ଜୋସେପ ନି ପଟିପରତି ଆଡ଼ି
1 ଜୋସେପତିଙ୍ଗ୍ ମିସର ଦେସ୍ତୁ ତାତାର୍ । ମାରି ପାରୋ ରାଜାଦି ଅରେନ୍ ଅପିସର୍ ଅର୍ତାତ୍, ମିସରତି ପୋଟିପର୍ ଦରୁଦି ରକିୟାକିନି ସେନାପତି, ୱାନି ତାତିମାର୍ହି ଇସ୍ମାଏଲତି ଲୋକୁ ମାଡ଼ାନ୍ ଜୋସେପତିଙ୍ଗ୍ କଟାମାର୍ହାନ୍ । 2 ମାତର୍ ପ୍ରବୁ ଜୋସେପ୍ତିଙ୍ଗ୍ ସାକା ଆଜି ମାର୍ହାନ୍, ଆଦେଙ୍ଗ୍ ୱାନ୍ ମାଜନ୍ ଆତାନ୍; ମାରି ୱାନ୍ ନିଜେଦି ମିସରତି ମାଲିକ୍ତି ଇଲୁଦୁ ବାସା କିତାନ୍ । 3 ଆବେଟ୍ ପ୍ରବୁ ୱାନିୱାଲେ ଅର୍ସେ ମାନାନ୍ ମାରି ଏମେ ଏମେ ପାଣି କିତାନ୍, ପ୍ରବୁ ୱାନି କିୟୁଦୁ ଜେ ୱିଜୁ ପୁରା କିଜିନାନ୍, ଇକା ୱାନି ମାଲିକ୍ ସୁଡ଼ୁତାନ୍ । 4 ଆଦେଙ୍ଗ୍ ଜୋସେପ୍ ୱାନି ଆଗିଡ଼ି ଦୟା ପୋଇଜି ୱାନି ସେବାଦୁ ମିସାତାନ୍, ମାରି ୱାନ୍ ଜୋସେପ୍ଦିଙ୍ଗ୍ ନିଜେଦି ଇଲୁଦି ଦାୟିତ୍ ଅନିକାନ୍ କିଜି ୱାନି କିୟୁଦୁ ୱିଜୁ ସର୍ପେକିତାନ୍ । 5 ଇୟା ୱାଜା ୱାନ୍ ଜୋସେପ୍ଦିଙ୍ଗ୍ ନିଜେଦି ଇଲୁ ମାରି ୱିଜୁଦି ଅଦିକାର୍ କିନି ନାଣ୍ତିରାନ୍ ପ୍ରବୁ ଜୋସେପ୍ଦି ଉଣ୍ତିଙ୍ଗ୍ ଆୟା ମିସରତି ଲୋକ୍ତି ଇଲୁ ମୁସୁକୁ ଆର୍ସିବାଦ୍ କିତାନ୍; ମାରି, ଇଲୁ ମାରି କିଡ଼ିଇଦୁ ୱିଜୁ ଦନ୍ ଉଣ୍ତିଙ୍ଗ୍ ପ୍ରବୁଦି ଆର୍ସିବାଦ୍ ୱାତାତ୍ । 6 ଇୟାଉଣ୍ତିଙ୍ଗ୍ ପଟିପର ଜୋସେପ୍ଦି କିୟୁଦୁ ନିଜେଦି ୱିଜୁ ଇୟା ବଜୁ ସିତାନ୍, ଜେ ନିଜେଦି ଉଣି କାଦି ଡ଼ିସ୍ତିଙ୍ଗ୍ ମାରି ଏମେ ବିସୟ୍ଦି ଜାତୁନ୍ ଅଏତାନ୍ । ଜୋସେପ୍ ରୁପୁତାନ୍ ମାରି ସୁନ୍ଦରଦାନ୍ ନେଗିକାନ୍ ମାର୍ହାନ୍ ।
7 ମାରି ଆୟା ଗଟ୍ନା ୱେନେକା ୱାନି ମାଲିକ୍ଦି ଆଡ଼ି ଜୋସେପ୍ଦି ମୁସୁକୁ ସୁଡ଼ୁଦେଙ୍ଗ୍ ଆସ୍ତାତ୍; ଆବେଟ୍ ୱାନିଙ୍ଗ୍ ଇର୍ହାତ୍, "ନିନୁ ନା ୱାଲେ ଡର୍ଆ ।" 8 ମାତର୍ ଜୋସେପ୍ ମାନାଏଜି ନିଜେଦି ମାଲିକ୍ଦି ଆଡ଼ିଦିଙ୍ଗ୍ ଇର୍ହାନ୍, "ସୁଡୁଆ, ଇୟା ଇଲୁଦୁ ଇନିକା ମାନାତ୍ ନା ମାଲିକ୍ ଆବେଣି ଜାତୁନୁ ଅଏନ୍, ୱାନ୍ ନା କିୟୁଦି ନିଜେଦି ୱିଜୁ ସର୍ପେକିତା ମାନାନ୍ । 9 ଇୟା ଇଲୁଦୁ ନା ମାଡ଼ାନ୍ ପେରିକାନ୍ ଏନ୍ ସିଲେନ୍; ନିନୁ ୱାନି ଆଡ଼ି, ଇୟାଉଣ୍ତିଙ୍ଗ୍ କେବଲ ନିଙ୍ଗିଁ ଡ଼ିସ୍ତିଙ୍ଗ୍ ନା ଉଣ୍ତିଙ୍ଗ୍ ମାରି ଇନିକା ମନା ସିଲେତ୍ । ଇୟାଉଣ୍ତିଙ୍ଗ୍ ନାନୁ ଏଣ୍ତେସ୍ ନିସୋ ପେରି ତାଗିଇପାଣି ମାରି ମାପୁରୁଦି ବିରୁଦ୍ତାନ୍ ପାପୁ କିଦେଙ୍ଗ୍ ଆଟ୍ନା ?" 10 ଆତିଙ୍ଗ୍ବା ଆୟା ଆଇମା ଦିନାମି ଦିନାମି ଜୋସେପ୍ତିଙ୍ଗ୍ ଇୟା ୱାଜା ଇନାତ୍; ମାତର୍ ଜୋସେପ୍ ତାନି ୱାଲେ ଡରନି ଉଣ୍ତିଙ୍ଗ୍ ବା ତାନି ଲାକୁତୁ ମାନ୍ଡ୍ରେଙ୍ଗ୍ ରାଜି ଆଏତାନ୍ ।
11 ତାନିୱେନେକା ଉନ୍ଣ୍ତ୍ରି ନାଣ୍ତିଙ୍ଗ୍ ଜୋସେପ୍ ନିଜେଦି ପାଣି ଉଣ୍ତିଙ୍ଗ୍ ଇଲୁ ଲୋଇ ସର୍ହାନ୍, ମାରି, ଇଲୁଦି ଦାସରି ଲୋଇ ଏନ୍ ଆବେନ୍ ସିଲେତାର୍ । 12 ଆଦେଙ୍ଗ୍ ୱାଦ୍ ଜୋସେପ୍ଦି ଆଙ୍ଗିଁ ଆସ୍ସି ନା ୱାଲେ ଡର୍ଆ ଇଜି ଜିକାଟାଣା କିତାତ୍; ମାତର୍ ଜୋସେପ୍ ତାନି କିୟୁଦୁ ନିଜେଦି ଆଙ୍ଗିଁ ଡ଼ିସ୍ସି ଆତ୍ରେ ଉରୁକ୍ତାନ୍ । 13 ଏସ୍ତିୱାଲେ ଆୟା ଆଇମା ଜୋସେପ୍ତିଙ୍ଗ୍ ତାନି କିୟୁଦୁ ନିଜେଦି ଆଙ୍ଗିଁ ଡ଼ିସ୍ସି ଆତ୍ରେ ଉରୁକ୍ସି ସନିକା ସୁଡ଼ୁତାତ୍, 14 ନାସ୍ତିୱାଲେ ୱାଦ୍ ନିଜେଦି ଇଲୁଦି ଲୋକାଙ୍ଗ୍ କୁକ୍ସି ଇର୍ହାତ୍, "ସୁଡୁଦୁ, ନା କନ୍ଲି ମା ୱାଲେ ତାଗିଇପାଣି କିନି ଉଣ୍ତିଙ୍ଗ୍ ଅରେନ୍ ଏବ୍ରିୟଙ୍ଗ୍ ତାତାମାନାନ୍; ୱାନ୍ ନା ୱାଲେ ଡର୍ନି ଉଣ୍ତିଙ୍ଗ୍ ଲୋଇ ନା ଲାକୁତୁ ୱାତାମାର୍ହାନ୍; ଆବେଟ୍ ନାନୁ ପେରି ୱେୟୁଦାନ୍ ଆଉଲି ଆଜି କୁକ୍ତା; 15 ନାନୁ ପେରି ୱେୟୁ କିଜି କୁକ୍ନିକା ୱେନିଜି ୱାନ୍ ନିଜେଦି ଆଙ୍ଗିଁ ନା ଲାକୁତୁ ପୋକ୍ସି ଆତ୍ରେ ଉରୁକ୍ତା ସର୍ହାନ୍ ।"
16 ମାରି, ଆୟା ଆଇମା ଜୋସେପ୍ତି ମାଲିକ୍ତି ଇଲୁଦୁ ୱାନିସାନ୍ଦି ଆୟା ଆଙ୍ଗିଁ ନିଜେଦି ଲାକୁତୁ ଇଟ୍ତାତ୍ । 17 ତାନିୱେନେକା ୱାଦ୍ ନିଜେଦି କନ୍ଲିଙ୍ଗ୍ ଆୟା ୱିଜୁ ମାଟା ଇର୍ହାତ୍, "ନିନୁ ଏମେ ଏବ୍ରିୟ ଦାସ୍ଦିଙ୍ଗ୍ ମା ଲାକୁତୁ ତାତିମାନି, ୱାନ୍ ନା ୱାଲେ ତାଗିଇପାଣି କିନି ଉଣ୍ତିଙ୍ଗ୍ ନା ଲାକୁତୁ ୱାତାମାର୍ହାନ୍, 18 ମାରି, ନାନୁ ପେରି ୱେୟୁଦାନ୍ ଆଉଲି ଆଜି କୁକ୍ତାଆକା ୱାନ୍ ନା ଲାକୁତୁ ଇୟା ଆଙ୍ଗିଁ ପୋକ୍ସି ଆତ୍ରେ ଉରୁକ୍ତାନ୍ ।"
19 ନାସ୍ତିୱାଲେ "ମି ସାକର୍ ନା ୱାଲେ ଇୟାୱାଜା ପାଣି କିତାମାନାନ୍," ନିଜେଦି ଆଡ଼ିଦି ୱେୟୁଦାନ୍ ଇୟା ମାଟା ୱେନିଜି ଜୋସେପ୍ଦି ମାଲିକ୍ ନାଣ୍ତ ରିସା ଆତାନ୍ । 20 ମାରି ଜୋସେପ୍ଦି ମାଲିକ୍ ୱାନିଙ୍ଗ୍ ଅସି ରାଜାଦି ବନ୍ଦି ଲୋକୁ ତେବାନି ଜଇଲ୍ତୁ ଇଟ୍ତାନ୍; ଆବେଟ୍ ଜୋସେପ୍ ଆୟା ଜଇଲ୍ଦୁ ତେବାତାନ୍ । 21 ମାତର୍ ପ୍ରବୁ ଜୋସେପ୍ତି ସାକା ମାର୍ହାନ୍, ମାରି, ୱାନି ଉଣ୍ତିଙ୍ଗ୍ ସାକାଆଜି ଜଇଲ୍ କାପ୍କିନିୱାନି ଆଗ୍ଡ଼ି ୱାନିଙ୍ଗ୍ ଦୟା କିତାନ୍ । 22 ଆବେଟ୍ ଆୟା ଜଇଲ୍ କାପ୍କିନିକାନ୍ ଜଇଲ୍ତୁମାନି ୱିଜୁ ବନ୍ଦିଲୋକା ମୁସ୍କୁ ଦାୟିତ୍ ଜୋସେପ୍ଦି କିୟୁଦୁ ସର୍ପେକିତାନ୍; ମାରି, ୱାର୍ ଏମେକା କିତାର୍, ଆୟା ୱିଜୁଦି ମାଲିକ୍ ୱାନ୍ ଆତାନ୍ । 23 ଜଇଲ୍ କାପ୍କିନିକାନ୍ ଜୋସେପ୍ଦି କିୟୁଦୁ ସର୍ପେଆତି ଇନି ବିସୟ୍ଦୁ ସୁଡ଼ୁଏତାନ୍ ନି, ଇରିଙ୍ଗ୍ ପ୍ରବୁ ୱାନି ସାକା ମାର୍ହାନ୍; ମାରି, ୱାନ୍ ଏମେକା କିତାନ୍, ପ୍ରବୁ ଆକା ପୁରା କିତାନ୍ ।
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)