Atos 12

Erɔdə wô Zake ə zâ Piarə gâ lə anda kânga

1 Tə̂ alɔ nə səkɔ, əyïngerə Erɔdə Agripa vɔ̂tə̂ kə gi əyo tə̂ alabə̈ azü Laglizə nə. 2 Tshə zâ ama â əndje wô Zake, aye Zââ, də ə̈ngrʉ̈ kamba. 3 Ə̂në tshə wû ə pa ərə səkɔ fʉ tə̂ Ajuwufu ə fʉ kɔ, tshə zâ ama kwatə̂ye â əndje zâ Piarə. Ə sə tə̂ alɔ sandaga mapa ə̂në əndje mâ mâ də əyï nə ne kɔ. 4 Bale, mandânə ə̂në əndje têgbɔ Piarə nə ə zâ ətshə gâ lə anda kânga gâ ye kɔ, Erɔdə nə kô aangbɔ vəna nə̂ atrugu ə̂në əndje sə̂ vəna vəna lə aangbɔ bale bale ndə kə pa əndje lishi tə̂ ye. Tshə yîndə kə pa mandâ sandaga Pakə nə, əndje na də ətshə gâ ətshi azü nɔ̂ kanika ə wa ngbanga ye. 5 Rəkɔ, əndje bâta Piarə nə mâ lə anda kânga nə je. Bale, azü Laglizə nə kâ kâtə̂ kə yu Ndjapä mbrə ətshə ne.

Trawaya nə̂ Əyïlingû wûtu də Piarə lə anda kânga

6 Də tsheləbu nə, ndə kə pa də əzɨ Erɔdə nə na də ətshə ə wa ngbanga ye, Piarə nə shô gâ tʉ gâ lə əpro tə̂ atrugu bishi, əndje î ətshə də aə̂wû kowɔ bishi. Lə manda kânga nə, alabə̈ atrugu nə sə̂ je ə sə̂ kə lishi tə̂ manda nə. 7 Bə pa bə dji, ə̈bə̈ trawaya nə̂ Əyïlingû bʉ̂, â ə̂yîəwo tshê lə anda kânga nə. Trawaya nə gôro Piarə nə tə̂ əkro ye ə jô ətshə lə əlo nə. Mandânə, tshə pâ kə ətshə ə pa: «Äfɔ katshä!» Bale, aə̂wû kowɔ nə yɔ̂ tə̂ kəna ye nə gâ tʉ. 8 Bale, trawaya nə pâ kə ətshə ə pa: «Ï ə̂wû tshepa ləba nə̂ zə ə ï ə̂wû tama nə̂ zə.» Bale, Piarə nə mbrə̂ ndəma ye. Trawaya nə pâ kə ətshə ə pa: «Yï əgerə ləba nə̂ zə ə zä äwä əmə.»

9 Piarə nə wûtu ə zâ äwä ye. Tshə wûsə̂ nə wû ə pa ərə ə̂në trawaya nə ə mbrə kɔ ə sə̂ tə djatra əpʉ ne. Bale, tshə pâ ənə̂ ye ə pa ə də ə̈lü kə sə̂. 10 Əndje rô angbʉlî aangbɔ atrugu nə, ə rô bishi aangbɔ nə ə yî kumu əndje gâ lə manda ə̂në əndje mbrə̂ də kowɔ kɔ, ə̂në ə ro gâ lə gala nə kɔ. Manda nə krɔ̂ də ə̂tə̂ ye ətshi əndje. Əndje wûtu ə zâ ə̈bə̈ äwä, bə pa bə dji, trawaya nə tshî Piarə nə tʉ ə rô. 11 Bale, yîrə̂ Piarə nə nâ gâ tə̂ ye â tshə pâ: «Ə̂në mə sə ye, mə wusə̂ nə ngâ ə pa Əyïlingû wlâ trawaya nə̂ ye â tshə djɔ̂ əmə lə kəna Erɔdə gâ ye də əmbrʉ ərə ə̂në Ajuwufu ka tə̂ əmə ə ka ndə kə mbrə tə̂ əmə kɔ.»

12 Mandânə, ə̂në tshə wûsə̂ âdâ ərə sə̂ gâ ye kɔ, tshə nâ mâ lə anda nə̂ Marə̂, əyï Zââ ə̂në əndje ê ətshə ə pa Markə kɔ. Mâ je, alabə̈ azü ngbô tə̂ əndje gâ tə̂ nə ə sə̂ kə yu Ndjapä. 13 Alɔ ə̂në Piarə nə ngê manda nə, ə̈bə̈ əyïkosəra tə yashe, ə̂në əɨrɨ ye kə də̂ Rɔdə kɔ nâ ndə kə krɔ manda nə. 14 Tshə djî tshema Piarə nə kpro â tshelə ye sə̂ də ə̂rû, tshə kâtə̂ kə krɔ manda nə gâ ye ə kpê ärɔ̈ ndə kə pa ndə nə kə azü nə ə pa Piarə kâ lə manda mashu-e. 15 Əndje pâ kə ətshə ə pa: «Ângwâ sə lə kumu zə a!» Bale, tshə sə̂ pə tə̂ nə ə pâ djatra əpʉ kə sə̂. Bale, əndje pâ: «Yîrə̂ ye kə sə̂.»

16 Bale, Piarə nə sə̂ pə kə nge manda nə. Əndje krɔ̂ manda nə â kumu əndje kpê pâ əndu əndje ə̂në əndje wû ətshə kɔ. 17 Tshə mbrə̂ kəna ye kə əndje ndə kə pa əndje sə ngboo â tshə pâ ndəma äwä ə̂në Əyïlingû wûtu də ətshə lə anda kânga nə kɔ kə əndje. Tshə pâ: «E pä ndə nə kə Zake gâ ndə alaye əzə̂.» Mandânə, tshə wûtu ə rô tə̂ ə̈bə̈ ata ətshe.

18 Alɔ ə̂në tshe nə krâ gâ ye kɔ, atrugu nə sə sə kpirə̂ ne. Əndje yû tə̂ əndje ə pa ərə yekɔ kə wûtu gâ tə̂ Piarə nə. 19 Erɔdə nə pâ əndje pra ətshə, bale, əndje sɔ̂tə̂ ye sɔ̂ ne. Tshə pâ əndje yu atrugu nə â zâ ama ndə kə pa əndje wo əndje. Mandânə, Erɔdə nə âfɔ mâ Jude ə nâ mâ Sezare ə mâ ə̈bə̈ əlo mâ je.

Kuzu Erɔdə

20 Erɔdə nə sə̂ də əpʉ də azü əgɔ Tirə gâ ndə əgɔ Sidɔ. Bale, azü aəgɔ sə̂ bishi nə kɔ djî tə̂ əndje ə nâ ə tê ətshə. Əndje nâ ətshinə ə rô pâ Blasətusə, tə awoga ndə tshelə anda ngerə nə̂ Erɔdə nə, də əpʉ â nâ ndə kə pa əndje də a-Erɔdə nə dji tə̂ əndje, ka blatshe sə lə takpa tə̂ əndje. Mbrə ə̂në rəgo tô lə əgɔ nə̂ əyïngerə nə â li gâ lə əgɔ nə̂ əndje nə kɔ.

21 Tə̂ əlo nə ə̂në əndje yîsə̂ nə gâ ye kɔ, Erɔdə nə yî aləba ngerə nə̂ ye ə sə̂ gâ tʉ gâ pâ mbata ngerə nə̂ ye nə ə sə̂ kə pa əpʉ gâ ətshi azü nə nɔ̂. 22 Azü nə tâ râwâ ə pa: «Ə də̂ əzü də̂ kə pa əpʉ səye kɔ ne, ə̈bə̈ ndjapä kə sə̂!» 23 Bale, kʉ pə kôto, ə̈bə̈ trawaya nə̂ Əyïlingû dâ Erɔdə nə, mbrə ə̂në tshə mbê Ndjapä mbê ne kɔ. Aə̂tshê zɨ̂ tshelə ye â tshə tshû.

24 Bale, Əpʉ nə̂ Ndjapä dâka pə kə za ətshe na na ye â sə̂ kə na gâ ətshinə. 25 Alɔ ə̂në Barənabasə nə gâ ndə Sɔlə nə mbrə̂ kosəra nə̂ əndje mâ Jeruzalamə ə̂në ə nglɔ̂ gâ ye kɔ, əndje zâ Zââ ə̂në əndje ê ətshə ə pa Markə kɔ â əndje də aəndje dô tə̂ əndje â gû na ye.