1 Ə̈bə̈ koshe sə̂ je mâ Sezare, əɨrɨ ye kə də̂ Kɔrənayə, tshə sə̂ tə kapita nə̂ atrugu əgɔ Rɔmə, lə aangbɔ ə̂në əndje ê ə pa «Aangbɔ atrugu əgɔ Itali» kɔ. 2 Tshə zâ Əpʉ Ndjapä gâ tə̂ ye tə bandanə â əndje də azü tshelə anda nə̂ ye nɔ̂ kpê rawa Ndjapä. Tshə kô aərə tə bandanə kə alayïəyo lə takpa tə̂ Ajuwufu ə sə̂ kə yu Ndjapä alɔnɔ̂. 3 Ndə ə̈bə̈ alɔ, də lɔkədɨ ə̂në alɔ nɔ̂nɔ tə̂ ye gâ ə̂grû nə gâ ye kɔ, tshə wû ərə ə wû ə̈bə̈ trawaya nə̂ Ndjapä nga nga nga ə̂në tshə lî gâ ndə ye ə ê ətshə ə pa: «Kɔrənayə!» 4 Kɔrənayə nə shêkɔ ətshə, awa mbrə̂ ətshə â tshə pâ kə trawaya nə̂ Ndjapä nə ə pa: «Ərə yekɔ, Âgbɔ̂ Əyïngerə?» Bale, trawaya nə̂ Ndjapä nə pâ kə ətshə ə pa: «Ndjapä djî əbə də aəpʉ kə yu ətshə nə gâ ye ə wû aərə nə̂ zə ə̂në bə kô kə alayïəyo kɔ gâ ye â ə̂sə̂ nə djêrə ətshə djêrə ne. 5 Wlä azü katshä katshä səye mâ Jope, əndje gü də koshe ə̂në əɨrɨ ye kə də̂ Shemɔ, ə̂në əndje ê ətshə ndje ə pa Piarə kɔ. 6 Tshə lo mâ ndə ə̈bə̈ koshe ə̂në əɨrɨ ye kə də̂ Shemɔ, tə awombrə kosəra akwa, ə̂në anda nə̂ ye sə gâ tə̂ ama ə̂ngû əngbrʉ kɔ.»

7 Alɔ ə̂në trawaya nə̂ Ndjapä nə ə̂në tshə pâ əpʉ nə kə ətshə kɔ rô gâ ye kɔ, Kɔrənayə nə ê alabə̈ alayïkosəra nə̂ ye bishi gâ ndə ə̈bə̈ trugu bale ə̂në tshə zâ Əpʉ Ndjapä gâ tə̂ ye wââ kɔ, lə takpa tə̂ atrugu ə̂në əndje tɔ̂ popo ətshə kɔ. 8 Tshə pâ ndəma əpʉ ərə nə nɔ̂ ə̂në ə wûtu kɔ kə əndje ə wlâ əndje mâ Jope nə je.

9 Tshekra pâ nə, alɔ ə̂në əndje sə̂ lə äwä ə sə̂ kə na na ye ə ndô trö də gala Jope nə gâ ye kɔ, Piarə nə ô gâ pâ anda tə akpla ətshe, də alɔ ngbanga ndə kə yu Ndjapä. 10 Əgo mî ətshə â tshə yîndə kə zɨ rəgo. Alɔ ə̂në əndje dâka pə kə fa rəgo nə kə ətshə kɔ, tshə wû ərə. 11 Tshə wû tshelafɔ ə krɔ̂, tshə wû ə̈bə̈ ərə ə kô ə̈bə̈ əgerə kumu ləba ə̂në əndje dû ama nə vəna gâ tə̂ aərə, ə tô mâ lafɔ ə sə̂ kə jerə gu nə ʉrrr ndjɔ gâ tə̂ ashɔ. 12 Adongo aagia nɔ̂ sə̂ lə nə: aagia ə̂në əndje na ana də aə̈nü əndje vəna kɔ də aagia ə̂në əndje orɔ də tshela ə̈vü əndje kɔ gâ ndə ayanu. 13 Ə̈bə̈ tshema pâ əpʉ kə ətshə ə pa: «Piarə, äfɔ ə wö aagia nə ə zɨ̈ əndje!» 14 Bale, Piarə nə pâ: «Bale ne, Âgbɔ̂ Əyïngerə! Mə zɨ̂ ə̈bə̈ əmbrʉ ərə wala ə̈bə̈ rəgo ə̂në âgbɔ̂ əpʉ shêra azü tə̂ nə kɔ zɨ̂ alɔ bale ne.» 15 Tə bishi nə, tshema nə pâ kə ətshə kwatə̂ye ə pa: «Ərə ə̂në Ndjapä pâ ə sə̂ mvo gâ ye kɔ, wü wü tə əmbrʉ ərə ne!» 16 Ərə səkɔ mbrə̂ rə ʉrrr äwä vəta, â trale mandânə, ə ô na ye gâ lafɔ.

17 Alɔ ə̂në Piarə nə dâka pə kə tegbɔ kumu ye gâ pâ âdâ ərə ə̂në tshə wû kɔ, azü ə̂në Kɔrənayə nə wlâ əndje kɔ yû tshuku anda nə̂ Shemɔ, ə yî kumu əndje gâ lə manda nə. 18 Əndje ê ətshe ə yû ətshe ə pa: «Shemɔ ə̂në əndje ê ətshə ə pa Piarə kɔ lo kotəye a?»

19 Ə̂në Piarə nə dâka pə kə tegbɔ kumu ye gâ pâ kə wu ərə nə kɔ, Âgbɔ̂ Yîrə̂ pâ kə ətshə ə pa: «Akoshe vəta sə koye ə sə kə pra əbə. 20 Äfɔ ə jërə, e də aəndje gu na ye, lï tshelə zə lï ne mbrə ə̂në əmə kə wlâ əndje kɔ.» 21 Bale, Piarə nə jêrə ə pâ kə azü nə ə pa: «Əmə kə səye, əmə də̂ e pra əmə kɔ. Âdâ kə na e mâtəye kə də̂ yekɔ?» 22 Əndje kîrə əpʉ ə pa: «Kapita Kɔrənayə kə wlâ ä kɔ. Tshə sə tə ə̂rɔ̂ əzü ə kpe rawa Ndjapä â Ajuwufu nɔ̂ pâ ə̂rɔ̂ əpʉ nə̂ ye. Ə̈bə̈ trawaya nə̂ Ndjapä zâ ama kə ətshə ə pa tshə wla ətshe ndə zə, bə na mâ lə anda nə̂ ye ka tshə dji aəpʉ ə̂në bə pa kə ətshə kɔ.» 23 Bale, Piarə nə kô əndje li gâ lə anda â əndje lô kôto.

Tshekra pâ nə, Piarə nə âfɔ â əndje də aəndje gû na ye. Alabə̈ alaye azü lə gala Jope nə zâ äwä ye. 24 Tshekra pâ nə, əndje yî kumu əndje mâ Sezare nə je. Kɔrənayə nə kâ mbrə əndje mâ je, ə ê alayɔ nə də djatra agbɔbəngâ nə mâ lə anda nə̂ ye. 25 Alɔ ə̂në Piarə nə nâ ndə kə li gâ lə anda nə kɔ, Kɔrənayə nə nâ pra tshitshi ye ə tê gâ tshekudu ye ə zâ kumu ye su ashɔ. 26 Bale, Piarə nə gbə̂tɔ ətshə gâ lafɔ ə pâ kə ətshə ə pa: «Äfɔ! Əmə ndje, mə sə kʉ tə amba əzü.» 27 Əndje də Kɔrənayə nə sə̂ kə pa tshema əndje â lî gâ lə anda nə â Piarə nə sɔ̂tə̂ ə̂kpû azü ə̂në əndje ngbô tə̂ əndje mâ je kɔ. 28 Piarə nə pâ kə əndje ə pa: «E wusə̂ nə ə pa âgbɔ̂ əpʉ za äwä za kə Juwufu ndə kə pa tshə ma gbɔbəngâ də ə̈bə̈ tshângâ wala tshə li gâ lə anda nə̂ ye ne. Bale, Ndjapä yîsə̂ nə kə əmə ə pa mə lï lï ndə kə wu ə̈bə̈ əzü tə əmbrʉ əzü wala ə pa tshə sə sə mvo ne. 29 Âdârə ə̂në alɔ ə̂në e wlâ ətshe ndə əmə kɔ, mə shê shêra ne â nâ kɔ kə sə̂. Bale, mə yində kə yu e ə pa âdâ kə wla ətshe ndə əmə kə də̂ yekɔ?» 30 Kɔrənayə nə pâ əpʉ ə pa: «Ə mâ əlo vəna kpəsəye, mə sə̂ kə yu Ndjapä də lɔkədɨ ə̂në alɔ nɔ̂nɔ tə̂ ye gâ ə̂grû nə gâ ye kɔ. Bə pa bə dji, ə̈bə̈ koshe də ləba ə̂në ə tshe ə tshe kɔ nâ ə kâ gâ ətshi əmə 31 ə pâ: "Kɔrənayə, Ndjapä djî əbə də aəpʉ kə yu ətshə nə gâ ye â ə̂sə̂ aərə ə̂në bə kô kə alayïəyo kɔ, djêrə ətshə djêrə ne. 32 Wlä ətshe mâ Jope ə ë Shemɔ ə̂në əndje ê ətshə ə pa Piarə kɔ. Tshə lo mâ lə anda nə̂ Shemɔ tə awombrə kosəra akwa, ə̂në ə sə tə̂ ama ə̂ngû əngbrʉ kɔ." 33 Âdârə ə̂në mə wlâ ətshe ndə zə katshä kɔ kə sə̂ â bə mbrə̂ tə ə̂rɔ̂nə â nâ kɔ. Bale, ə̂në a lə ye, a sə nɔ̂ kotəye gâ ətshi Ndjapä, ä sə ye ndə kə pa ä dji aəpʉ nɔ̂ ə̂në Âgbɔ̂ Əyïngerə zâ ama kə əbə ndə kə pa bə pa kɔ.»

34 Bale, Piarə nə zâ əpʉ ə pa: «Djatra əpʉ, mə wusə̂ nə kpəsəye ə pa Ndjapä wu tshelə azü wu wu bale ne. 35 Bale, lə marä nɔ̂, əzü ə̂në tshə kpe rawa Ndjapä, ə mbrə ərə də äwänə, tshə fʉ lə ala Ndjapä. 36 Ndjapä wlâ əpʉ nə̂ ye kə azü əgɔ Isərayalə ə mʉ̂ Ə̂rɔ̂ Əpʉ kə əndje gâ pâ blatshe tə̂ äwä Jezu Kristə ə̂në tshə sə tə Âgbɔ̂ Əyïngerə nə̂ azü nɔ̂ kɔ. 37 E wûsə̂ ərə ə̂në ə wûtu lə əgɔ Jude nɔ̂ kɔ gâ ye, ə vɔ̂tə̂ nə mâ lə əgɔ Galile, mandâ əpʉ batamo ə̂në Zââ mʉ̂ kɔ. 38 E wûsə̂ äwä ə̂në Ndjapä kê Jezu nə̂ əgɔ Nazaratə ə wlâ Âgbɔ̂ Yîrə̂ də awlra gâ pâ ye gâ ye kɔ. Tshə nâ tə̂ aətshe na na ye ə mbrə̂ ə̂rɔ̂nə kə azü, ə grɔ̂ arəka tə̂ azü nɔ̂ ə̂në əndje sə̂ lə kânga nə̂ Djablo kɔ, mbrə ə̂në Ndjapä sə̂ də ətshə. 39 Ä sə tə awowu aərə nɔ̂ ə̂në tshə mbrə̂ lə əgɔ nə̂ Ajuwufu də Jeruzalamə kɔ də ala ä. Azü kû ətshə gâ ala masheyɔ ə wô ətshə. 40 Bale, Ndjapä shê ətshə tə̂ vəta əlo nə ə zâ äwä kə ətshə ndə kə pa tshə ma ma tə̂ ye 41 kə azü nɔ̂ ne, tshə ma tə̂ ye kʉ kə azü ə̂në əndje wû aərə nə də ala əndje, ə̂në Ndjapä kê əndje əlînə gâ ye kɔ, kə ä ə̂në ä də aəndje zɨ̂ rəgo ə ndjû ərə mandâ kə she ətshə lə takpa tə̂ akuzu kɔ. 42 Jezu zâ ama kə ä ndə kə pa ä yisə̂ əpʉ kə azü ə pa kə əndje ə pa Ndjapä kê əne gâ ye tə awowa ngbanga nə̂ asorô də akuzu. 43 Aawopandəma Ndjapä nɔ̂ pâ əpʉ gâ pâ ye ə pa əzü ə̂në tshə za lɔsu ye kə ətshə, Ndjapä sə kə gba tshelə anyaka nə̂ əzü nə də əɨrɨ ye.»

44 Alɔ ə̂në Piarə nə dâka pə kə pa əpʉ səkɔ, Âgbɔ̂ Yîrə̂ jêrə gâ pâ azü nə nɔ̂ ə̂në əndje sə̂ kə dji əpʉ nə kɔ. 45 Kumu azü nə̂ Jezu nə ə̂në əndje sə̂ tə Ajuwufu kɔ ə̂në əndje də a-Piarə nə na kɔ kpê pâ əndu əndje. Mbrə ə̂në Ndjapä krâ tə̂ azü ə̂në əndje sə̂ sə̂ tə Ajuwufu ne kɔ də Âgbɔ̂ Yîrə̂ ə̂në tshə wlâ ətshə ndje gâ pâ əndje kɔ. 46 Mbrə ə̂në azü nə̂ Jezu nə djî əndje, əndje sə̂ kə pa əpʉ də ama aəgɔ ə̂në əndje djî djî ne kɔ â sə kə tɔlɔ Ndjapä ndje mbrə əgerə tə̂ ye. Bale, Piarə nə pâ kwatə̂ye ə pa: 47 «Ə̈bə̈ əzü lï ndə kə pa tshə shera azü, ə̂në Ndjapä wlâ ndje Âgbɔ̂ Yîrə̂ gâ pâ əndje gâ ye kɔ mata ə̂në tshə wlâ ətshə gâ pâ əzə̂ kɔ ndə kə pa əndje za batamo a?»

48 Rəkɔ, tshə zâ ama ndə kə pa əndje za batamo də əɨrɨ Jezu Kristə. Bale, əndje yû ətshə ə pa tshə sə kôto ʉrrr gâ tə̂ ə̈bə̈ əlo gâ ye kane.