1 ତାନିୱେନେକା ଇସ୍‍ହାକ୍ ଡକରା ଆତାନ୍‌ଆକା, କାଣୁକୁ ସୁଣି ସାକ୍ତି ଉଣା ଆତାତ୍‌ଆକା ମାରି ସୁଡ଼ୁଦେଙ୍ଗ୍‌ ଆଟ୍‍ଏତାନ୍; ନାସ୍ତିୱାଲେ ୱାନ୍ ନିଜେଦି ପେରିମାରିନ୍‌ ଏସୌଙ୍ଗ୍ କୁକ୍‍ସି ଇର୍ହାନ୍‌, "ମାରିନ୍‌," ଆବେଟ୍ ୱାନ୍‌ ଇର୍ହାନ୍‌, "ସୁଡ଼ୁଆ, ନାନୁ ଇବେନୁ ।"

2 ଆବେଟ୍ ୱାନ୍‌ ୱାନିଙ୍ଗ୍‌ ଇର୍ହାନ୍‌, "ସୁଡ଼ୁଆ, ନାନୁ ଡକରା ଆତା, ଏମେନାଣ୍ତିଙ୍ଗ୍ ନା ସାନିକା ୱାନାତ୍, ଆକା ନାନୁ ନେସ୍‍ଏ ।" 3 ଇଲେଇ ଇଜିନା, "ନିନୁ ଇନିଙ୍ଗାଁ ଆନିଙ୍ଗାଁ ଦନୁକାତି ଆସ୍‌ସୋ ଗରନ୍‌ତୁ ସାଙ୍ଗ୍‍ଆ । ମାରି ନା ଉଣ୍ତିଙ୍ଗ୍‌ ବନ୍‍ଗରିଆ ଡାକ୍‌ସୋ ତାଗା । 4 ମାରି, ନାନୁ ଏଣ୍ତେସ୍ କାଦିଦିଙ୍ଗ୍‌ ଜିବନ୍‌ ନୋନା, ଆୟାୱାଜା ସାୱି କାଦି ୱାର୍‌ଜୋ ଉଣି ଉଣ୍ତିଙ୍ଗ୍‌ ନା ଲାକୁତୁ ତାଗା; ଆବେଟ୍ ନା ଜିବନ୍‌ ସାନି ଆଗ୍‌ଡ଼ି ନିଙ୍ଗିଁ ଆର୍ସିବାଦ୍‌ କିନା ।"

5 ଇସ୍‍ହାକ୍ ନିଜେଦି ମାରିନ୍‌ ଏସୌଙ୍ଗ୍‌ ଇୟା ମାଟା ଇନିୱାଲେ ରିବିକା ୱେରାତ୍ । ଆବେଟ୍ ଏସୌ ବନଗରିଆ କାଣ୍ତା ତାନି ଉଣ୍ତିଙ୍ଗ୍‌ ବନ୍‌ଦୁ ସ‌ରି ୱେନେକା, 6 ରିବିକା ନିଜେଦି ମାରିନ୍‌ ଜାକୁବଙ୍ଗ ଇର୍ହାତ୍‌, "ସୁଡ଼ୁଆ, ନି ତୋଡ଼ାନ୍ ଏସୌ ମି ବୁବାଦି ୱାଲେ ୱାର୍‌ଗିନିକା ନାନୁ ୱେର୍ହା, 7 ୱାନ୍ ୱାନିଙ୍ଗ୍ ଇର୍ହାନ୍‌, ନିନୁ ନା ଉଣ୍ତିଙ୍ଗ୍‌ ବନ୍‍ଗରିଆ କାଣ୍ତା ତାସି ମା ଉଣ୍ତିଙ୍ଗ୍‌ ସାୱିଦାନ୍‌ ୱାର୍‌ଜି ସିଦା, ଆବେଟ୍ ମାପୁ ଉଣିଜି ତିନିଜି ସାନି ଆଗ୍‌ଡ଼ି ପ୍ରବୁଦି ଆଗ୍‌ଡ଼ି ନିଙ୍ଗିଁ ଆର୍ସିବାଦ୍‌ କିନାପ୍ । 8 ଇୟାଉଣ୍ତିଙ୍ଗ୍, ମାରିନ୍‌, ଇଲେଇ ନାନୁ ନିଙ୍ଗିଁ ଏମେ ମାଟା ଇଜିନା, ନା ଆୟା ମାଟା ୱେନ୍‌ଆ । 9 ନିନୁ ଇଲେଇ ଗୋଟାନ୍‍ତୁ ସାଙ୍ଗ୍‍ଆ ଆବେନୁ ରୁଣ୍ତି ପତୁ ଗରିଆ ପିଲେକ୍‌ ତାଗା; ଆବେଟ୍ ମି ବୁବା ଏଣ୍ତେସ୍ ଜିବନ୍‌ ନନାନ୍, ଆୟାୱାଜା ସାୱି କାଦି କିଜି ନାନୁ ୱାର୍‍ନା ସିନା । 10 ନିନୁ ଆକା ଆସ୍‌ସି ବୁବାଦି ଲାକୁତୁ ସାଙ୍ଗ୍‍ଆ; ଆବେଟ୍ ୱାନ୍ ଆକା ଉଣିଜି ୱିସ୍‍ସି ସାନି ଆଗିଡ଼ି ନିଙ୍ଗିଁ ଆର୍ସିବାଦ୍‌ କିନାନ୍‌ ।"

11 ନାସ୍ତିୱାଲେ ଜାକୁବ ନିଜେଦି ୟାୟା ରିବିକେଙ୍ଗ୍‌ ଇର୍ହାନ୍‌, "ସୁଡ଼ୁଆ, ନା ଦାଦା ଏସୌ ମେନ୍ଦଲ୍‌ତୁ ବୁରୁବୁସେଙ୍ଗ୍‌ ମାନେ, ମାତର୍‌ ନା ମେନ୍ଦଲ୍‌ତୁ ବୁର୍‌ବୁସେଙ୍ଗ୍‌ ସିଲୁ । 12 ଜଦି ବୁବା ଜଦି ନାଙ୍ଗିଁ ମୁଟ୍‍ନାନ୍, ନାସ୍ତିୱାଲେ ନାନୁ ୱାନି ଆଗ୍‌ଡ଼ି ଟକୁଆ ତୋର୍‍ନା; ଆର୍‌ତିଙ୍ଗ୍‌ ନାନୁ ନିଜେ ମୁସୁକୁ ଆର୍ସିବାଦ୍‌ ତେଏଜି ଅବିସାପ୍ ତାନା ।"

13 ମାତର୍‌ ୱାନି ୟାୟା ଇର୍ହାତ୍‌, "ମାରିନ୍‌, ଆୟା ଆନାଦୁରିଆ ନାଙ୍ଗିଁ ଗଟାପିତ୍‌, କେବଲ ନିନୁ ନା ମାଟା ମାନାଆ ମାରି ସଲ୍‌ସି ଗରିଆପିଲା ତାଗା ।" 14 ଆବେଟ୍ ଜାକୁବ ସଲ୍‌ସି ଆକା ଆସ୍‌ସି ୟାୟା ଲାକୁତୁ ତାତାନ୍, ଆଇସି ୱାନି ବୁବାସି ବଦାଦି ଇସାପ୍‍ତାନ୍‌ ସାୱି କିଜି ୱାର୍‍ତାତ୍ । 15 ଆବେଟ୍‌ ରିବିକା ଇନ୍‌ଡ୍ର ନିଜେଦି ଲାକୁତୁ ପେରିମାରିନ୍‌ ଏସୌଦି ମାନୁ ନେଗି ଆଙ୍ଗିଁ ତାସି ଇସ୍ରି କଡ଼ ଜାକୁବଙ୍ଗ୍ ଆରିସ୍‌ତାତ୍‌ । 16 ମାରି ଗରିଆପିଲାଦି ତଲୁ ଆସ୍‌ସି ୱାନି କିୟୁଦୁ ମାରି କକ୍‍ଲାଦି ବୁର୍‌ବୁସେଙ୍ଗ୍‌ ସିଲି ବାଡିଦୁ ପିଡ଼ିକ୍‌ତା ସିତାତ୍ । 17 ମାରି ଆୟା ୱାର୍‌ତି ସାୱି କାଦି ମାରି ରୋଟି ଜାକୁବଦି କିୟୁଦୁ ସିତାତ୍ ।

18 ଆବେଟ୍ ଜାକୁବ ନିଜେଦି ବୁବା ଲାକୁତୁ ସର୍ହା ଇର୍ହାନ୍‌, "ବୁବା," ୱାନ୍ ଇର୍ହାନ୍‌, "ସୁଡ଼ୁଆ, ନାନୁ ଇବେନୁ ମାରିନ୍‌, ନିନୁ ଏନୁ ?"

19 ଜାକୁବ ନିଜେଦି ବୁବେଙ୍ଗ୍ ଇର୍ହାନ୍‌, "ନାନୁ ନି ପେରିମାରିନ୍‌ ଏସୌ; ନିନୁ ଏମେ ମାଟା ଇର୍ହିମାର୍ହି, ନାନୁ ଆକା କିତାମାନା," ଇଲେଇ ଇଜିନା, "ନିନୁ ନିଙ୍ଗ୍‍ଆ, ମାରି ବାସ୍‍ସି ନା ବନଗରିଆ କାଣ୍ତା ତିନ୍‍ଆ, ତାନି ୱେନେକା ନିନୁ ନାଙ୍ଗିଁ ଆର୍ସିବାଦ୍‌ କିଆ ।"

20 ଆବେଟ୍ ଇସ୍‍ହାକ୍ ନିଜେଦି ମାରିନ୍‌ତିଙ୍ଗ୍‌ ଇର୍ହାନ୍‌, "ମାରିନ୍‌, ନିନୁ ନିସ ଦାପେ ଆକା ଏଣ୍ତେସ୍ ପୋଇତି ?"

ୱାନ୍ ଇର୍ହାନ୍‌, "ମି ପ୍ରବୁ ମାପୁରୁ ନାଙ୍ଗିଁ ଆକା ବେଟ୍‍ କିତାସିତାନ୍ ।"

21 ଇସ୍‍ହାକ୍ ଜାକୁବଙ୍ଗ ଇର୍ହାନ୍‌, "ମାରିନ୍‌ ନା ଲାକୁତୁ ରାଆ, ନିନୁ ସତେନେ ନା ମାରିନ୍‌ ଏସୌ ନ ସିଲେ, ନିଙ୍ଗିଁ ମୁଟ୍‍ନା ନେସ୍‍ନା ।" 22 ଆବେଟ୍ ଜାକୁବ ନିଜେଦି ବୁବା ଇସ୍‍ହାକଦି ଲାକୁତୁ ସରାନ୍, "ୱାନ୍ ଆକା ମୁଟ୍‍ସି ଇର୍ହାନ୍‌, ଇୟା ବଲୁ ଜାକୁବଦି ବଲୁ, ମାତର୍‌ ଇୟା କିୟୁ ଏସୌଦି କିୟୁ ଇକା ।" 23 ଇୟାୱାଜା ୱାନ୍ ୱାନିଙ୍ଗ୍‌ ସିନିସ୍‌ତେଙ୍ଗ୍ ଆଟ୍‍ଏତାନ୍, ଏଣ୍ତେସ୍ ୱାନ୍ ନିଜେଦି ମାରିନ୍‌ ଏସୌଦି କିୟୁ ୱାଜା ନିଜେଦି କିୟୁ ବୁରୁବୁସେଙ୍ଗ୍ କିତାମାର୍ହାନ୍‌; ଆଦେଙ୍ଗ୍ ୱାନ୍ ୱାନିଙ୍ଗ୍ ଆର୍ସିବାଦ୍‌ କିତାନ୍ । 24 ତାନିୱେନେକା ଇସ୍‌ହାକ ମାରି ୱେନ୍‌ବାତାନ୍‌, "ନିନୁ ଇନିକା ସତେନେ ନା ମାରିନ୍‌ ଏସୌ ?" ୱାନ୍ ଇର୍ହାନ୍‌, "ହୁଁ, ନାନୁ ନେ ।"

25 ନାସ୍ତିୱାଲେ ଇସ୍‍ହାକ୍ ଇର୍ହାନ୍‌, ଆକା ନା ଲାକୁତୁ ତାଗା; ନାନୁ ନିଜେଦି ମାରିନ୍‌ ତାତିମାନି ବନଗରିଆ କାଣ୍ତା ତିନା, ଆବେଟ୍ ନାନୁ ନିଙ୍ଗିଁ ଆର୍ସିବାଦ୍‌ କିନା । ଆବେଟ୍ ୱାନ୍ ଲାକୁତୁ ୱାଜି ସିତାନ୍, ଇସ୍‍ହାକ୍ ଆକା ଉଟାନ୍; ମାରି ଅଙ୍ଗୁର୍‌ରସ୍ ସିତାନ୍‌, ଆକା ଉଟାନ୍ । 26 ତାନିୱେନେକା ୱାନି ବୁବା ଇସ୍‍ହାକ୍ ଇର୍ହାନ୍‌, "ମାରିନ୍‌ ଇଲେଇ ନା ଲାକୁତୁ ୱାଜି ନାଙ୍ଗିଁ ନଣ୍ତଆ ।" 27 ନାସ୍ତିୱାଲେ ୱାନି ଲାକୁତୁ ସଲିସ୍ ନଣ୍ତିତାନ୍‌, ଇସ୍‍ହାକ୍ ୱାନି ଆଙ୍ଗିଁଦି ବାସ୍‌ନା ମୁଜ୍‌ଜି ୱାନିଙ୍ଗ୍ ଆର୍ସିବାଦ୍‌ କିଜି ଇର୍ହାନ୍‌, "ସୁଡ଼ୁଆ, ପ୍ରବୁଦି ଆର୍ସିବାଦ୍‌ ପୋୟ୍‌ତି କିଡ଼ିଇଦି ବାସାନା ୱାଜା ନା ମାରିନ୍‌ତି ବାସାନା; 28 ମାପୁରୁ ବାଦଡ଼ତି ମାସୁଦାନ୍ ମାରି ଦେସ୍‍ଦି ବୁର୍‍ବୁରାବୁମିଦାନ୍‌ ଆସ୍‌ନି ପଲ୍‌ ମାରି ନାଣ୍ତ ପାସି ମାରି ଅଙ୍ଗୁର୍‍ରସ୍‍ ନିଙ୍ଗିଁ ସିପିନ୍‌; 29 ଲୋକୁ ୱିଜୁ ନି ସେବା କିପିର୍‌ ମାରି ଆଇ ଆଇ କୁଟୁମ୍‌ ନିଙ୍ଗିଁ ମାଡ଼ିସ୍ କିପିର୍‌; ନିନୁ ନିଜେଦି ଇଲୁଦି ଲୋକାମାନୁ ମାଲିକ୍ ଆଆ, ମାରି ନି ୟାୟା ମାରିନ୍‌କୁ ନିଙ୍ଗିଁ ମାଡ଼ିସ୍ କିପିର୍‌; ଏନ୍‌ ନିଙ୍ଗିଁ ଆନାଦୁରିଆ ସିନାନ୍, ୱାନ୍ ଆନାଦୁରିଆ ଆପିନ୍, ମାରି ଏନ୍‌ ନିଙ୍ଗିଁ ଆର୍ସିବାଦ୍‌ କିନାନ୍, ୱାନ୍ ଆର୍ସିବାଦ୍‌ ପୋଇନ୍‌ ।"

30 ଇୟା ୱାଜା ଇସ୍‍ହାକ୍ ଜାକୁବଙ୍ଗ୍ ଆର୍ସିବାଦ୍‌ କିତି ୱେନେକା ଜାକୁବ ନିଜେଦି ବୁବା ଇସ୍‍ହାକଦି ଲାକୁରାନ୍ ସୋସି ସନିୱାଲେ ୱାନି ତଡ଼ାନ୍‌ ଏସୌ ୱେଟାଦାନ୍‌ ୱାତାନ୍ । 31 ମାରି ୱାନ୍ ବା ସାୱି କାଦି ୱାର୍‍ଜି ବୁବା ଲାକୁତୁ ତାସି ଇର୍ହାନ୍‌, ବୁବା, "ନିନୁ ନିଙ୍ଗଜ ମାରିନ୍‌ ତାତିମାନି ବନଗରିଆ କାଣ୍ତା ତିନ୍‍ଆ, ତାନି ୱେନେକା ନିନୁ ନାଙ୍ଗିଁ ଆର୍ସିବାଦ୍‌ କିଆ ।"

32 ତାନି ୱେନେକା ବୁବାସି ଇସ୍‍ହାକ୍ ଇର୍ହାନ୍‌, "ନିନୁ ଏନୁ ?" ୱାନ୍ ଇର୍ହାନ୍‌, "ନାନୁ ନି ପେରିମାରିନ୍, ଏସୌ ।"

33 ନାସ୍ତିୱାଲେ ଇସ୍‍ହାକ୍ ନାଣ୍ତ ତିର୍‌ଗିଜି ରିସା ଆଜି ଇର୍ହାନ୍‌, "ଆର୍‌ତିଙ୍ଗ୍‌ ଏନ୍‌ ନା ଲାକୁତୁ ବନଗରିଆ କାଣ୍ତା ତାତାମାରାନ୍, ୱାନ୍ ଏନୁ ? ନିନୁ ୱାନି ଆଗିଡ଼ି ନାନୁ ଆକା ଉଣିଜି ୱାନିଙ୍ଗ୍ ଆର୍ସିବାଦ୍‌ କିତା, ମାରି ଆୟା ଆର୍ସିବାଦ୍‌ ପୋଇତାନ୍ ।" 34 ଏସୌ ବୁବାଦି ଇୟା ମାଟା ୱେର୍‌ଇ ୱେନେକା ବେସି ଦୁଃକ୍‌ଦାନ୍ ବେସି ଆଉଲି ଆତାନ୍, ମାରି ନିଜେଦି ବୁବେଙ୍ଗ୍ ଇର୍ହାନ୍‌, "ବୁବା, ନାଙ୍ଗିଁ ବା ଆର୍ସିବାଦ୍‌ କିଆ ।"

35 ଆବେଟ୍ ଇସ୍‍ହାକ୍ ଇର୍ହାନ୍‌, "ନି ତୋଡ଼ାନ୍ ୱାଜି କାବା କିଜି ନିନୁ ପୋଇନି ଆର୍ସିବାଦ୍‌ ଅତାନ୍ ।"

36 ଆବେଟ୍ ଏସୌ ଇର୍ହାନ୍‌, "ୱାନି ଟିକ୍ ଦରୁ ଇନିକା ଜାକୁବ ସିଲେ ? ଏଣ୍ତେସ୍ ୱାନ୍ ରୁଣ୍ତିଦେବେଙ୍ଗ୍ ନାଙ୍ଗିଁ କାବା କିତାନ୍, ୱାନ୍ ଆଗିଡ଼ିରାନ୍ ନା ପେରିଅଦିକାର୍ ଅତାମାର୍ହାନ୍, ମାରି ସୁଡ଼ୁଆ, ଇଲେଇ ନାନୁ ପୋଇନି ଆର୍ସିବାଦ୍‌ ବା ଅତାନ୍ ।" ୱାନ୍ ମାରିଡ଼େସି ଇର୍ହାନ୍‌, "ନିନୁ ଇନିକା ନା ଉଣ୍ତିଙ୍ଗ୍ ଉଣ୍ତ୍ରି ଆର୍ସିବାଦ୍‌ ଇଡ୍‌ଇ ନୋ ?"

37 ଆବେଟ୍‌ ଇସ୍‍ହାକ୍ ଏସୌଙ୍ଗ୍ ଇର୍ହାନ୍‌, "ସୁଡ଼ୁଆ, ନାନୁ ୱାନିଙ୍ଗ୍ ନି ମାଲିକ୍ କିତା, ମାରି ୱାନି କୁଟୁମ୍‌ତି ଲୋକାଙ୍ଗ୍‌ ୱିଜେରିଙ୍ଗ୍‌ ୱାନି ଦାସ୍‌ କିତା, ମାରି ପାସି ମାରି ଅଙ୍ଗୁର୍‌ରସ୍‌ ମାଡ଼ାନ୍ ୱାନିଙ୍ଗ୍ ସାକ୍ତି କିତା; ଇୟାଉଣ୍ତିଙ୍ଗ୍‌ ଇଲେଇ ମାରିନ୍‌ ନି ଉଣ୍ତିଙ୍ଗ୍ ମାରି ଇନିକା କିଦେଙ୍ଗ୍ ଆଟ୍‍ନା ?"

38 ଆବେଟ୍ ଏସୌ ମାରିଡ଼େସି ନିଜେଦି ବୁବେଙ୍ଗ୍ ଇର୍ହାନ୍‌, "ବୁବା, ନିଙ୍ଗିଁ ଇନିକା କେବଲ ଉନ୍‌ଡ୍ରେ ଆର୍ସିବାଦ୍‌ ମାର୍ହାତ୍‌ ? ଏ ବୁବା, ନାଙ୍ଗିଁ ବା ଆର୍ସିବାଦ୍‌ କିଆ ।" ଇକା ଇନିଜି ଏସୌ ପେରି ଆଉଲିଦାନ୍‌ ଆଡ଼ାବାଦେଙ୍ଗ୍ ଆସ୍‌ତାନ୍‌ ।

39 ଆବେଟ୍ ୱାନି ବୁବା ଇସ୍‍ହାକ୍ ଇର୍ହାନ୍‌,

"ସୁଡ଼ୁଆ, ନିନୁ ଏମେ ଦେସ୍‌ତୁ ବାସାନି ବୁମି ବୁର୍‌ବୁରା ଆଏତ୍‌

ମାରି ମୁସୁକିରି ବାଦଡ଼ଦାନ୍ ମାସୁ ୱାଙ୍ଗ୍‌ଏତ୍ ।

40 ନିନୁ କାଣ୍ତାସାରି ଜିନି ମାରି ନିଜେଦି ତୋଡ଼ାନ୍‍ଦି ସାକର୍ ଆନି,

ମାତର୍‌ ଏସ୍ତିୱାଲେ ନିନୁ ଗାଟି ତେୱିନି,

ନାସ୍ତିୱାଲେ ନିଜେଦି ଗୁଜାମିଦାନ୍ ୱାନି ପୁନ୍ଦି ପୋକନି ସିନି ।"

41 ଇୟା ୱାଜା ଜାକୁବ ନିଜେଦି ବୁବା ମାଡ଼ାନ୍ ଆର୍ସିବାଦ୍‌ ପୋଇତି ଉଣ୍ତିଙ୍ଗ୍‌ ଏସୌ ୱାନି ଉଣ୍ତିଙ୍ଗ୍ ରିସାଆଜି ମନ୍‌ତୁ ମନ୍‌ତୁ ଅଡ଼୍‍ବିତାନ୍, "ନା ବୁବାଦି ସାନି ଉଣ୍ତିଙ୍ଗ୍‌ ଆଡ଼ାବାନି ଦିନ୍‌ ଲାକ୍‌ତୁ ଇଗାୱାତାତ୍, ତାନି ୱେନେକା ନାନୁ ନିଜେଦି ତୋଡ଼ାନ୍ ଜାକୁବଙ୍ଗ୍‌ ଡାକ୍‌ନା ।"

42 ମାତର୍‌ ପେରିମାରିନ୍ ଏସୌଦି ଇୟାୱାଜା ମାଟା ରିବିକା ୱେରାତ୍; ଆବେଟ୍ ୱାଦ୍ ଲୋକ୍ ପୋକ୍‍ସି ଇସ୍ରି ତଡ଼ାନ୍‌ ଜାକୁବଙ୍ଗ୍ କୁକ୍‍ସୋ କିଜି ଇର୍ହାତ୍‌, "ସୁଡ଼ୁଆ, ନି ତୋଡ଼ାନ୍ ଏସୌ ନିଙ୍ଗିଁ ସାପିସ୍ କିଦେଙ୍ଗ୍ ସେସ୍ଟା କିଜି ନିଜେଦିଙ୍ଗ୍‌ ଜାଗାର୍‌ତା କିଜିନାନ୍‌ । 43 ଇୟା ଉଣ୍ତିଙ୍ଗ୍, ମାରିନ୍‌, ନା ମାଟା ୱେନ୍‌ଆ; ନିନୁ ହାରଣ ଦେସ୍‌ତୁ ସଲ୍‍ସୋ ନା ତୋଡ଼ାନ୍ ଲାବନ୍ ଲାକୁତୁ ସାଙ୍ଗ୍‍ଆ । 44 ମାରି ଏମେସାନ୍ଦି ନି ତୋଡ଼ାନ୍‍ତି ନାଣ୍ତ ରିସା ଉଣା ଆଏତ୍, ଆୟା ସାନ୍ଦି ଏସଦିନ୍ ଆବେନୁ ମାନ୍‍ଆ; 45 ତାନିୱେନେକା ମି ଉଣ୍ତିଙ୍ଗ୍ ନି ତୋଡ଼ାନ୍‍ତି ରିସା ଉଣା ଆତିଙ୍ଗ୍ ମାରି ନିନୁ ୱାନି ଉଣ୍ତିଙ୍ଗ୍ ଇନିକା କିତିମାନି, ଆକା ୱାନ୍ ବାଣାତିଙ୍ଗ୍ ସରିଙ୍ଗ୍, ନାନୁ ଲୋକୁ ପୋକ୍‍ସି ଆବେଣାନ୍‌ ନିଙ୍ଗିଁ ତାପିସ୍‍ନା; ଉଣ୍ତ୍ରେ ନାଣ୍ତିଙ୍ଗ୍ ମି ରିଏରିଙ୍ଗ୍ ଏନ୍ଦା ଆରାକିନା ?"

46 ତାନିୱେନେକା ରିବିକା ଇସ୍‍ହାକଦିଙ୍ଗ୍ ଇର୍ହାତ୍‌, "ଇୟା ହିତିୟ ଆଇଲିକା ଉଣ୍ତିଙ୍ଗ୍ ନାନୁ ନିଜେଦି ଜିବନ୍‌ଦୁ ଗିଦିରି ଆଜିନା; ଜଦି ଜାକୁବ ଇୟାୱାନିକା ୱାଜା ଏମେ ହିତିୟ ଆଇଲିକାଙ୍ଗ୍, ଅର୍ତାତ୍, ଇୟା ଦେସ୍‍ତି ଆଇଲିକା ଲୋଇରାନ୍‌ ଏମେ ଆଇଲିଦିଙ୍ଗ୍‌ ପେଡ଼ି କିନାନ୍‌, ଆର୍‌ତିଙ୍ଗ୍ ନା ଜିବନ୍‌ଦୁ ମାରି ଇନି ଜିନି ସୁକ୍ ?"