ତେ ଗଟ୍‌ ବୁଜେମ୍‌ ଆୟିମୁଟ୍‌; ହୋ ମୁର୍କ ନାରୁଡ଼୍‌, ମିଡ଼୍‌ ସାୟେତ୍ ମାନ୍‌ତେ ନାରୁଡ଼୍‌ ଆୟିମୁଟ୍‌ । 6 କେଞ୍ଜାଟ୍‌, ବେଲାକି ନାନ୍‌ ଲପେତ୍‌ ବିଷୟ କେତିତାନ୍‌; ନାନ୍‌ ପାୟୁର୍‌ ଟେଣ୍ଡ୍‌କେ ନାର୍ଗେ ଗଟି କେତିତାନ୍‌ । 7 ବେଲାକି ନା ମକମ୍‌ ନିଜାମ୍‌ତେ କେତିତ୍‌, ଦୁଷ୍ଟତା ନା’ପାୟୁର୍‌ତାଦ୍‌ ପାସ୍କ୍‌କାନ୍‌ ବିଷୟ । 8 ନା’ପାୟୁର୍‌ତେ ସାରେ ସତ୍ ଗଟି କେତିତାନ୍‌; ଆଦିନାଗାକନ୍‌ ୱାଙ୍କ ବା କାରାପ୍‌ ବାତେ ଇଲେ । 9 ବେନ୍‌ ଆଦ୍‌ ବୁଜେମ୍‌ ଆଦ୍‌ତଣ୍ଡ୍‌, ଅନ୍‌ ପାକେ ଆୱୁସାରେ ଟିକ୍‌; ମେଣ୍ଡେ, ବିଦ୍ୟାପାହେମ୍ ଆତ୍‌ତେ ନାରୁଡ଼୍‌ ପର ଆଦ୍‌ ନାର୍ଗେ ଆଦ୍‌ତେ । 10 ରୁପା ତାଗାଙ୍କ୍‌ ନା ସାୟେତ୍‌ ଶିକ୍ଷା ନୁ ହେଞ୍ଚ୍‌ତେ ସୁନା ତାଗାଙ୍କ୍‌ ଜ୍ଞାନତିଙ୍କ୍‌ ହେଞ୍ଚାଟ୍‌ । 11 ବେଲାକି ଜ୍ଞାନ ବାଙ୍ଗ୍‌ରାମ୍‌କନ୍‌ ସାୟେ ନୁ ସାରେ ଇଚ୍ଛାତେ ସାମାନ୍‌ ତାନ୍‌ତଡ଼୍‌ ଲେକାମ୍‌ ଆଦାନଙ୍କ୍‌ ସାମାନ୍‌ ଆୟ । 12 ନା ଜ୍ଞାନ, ସତର୍କତାତିଙ୍କ୍‌ ନିଜେ ମାନ୍ଦାନ୍‌ ପାଡ଼ିୟ୍‌ ମାଡ଼ିମିନ୍ଦେନ୍‌, ମେଣ୍ଡେ, ଜ୍ଞାନ୍‌ ନୁ ନାଡ଼୍‌ସାନ୍‌ ସେଙ୍ଗେ ମାନ୍ତାନ୍‌ । 13 ସଦାପ୍ରବୁନ୍‌ ବିଷୟକିଙ୍କ୍‌ ୱେର୍‌ଦ୍‌ତାନ୍‌, କାରାପ୍‌ତେ ପର ପାସ୍କ୍‌କାନାଦ୍‌; ଅହଙ୍କାର୍‌, ଦାମ୍ଭିକତା ନୁ କାରାପ୍‌ ଆର୍‌ ନୁ ପେର୍ଲେ ଗଟିଙ୍କ୍‌ ନା ପାସ୍କିତାନ୍‌ । 14 ସାୟେତ୍‌ ଚିନ୍ତା ନୁ ଜ୍ଞାନ ନାୟାଗେ ମିନ୍ତେ; ନାନେ କେ ସାୟେତ୍ ଏର୍କେ; ନାୟାଗେ ବପୁ ମିନ୍ଦେ । 15 ନା’ତଡ଼୍‌ ରାଜାନ୍‌ ଶାସନ୍‌ ମାଡ଼ିତଡ଼୍‌ ନୁ ଶାସନ୍ କର୍ତ୍ତାନଡ଼୍‌ ସାୟେତ୍‌ ବିଚାର ମାଡ଼ିତଡ଼୍‌ । 16 ନା’ତଡ଼୍‌ ମୁକିୟାନଡ଼୍‌, କାରାପ୍‌ ନାରୁଡ଼୍‌ ନୁ ପୃତିବିତେ ସାରେ ବିଚାର୍‌କର୍ତ୍ତାନଡ଼୍‌ ଶାସନ ମାଡ଼ିତଡ଼୍‌ । 17 ବେନଡ଼୍‌ ନାକିଙ୍କ୍‌ ପ୍ରେମ ମାଡ଼ିତଡ଼୍‌, ନାନ୍‌ ଅଡ଼୍‌କିଙ୍କ୍‌ ପ୍ରେମ ମାଡ଼ିତ୍‌, ମେଣ୍ଡେ ବେନଡ଼୍‌ ଯତନ୍‌ତେ ନାକିଙ୍କ୍‌ ମେଃକିତଡ଼୍‌, ଅଡ଼୍‌ ନାକିଙ୍କ୍‌ ପାହେମ୍‌ ଆଦ୍‌ତଡ଼୍‌ । 18 ନାୟାଗ୍‌କନ୍‌ ଦନ ନୁ ସନ୍‌ମାନ୍‌, ମେଣ୍ଡେ, ତେର୍‌ୱାଦ୍‌ ସମ୍ଫତ୍ତି ନୁ ଦାର୍ମିକ୍‌ତାଦ୍‌ ମିନ୍ଦେ । 19 ନାୟାଦ୍‌ କାୟେ ସୁନାତାଦ୍‌, ସାୟେ ସୁନାତାଗାଙ୍କ୍‌ ଲେକେତାଦ୍‌; ମେଣ୍ଡେ, ନା ବାଦ୍‌କାନାଦ୍‌ ସାୟେ ରୁପା ତାଗାଙ୍କ୍‌ ଲେକେତ୍‌ । 20 ନାନ୍‌ ଦାର୍ମିକ୍‌ତେ ଆର୍‌ଦାଗ୍‌, ବିଚାର୍‌ତେ ଆର୍‌ଦାଗ୍‌ ବା ଆଦ୍‌ତାନ୍‌, 21 ମେଣ୍ଡେ ବେନଡ଼୍‌ ନାକିଙ୍କ୍‌ ପ୍ରେମ ମାଡ଼ିତଡ଼୍‌, ଅଡ଼୍‌କିଙ୍କ୍‌ ସାରେ ସମ୍ଫତ୍ତିତେ ଅଦିକାରି ମାଡ଼ିତାନ୍‌ ନୁ ଅଡ଼୍‌ ଲତ୍‌ତିଙ୍କ୍‌ ଦନ୍‌ ସମ୍ପତିତଡ଼୍‌ ନିଃତିତାନ୍‌; 22 ସଦାପ୍ରବୁ ନିଜେତ୍‌ ଆଦାନାଦ୍‌ ଆରାମ୍‌ତେ, ଅନ୍‌ ପାଡ଼୍‌ୟିସାରେ ମୁନେଙ୍କ୍‌ ନାକିଙ୍କ୍‌ ତିଆର୍‌ ମାଡ଼ିମାତ୍‌ତଣ୍ଡ୍‌ । 23 ମୁନେତ୍‌କାଲାତେ ବା ମୁନେନ୍‌କଞ୍ଜ୍‌ ବା ପୃତିବି ତିଆର୍‌ତେ ମୁନେକଞ୍ଜ୍‌ ନାନ୍‌ ତିଆର୍‌ତେ ମିନ୍ଦେନ୍‌ । 24 ବାତେ ଇଲ୍‌ୱେ ସମୟତେ, ଇଲ୍‌କାସାରେ ଏର୍‌ ନିଣ୍ଡ୍‌ୱେ ସମୟତେ ନାନ୍‌ ଜନମ୍‌ ଆସ୍‌ମିନ୍ଦେନ୍‌; 25 ମେଣ୍ଡେ, ମେଟାକି ନୁ ବେଡ଼ିୟେ ମେଟା ତିଆର୍ ଆଦାନ୍ ମୁନେ ନାନ୍‌ ଜନମ୍‌ ଆସମିନ୍ଦେନ୍‌; 26 ଆ ସମୟତେ ବୁମ୍‌, କି ବାଟ୍‌, କି ଜଗତ୍‌ତେ ଦୁମ୍‌ଦେ ଗୁଣ୍ଡାଲ୍‌ ଅଣ୍ଡ୍‌ ତିଆର ମାଡ଼୍‌ୱେ ମାତ୍‌ତଣ୍ଡ୍‌ । 27 ବେନ୍‌ ସମୟତେ ଅଣ୍ଡ ମାବ୍‌ମୟଲ୍‌ ତିଆର ମାଡ଼୍‌ତଣ୍ଡ, ଆ ସମୟତେ ନାନେ ଆଗେ ମାତ୍‌ତାନ୍‌, ବେନ୍‌ ସମୟତେ ଆଦ୍‌ ଆଦ୍‌ ସମୁଦ୍ରତେ ଗଲ୍‌ତାଦ୍‌ ସିମା ତିଆର୍‌ ମାଡ଼୍‌ତଣ୍ଡ୍‌, 28 ମେଣ୍ଡେ ପରତ୍‌ ମାବ୍ ମୟଲ୍‌ତିଙ୍କ୍‌ ଢାଟାମ୍‌ ମାଡ଼୍‌ତଣ୍ଡ୍‌ ନୁ ସମୁଦ୍ରତେ ଲପେତ୍ ପଡ଼ିୟେକଞ୍ଜ୍‌ ଇଡ଼୍‌ପାମ୍‌ ଏର୍ ପେୟିତ୍‌ତେ; 29 ଏର୍‌ମାନ୍ଦାନାଦ୍‌ ବେଲାନେ ଅନ୍‌ ଆଦେଶ୍‌ ପାଲନ୍ ମାଡ଼େ ପାରୱ, ଇଦିନ୍‌ ମାଇଦିଙ୍କ୍‌ ବେନ୍‌ ସମୟତେ ଅଣ୍ଡ୍‌ ସମୁଦ୍ରତେ ସିମା ତିଆର ମାଡ଼୍‌ତଣ୍ଡ୍‌ ନୁ ବେନ୍‌ ସମୟତେ ପୃତିବିତେ ପାଣ୍ଡେସନ୍‌ ଚିହ୍ନେ ମାଡ଼୍‌ତଣ୍ଡ୍‌; 30 ଆ ସମୟତେ ନାନ୍‌ ଅନ୍‌ ଗାରେ ପାଡ଼ିୟ୍‌ ମାଡ଼ାନନ୍‌ ମାତ୍‌ତାନ୍‌; ମେଣ୍ଡେ, ନାନ୍‌ ସାରେଦିନା ୱେଡ଼୍‌କେତନ୍‌ ଆସ୍‌ ଅନ୍‌ ମୁନେ ସାରେଦାମ୍‌ ୱେଡ଼୍‌କେ ମାଡ଼୍‌ତାନ୍‌ । 31 ମେଣ୍ଡେ, ଅନ୍‌ ପୃତିବିତାଗ୍‌ ୱେଡ଼୍‌କେ ମାଡ଼୍‌ତାନ୍‌ ନୁ ନାରୁଣ୍ଡ୍‌ ପିଲାକିନ୍‌ତଡ଼୍‌ ନାୟାଦ୍‌ ୱେଡ଼୍‌କେ ମାତ୍‌ତେ । 32 ଇଦିନ୍‌ ମାଇଦିଙ୍କ୍‌ ହୋ ନା ମାର୍କିନଡ଼ି, ନା ବାକ୍ୟ କେଞ୍ଜେ, ବେଲାକି ବେନ୍‌ ନା ଆର୍‌ ପୟିତଡ଼୍‌, ଅଡ଼୍‌ ଦନ୍ୟ । 33 ଶିକ୍ଷା କେଞ୍ଜି ଜ୍ଞାନବାନ ଆୟିମୁଟ୍‌; ମେଣ୍ଡେ, ଆଦିଙ୍କ୍‌ କେଞ୍ଜ୍‌ୱେ ଲେକାମ୍ ଆୟିମାଟ୍‌ । 34 ବେନ ନା’ଗଟି କେଞ୍ଜିତଣ୍ଡ୍‌ ନୁ ନା’ଗାରେ ସାରେଦାମ୍ କେପି ମାନ୍ଦ୍‌ତଣ୍ଡ୍, ନା’ତଡ଼୍ ଆର୍‌ବନ୍ଦ୍‌ ଗାରେ ମେଃକିତଣ୍ଡ୍‌, ଆ ନାରୁଣ୍ଡ୍‌ ଦନ୍ୟ । 35 ବେଲାକି ବେନ ନାକିଙ୍କ୍‌ ପାହେମ୍‌ ଆଦ୍‌ତଣ୍ଡ୍, ଅଣ୍ଡ୍‌ ଜିୱୁନ୍‌ ପାଏମ୍‌ ଆଦ୍‌ତଣ୍ଡ୍ ନୁ ସଦାପ୍ରବୁନ୍‌ ଆଶିର୍ବାଦ୍‌ ପାହେମ୍‌ ଆଦ୍‌ତଣ୍ଡ୍‌ । 36 ମାତର୍‌ ବେନ ନା’ବିରୁଦ୍ଦ୍‌ତେ ପାପ ମାଡ଼ିତଣ୍ଡ, ଅଣ୍ଡ ନିଜର ଜିୱୁତିଙ୍କ୍ ନଷ୍ଟ ମାଡ଼ିତଣ୍ଡ; ବେନ୍‌ ସାରେ ନାରୁଡ଼୍‌ ନାକିଙ୍କ୍‌ ପାସ୍କିତଡ଼୍‌, ଅଡ଼୍‌ ଡଲାନାଦିଙ୍କ୍‌ ବଲ୍‌ ପାହେମ୍‌ ଆଦ୍‌ତଡ଼୍‌ ।