Mateus 2

Beektonni Al-Masiihii Daawwatan

1 Bara Heroodis Mootichaa keessa, erga Iisaan magaalaa Beetlihem Yihuudaatti argamtu keessatti dhalatee booddee, beektonni baʼa biiftuutii gara Yerusaalem dhufan; 2 isaanis, "Mootiin Yihuudootaa inni dhalate sun eessa jira? Nu urjii isaa baʼa biiftuutti arginee isaaf sagaduu dhufneerra" jedhanii gaafatan.

3 Heroodis Mootichi yommuu waan kana dhagaʼetti ni jeeqame; Yerusaalemis guutummaatti isa wajjin jeeqamte. 4 Innis luboota hangafootaa fi barsiistota seeraa hunda saba keessaa walitti qabee Al-Masiihiin eessatti akka dhalatu isaan gaafate. 5,6 Isaanis akkana jedhanii deebisaniif; "Beetlihem Yihuudaatti dhalata; kunis dubbii nabiiʼiyyichi,

" ‘Yaa Beetlihem ishee biyya Yihuudaa,

ati gonkumaa bulchitoota Yihuudaatii gad miti;

bulchaan saba koo Israaʼelin tiksu

si keessaa ni baʼaatii’*2:6 Mik 5:2,4

jedhee barreesse sanaa dha."

7 Ergasii Heroodis beektota sana dhoksaatti waamee yeroo itti urjiin sun mulʼate isaan irraa hubate. 8 Innis, "Dhaqaatii jabeessaa mucicha barbaadaa. Yeroo argitanitti immoo akka anis dhufee isaaf sagaduuf natti himaa" jedhee Beetlihemitti isaan erge.

9 Isaanis erga waan mootichi jedhe sana dhagaʼanii booddee karaa isaanii itti fufan; urjiin isaan baʼa biiftuutti argan sunis hamma iddoo mucichi ture gaʼee dhaabatutti isaan dura deeme. 10 Isaanis yeroo urjii sana arganitti akka malee gammadan. 11 Akkuma mana ol seenaniinis mucicha, haadha isaa Mariyaam wajjin argan; kufaniis sagadaniif. Qorxii isaaniis bananii kennaa warqee, ixaanaa fi qumbii dhiʼeessaniif. 12 Beektonnis akka gara Heroodisitti hin deebineef waan abjuudhaan of eeggachiisni isaaniif kennameef karaa biraatiin biyya isaaniitti deebiʼan.