1 ପାର୍‌ତୁମ୍‌ ମାପୁରୁ ମୁସ୍‌କୁପୁର୍‌ ନି ଆଡ୍‌ଗିପୁର୍‌ ତିଆର୍‌ କିତାନ୍‌ । 2 ଦୁନିଆ ସୁନ୍‌ସାନ୍‌ ମାରି ଇନିକାବା ସିଲେତାତ୍‌, ମାରି ନାଣ୍ତ ଗୁମି ଏରୁ ମୁସୁକୁ ସିକାଟି ମାର୍ହାତ୍‌; ମାରି ମାପୁରୁଦି ଆତ୍ମା ଏରୁ ମୁସୁକୁ ତେବାତା ମାର୍ହାତ୍‌ । 3 ମାରି ମାପୁରୁ ଆଦେସ୍‌ ସିତାନ୍‌, "ଜାୟ୍‌ ଆପିତ୍," ଆବେଟ୍‍କୁ ଜାୟ୍‌ ଆତାତ୍ । 4 ମାରି ମାପୁରୁ ଜାୟ୍‌ତିଙ୍ଗ୍‌ ସୁଡ଼ୁତାନ୍‌ ଜେ ଆକା ନେଗିକା; ଆବେଟ୍‍କୁ ମାପୁରୁ ସିକାଟିଦି ମାଣାନ୍‍ ଜାୟ୍‌ତିଙ୍ଗ୍‌ ୱେରେଏ କିତାନ୍‌ 5 ମାରି, ମାପୁରୁ ଜାୟ୍‌ତି ଦରୁ ୱେଡ଼େ ମାରି ସିକାଟିଦି ଦରୁ ନାଡ଼ା ସିତାନ୍‌ । ଆବେଟ୍ ନାଡ଼ା ମାରି ୱେଡ଼େ ଆଜି ପାର୍‌ତୁମ୍‌ ଦିନ୍‌ ଆତାତ୍ ।

6 ତାନିୱେନ୍‌କା ମାପୁରୁ ଇର୍ହାନ୍‌, "ଏରୁ ଲୋଇ ଇନିକାବା ସିଲେଣ୍‌ଗା ଆଜି ଏରୁଦିଙ୍ଗ୍ ରୁଣ୍ତି ବାଗ୍‌ତାନ୍‌ ୱେର୍‌ଏ ଆପିତ୍‌ ।" 7 ଇୟାୱାଜା ମାପୁରୁ ଇନିକାବା ସିଲେଣ୍‌ଗା ତିଆର୍ କିଜି ଇନିକାବା ସିଲି ବାଦଡ଼ତି ମୁସୁକୁରି ଏରୁଦାନ୍‌ ଇନିକାବା ସିଲି ଆଡ୍‌ଗିରି ଏରୁଦିଙ୍ଗ୍‌ ୱେରେଏ କିତାନ୍; ଆବେଟ୍ ଆୟାୱାଜା ଆତାତ୍ । 8 ମାରି ମାପୁରୁ ଆୟା ଇନିକାବା ସିଲି ଦରୁ ବାଦଡ଼୍‌ ସିତାନ୍‌ । ମାରି, ମିଲ୍‌ମିଲିକାନି ମାରି ସାଲ୍‌ଦି ଆଜି ରିନେନ୍ ଆତାତ୍ ।

9 ତାନିୱେନ୍‌କା ମାପୁରୁ ଇର୍ହାନ୍‌, "ବାଦଡ଼ତି ଆଡ୍‌ଗିରି ୱିଜୁ ଏରୁ ଉଣ୍ତ୍ରି ବାଡିଦୁ ଉଣ୍ତାପିୟ୍ ମାରି ବୁମି ଆପିତ୍‌," ଆବେଟ୍ ଆୟାୱାଜା ଆତାତ୍ । 10 ମାରି ମାପୁରୁ ବୁମିଦି ଦରୁ ଦୁନିଆ ମାରି ଏରୁଦିଙ୍ଗ୍ ସାମୁଦୁର୍‌ ସିତାନ୍‌; ମାରି ମାପୁରୁ ଆକା ନେଗେନ୍‌ କିଜି ସୁଡ଼ୁତାନ୍‌ । 11 ଆବେଟ୍‌ ମାପୁରୁ ଇର୍ହାନ୍‌, "ଦୁନିଆଦୁ ଲାଟା ମାରି ପାଡ଼ୁକୁ ଆସ୍‌ନି ଇସ୍ରି ମାରାକ୍‌ ମାରି ୱିଜୁ ନିଜେ ନିଜେ ଜାତି ଇସାବ୍‌ତାନ୍‌ ପଲ୍‌ ଆନି ମାରାକ୍‌ ବୁମି ମୁସୁକୁ ଜନମ୍‌ ଆପିୟି," ଆବେଟ୍ ଆୟାୱାଜା ଆତାତ୍ । 12 ଅର୍ତାତ୍, ଦୁନିଆଦୁ ଲାଟା ମାରି ଆଇଆଇ ରକମ୍‌ତି ଇସାପ୍‍ତାନ୍ ପାଡ଼ୁକୁ ଆସ୍‌ନି ମାରାନ୍‌ ମାରି ଆଇଆଇ ଜାତି ଇସାପ୍‍ତାନ୍ ପଲ୍‌ ଆସ୍‌ନି ମାରାନ୍‌ ଜନମ୍‌ ଆତେ; ମାରି ମାପୁରୁ ଆକା ନେଗିକା ସୁଡ଼ୁତାନ୍‌ । 13 ଆବେଟ୍‌ ମିଲ୍‌ମିଲିକା ମାରି ସାଲ୍‌ଦି ଆଜି ମୁଣ୍ତିରିଦିନ୍‌ ଆତାତ୍ ।

14 ତେନିୱେନ୍‌କା ମାପୁରୁ ଇର୍ହାନ୍‌, "ନାଡ଼ା ନି ୱେଡ଼ାଦିଙ୍ଗ୍‌ ୱେର୍‍ଏ କିନି ଉଣ୍ତିଙ୍ଗ୍‌ ବାଦଡ଼ତୁ ଜାୟ୍‌ସିନିକେଙ୍ଗ୍ ତିଆର୍ ଆପିୟି; ମାରି, ଆୟାୱିଜୁ ସିନା, କାଡ଼ା ମାରି ଦିନ୍‌ ମାରି ବାର୍ସୁଦି ମାଟା ଆପିତ୍‌ । 15 ମାରି ଦୁନିଆଦୁ ଜାୟ୍‌ ସିନି ଉଣ୍ତିଙ୍ଗ୍‌ ବାଦଡ଼ତି ମୁସୁକୁ ଆୟା ଜାୟ୍‌ସିନିକେଙ୍ଗ୍‌ ମାନିୱି," ଆବେଟ୍‌କୁ ଆୟାୱାଜା ଆତାତ୍ । 16 ଇୟାୱାଜା ମାପୁରୁ ୱେଡ଼େ ସାଲାକିଦେଙ୍ଗ୍‌ ଉଣ୍ତ୍ରି ପେରି ଜାୟ୍‌; ମାରି ନାଡ଼ାଦିଙ୍ଗ୍ ସାଲାକିଦେଙ୍ଗ୍‌ ତାନିମାଡ଼ାନ୍ ଇସ୍ରି ଉଣ୍ତ୍ରି ଜାୟ୍‌, ଇୟା ରୁଣ୍ତି ପେରି ଜାୟ୍‌, ମାରିବା ସୁକେଙ୍ଗ୍‌ ତିଆର୍ କିତାନ୍‌ । 17 ଆବେଟ୍‌ତାନ୍‌ ଦୁନିଆଦୁ ଜାୟ୍‌ ଆନି ଉଣ୍ତିଙ୍ଗ୍‌ ମାରି ୱେଡ଼େ ନି ନାଡ଼ା ମୁସୁକୁ ସାଲାକିନି ଉଣ୍ତିଙ୍ଗ୍‌, 18 ମାରି ଜାୟ୍‌ତିଙ୍ଗ୍‌ ସିକାଟିଦାନ୍‌ ୱେରେଏ କିନି ଉଣ୍ତିଙ୍ଗ୍‌, ମାପୁରୁ ବାଦଡ଼୍‌ତୁ ଆୟା ଜାୟ୍‌ସିନିକା ତିଆର୍ କିତାନ୍‌; ମାରି ମାପୁରୁ ଇୟାୱିଜୁ ନେଗେନ୍‌ତାନ୍ ସୁଡ଼ୁତାନ୍‌ । 19 ଆବେଟ୍‍କୁ ମିଲ୍‌ମିଲିକା ନି ସାଲ୍‌ଦି ଆଜି ନାଲିଗି ଦିନ୍‌ ଆତାତ୍ ।

20 ତାନିୱେନ୍‌କା ମାପୁରୁ ଇର୍ହାନ୍‌, "ଏରୁ ନାଣ୍ତ ଦାନ୍ ନାଣ୍ତ ଆପିୟି ଜିବନ୍‌ମାନି ଜାତୁଙ୍ଗୁ ଜନମ୍‌ ଆପିୟି ମାରି ଦୁନିଆଦି ମୁସୁକୁ ବାଦଡ଼ଦୁ ପଟିଙ୍ଗ୍‌ ଇମିୟ୍‌ ।" 21 ମାରି ମାପୁରୁ ନାଣ୍ତପେରି ତିମି ମିନ୍‌କୁ ୱିଜୁ ମାରି ଆଇଆଇ ଜାତି ଇସାପ୍‍ତାନ୍ ନାଣ୍ତଦାନ୍‌ ନାଣ୍ତ ଏର୍‌ତୁ ଜିନି ଜାତୁଙ୍ଗ୍‌ ମାରି ଆଇଆଇ ରକମ୍‌ତି ପଟିଙ୍ଗ୍ ତିଆର୍‌ କିତାନ୍ । ମାପୁରୁ ଇୟାୱିଜୁ ନେଗିକା ସୁଡ଼ୁତାନ୍‌ । 22 ମାରି, ମାପୁରୁ ୱାରିଙ୍ଗ୍ ଆର୍ସିବାଦ୍‌ କିଜି ଇର୍ହାନ୍‌, "ବେଲିଆଜି ମାରି ନାଣ୍ତ ଆଜି ସାମ୍‌ଦୁର୍‌ ଏରୁ ପୁରା ବର୍ତି କିପିୟ୍‌, ମାରି ଦୁନିଆଦୁ ପଟିଙ୍ଗ୍ ୱିଜୁ ନାଣ୍ତ ଆପିୟି ।" 23 ଆବେଟ୍ ମିଲ୍‌ମିଲିକା ନି ସାଲ୍‌ଦି ଆଜି ପାସ୍‌ଦିନ୍ ଆତାତ୍ ।

24 ତାନିୱେନ୍‌କା ମାପୁରୁ ଇର୍ହାନ୍‌, "ଦୁନିଆଦୁ ଆଇଆଇ ଜାତି ଇସାପ୍‍ତାନ୍‌ ଜାତୁ ମାନ୍ଦା ଅର୍ତାତ୍, ନାଟ ପସାକିନି ଜାତୁ ମାରି ଉଜ୍‌ନି ଜାତୁ ମାରି ଆଇଆଇ ଜାତି ଇସାପ୍‍ତାନ୍‌ ଦୁନିଆଦି ବନ୍‌ ଜାତୁଙ୍ଗ୍‌ ଜନମ୍‌ ଆପିୟି," ଆବେଟ୍ ଆୟାୱାଜା ଆତାତ୍ । 25 ଇୟାୱାଜା ମାପୁରୁ ନିଜେ ନିଜେ ଜାତି ଇସାପ୍‍ତାନ୍ ବନ୍‌ଜାତୁଙ୍ଗ୍ ମାରି ନିଜେ ନିଜେ ଜାତି ଇସାପ୍‍ତାନ୍ ନାଟ ପସାକିନି ଜାତୁଙ୍ଗ୍ ମାରି ନିଜେ ନିଜେ ଜାତି ଇସାପ୍‍ତାନ୍‌ ୱିଜୁନେ ବୁମିଦୁ ଉଜ୍‌ନି ଜାତୁ ତିଆର୍‌ କିତାନ୍‌; ମାରି ମାପୁରୁ ଆୟାୱିଜୁ ନେଗେନ୍ ସୁଡ଼ୁତାନ୍‌ ।

26 ଇୟାୱେନ୍‌କା ମାପୁରୁ ଇର୍ହାନ୍‌, "ନାନୁ ନିଜେଦି ରୁପ୍‍ତାନ୍‌ ମାରି ନିଜେଦି ୱାଜା ଲୋକ୍‍ତିଙ୍ଗ୍‌ ତିଆର୍‌ କିନା । ୱାର୍ ଏରୁଦୁ ମାନି ମିନୁକୁ ମାରି ନାଣ୍ତପଟିଙ୍ଗ୍‌ ମାରି ୱିଜୁ ଦୁନିଆ ମାରି ବୁମିଦୁ ବୁଲାସାଲାନି ୱିଜୁ ଉଜ୍‌ନି ଜାତୁ ମୁସୁକୁ ସାଲାକିନାନ୍‌ ।" 27 ତାନିୱେନ୍‌କା ମାପୁରୁ ନିଜେଦି ରୁପ୍‍ତି ୱାଜା ଲୋକ୍‌ତିଙ୍ଗ୍‌ ତିଆର୍ କିତାନ୍‌; ମାପୁରୁଦି ରୁପ୍‍ତାନ୍‌ ୱାନ୍ ୱାନିଙ୍ଗ୍ ତିଆର୍ କିତାନ୍; ମେମାର୍‌ଏନ୍‌ ନି ଆଇମା କିଜି ୱାନ୍ ୱାରିଙ୍ଗ୍ ତିଆର୍ କିତାନ୍ । 28 ମାରି ମାପୁରୁ ୱାରିଙ୍ଗ୍‌ ଆର୍ସିବାଦ୍‌ କିତାନ୍; ମାରି, ମାପୁରୁ ୱାରିଙ୍ଗ୍ ଇର୍ହାନ୍‌, "ବେଲିଆଜି ମାରି ପେରି କୁଟୁମ୍‌ ଆଦୁ, ମାରି, ଦୁନିଆଦିଙ୍ଗ୍‌ ପୁରାବର୍ତି କିଜି ସାଲାକିଦୁ, ମାରି ଏରୁଦୁ ମାନି ମିନୁକୁ ମାରି ନାଣ୍ତପଟିଙ୍ଗ୍‌ ମାରି ବୁମିଦୁ ମାନି ଉଜ୍‌ନି ଜାନ୍ତୁକା ମୁସୁକୁ ସାସନ୍‌ କିଦୁ ।" 29 ମାପୁରୁ ମାରି ଇର୍ହାନ୍‌, "ସୁଡ଼ୁଦୁ, ନାନୁ ବୁମିଦୁ ମାନି ୱିଜୁ ରକମ୍‌ତି କୁସାପୁଲା ମାରି ୱିଜୁ ପଲ୍‌ ଆସ୍‍ନି ମାରାକ୍‌ ମିଙ୍ଗିଁ ସିତାପ୍, ଆକା ମି କାଦି ଆନାତ୍ । 30 ମାରି, ଦୁନିଆଦି ୱିଜୁ ଜାନ୍ତୁ ମାରି ନାଣ୍ତ ପଟିଙ୍ଗ୍‌ ମାରି ବୁମିଦୁ ଉଜ୍‌ନି ଜାତୁଙ୍ଗ୍‌, ଇୟାୱିଜୁ ଜାତୁଙ୍ଗାଁ କାଦି ଉଣ୍ତିଙ୍ଗ୍‌ ମାପ୍‌ ୱିଜୁ ପାସ୍‌ରିକା ଲାଟା ସିତାପ୍," ଆବେଟ୍ ଆୟାୱାଜା ଆତାତ୍ । 31 ମାପୁରୁ ନିଜେ ତିଆର୍‌ କିତି ୱିଜୁ ଜିନିସ୍‌ ତରିନ୍‌ ସୁଡ଼ୁତାନ୍‌, ମାରି ସୁଡ଼ୁଦୁ, ୱିଜୁ ଅଦିକ୍‌ ନେଗିକା ଆତାତ୍‌, ଆବେଟ୍‌ତାନ୍‌ ମିଲ୍‌ମିଲିକା ନି ସାଲ୍‌ଦି ଆଜି ସଅ ଦିନ୍‌ ଆତାତ୍ ।