João 8

Nkadzimayi Wakabhakhwa Mubupombgwe

1 Koga Yesu wakayenda kuDombo leMitoba. 2 Mangwanana ngwanana wakahha kakale kuthempeli, banhu bose bakahha kuwunli, akagala pasi akabadiya. 3 Bakwali nebaFarisi bakangina behhisa nkadzimayi waka abhakhwa ethama bupombgwe, bakawumisa mbeli kwabo bose. 4 Bakati kuwunli, "Ndhiyi, nkadzimayi iwhoyu wabhakhwa elipakati kwethama bupombgwe. 5 Sangwenu munlayo Mozisi wakatilaya kuti tikhikitidze banhu bakajali ngemabgwe. Motini nekukwe?" 6 Bakaleba bejalo kuti bawunlike, kuti bawane nlandu wabangawuntilika. Koga Yesu wakahunama akakwala mumavu nelunyala gugwe. 7 Pabakayendilambeli bewumbhuzwa, wakahunamuka akati kubali, "Usina jinyo pakati kwenyu ngaabe iye unotanga unowumposa nebgwe." 8 Akapamha akahunama ekwala mumavu ngelunyala. 9 Koga bakati bekuwha ikoku, umwe newumwe akabva ipapo akayenda, kutanga newhola pabamwe, Yesu akasala aliyega nenkadzimayi ali mbeli kukwe. 10 Yesu wakamilidza meho akati kuwunli, "Nkadzimayi, baponi? Utjiyapo wakuwana nlandu?"

11 Wakati, "Akuna He."

Yesu wakati, "Nami bo anditokuwana nlandu, yenda, usitjapamhe ukatjinya."