1 Ə̂në alɔ Patekɔtə lî gâ ye kɔ, azü ə̂në əndje zâ lɔsu əndje kə Jezu kɔ ngbô tə̂ əndje gâ tə̂ nə nɔ̂ tə̂ ətshe bale. 2 Bə pa bə dji, ə̈bə̈ əkɨ ərə tô mâ lafɔ mata əkɨ âgbɔ̂ əyi â əkɨ ərə nə zâ tshelə anda nə nɔ̂ ə̂në əndje sə̂ gâ tʉ lə nə kɔ. 3 Bale, əndje wû alabə̈ ala aərə ə̂në ə kô ala əwo kɔ ə wûtu. Ə krû tshelə əndje â jêrə ə sə̂ gâ pâ əzü bale bale lə takpa tə̂ əndje nə. 4 Âgbɔ̂ Yîrə̂ sû əzü bale bale trɔ̂ â əndje nɔ̂ vɔ̂tə̂ kə pa aəpʉ də aata aama aəgɔ Lïndə̂ nə ə̂në Âgbɔ̂ Yîrə̂ nə yîsə̂ nə kə əndje ndə kə pa nə kɔ.Alɔ Patekɔtə

5 Kandää, alabə̈ Ajuwufu ə̂në əndje yîndə Əpʉ nə̂ Ndjapä ngbatshe kɔ sə̂ mâ Jeruzalamə je. Əndje âfɔ lə aəgɔ pâ ashɔ nɔ̂ â nâ kɔ. 6 Ə̂në əndje djî əkɨ ərə sə̂ mə rəkɔ, əndje âfɔ ə ngbrû na nə. Kumu əndje kpê pâ əndu əndje rô pâ nə mbrə ə̂në əzü bale bale sə̂ kə dji əpʉ ə̂në azü nə ə̂në əndje zâ lɔsu əndje kə Jezu kɔ sə̂ kə pa nə də ama əgɔ nə̂ ye də ə̂tə̂ ye kɔ. 7 Kumu əndje kpê pa aəndu əndje â lɔsu əndje sə̂ kə tɔ nə â əndje pâ: «Azü səye ə̂në əndje pa əpʉ səye kɔ, əndje lə lə nɔ̂ tə azü əgɔ Galile ne a? 8 Ə mbrə atâ â əzə̂ bale bale dji əndje â əndje pa aəpʉ də aama aəgɔ nə̂ əzə̂ kɔ? 9 Lə takpa tə̂ əzə̂, alabə̈ azü tô lə aəgɔ Partə, də Medə gâ ndə Elamə â nâ kɔ. Azü aəgɔ Mezɔpotami, də Jude, də Kapadɔsə, də Pɔ gâ ndə Azi lə je, 10 də aəgɔ Friji, də Pafili, də Ejipətə, də ashɔ əgɔ Libi ə̂në ə sə trö də Siranə kɔ. Alabə̈ əndje tô mâ Rɔmə â nâ kɔ, 11 Ajuwufu də azü ə̂në əndje sə kə mbrə Ndjapä nə̂ Ajuwufu nə, də azü əgɔ Kratə gâ ndə əgɔ Arabi. Bale, əzə̂ dji əndje â əndje sə kə pa aəpʉ də aama aəgɔ nə̂ əzə̂ gâ pâ əgbro aərə ə̂në Ndjapä mbrə̂ kɔ!»

12 Kumu əndje nɔ̂ kpê pâ əndu əndje â əndje wûsə̂ əpʉ ə̂në əndje lï ndə kə pa nə kɔ wû ne. Əndje pâ lə takpa tə̂ əndje ə pa: «Âdâ ərə səkɔ kə də̂ yea?» 13 Bale, alabə̈ azü nə mɔ̂ azü nə ə̂në əndje za lɔsu əndje kə Jezu kɔ ə pa: «Ə̂pî kə mbrə əndje kɔ!»

14 Bale, Piarə âfɔ də ə̂dû azü-awla nə morofo amanə bale ə vɔ̂tə̂ kə pa əpʉ tə âgbɔ̂ kə ə̂kpû azü nə ə pa: «E-e, Ajuwufu də azü nɔ̂ ə̂në e sə lə Jeruzalamə kɔ, e drä ətu e ə djï əpʉ səye ə djï âdâ ərə sə̂ ə̂në ə mbrə̂ kɔ. 15 Azü səye ndjû ə̂pî ndjû â mbrə əndje kɔ ne, a lə kʉ pə də əzɨ a lə ye. 16 Bale, ndəma əpʉ ə̂në awopandəma Ndjapä Jowalə pâ kɔ kə sə̂ â mbrə kpəsəye kɔ. Tshə pâ:

17 "Ndjapä pâ əpʉ ə pa: Tə̂ krutə aəlo,

mə sə kə wla Âgbɔ̂ Yîrə̂ nə̂ əmə gâ pâ azü nɔ̂.

Aneshe koshe də aneshe yashe nə̂ e sə kə pa ndəma Ndjapä,

amɔdɔ nə̂ e sə kə wu aərə mata ə̈lü,

ayawaza nə̂ e sə kə wu ə̈lü.

18 Ngâ, lə aəlo səkɔ, mə sə kə wla Âgbɔ̂ Yîrə̂ nə̂ əmə

gâ pâ alayïkosəra nə̂ əmə tə akoshe də ayashe

â əndje sə kə pa ndəma əmə.

19 Mə sə kə mbrə aərə ə̂në ə rô pâ kumu azü, mâ ngâ lafɔ

ə mbrə aərə ə̈lü djoko tʉ pâ ashɔ:

ə̈ndjï də əwo gâ ndə ngâwo mata andra sə kə sə je.

20 Alɔ sə kə do tə̂ ye tə əbu nə,

yipʉ sə kə do tə̂ ye tə ə̂drô nə mata ə̈ndjï,

angbʉlînə ndə kə pa âgbɔ̂ əlo də əlo ə̂yî Âgbɔ̂ Əyïngerə lï.

21 Bale, əzü nɔ̂ ə̂në tshə e ətshe də əɨrɨ Âgbɔ̂ Əyïngerə,

tshə sə kə tshɔ lə kuzu."*

22 «Azü əgɔ Isərayalə, e djï əpʉ ə̂në mə sə kə pa nə kɔ: Jezu, əzü əgɔ Nazaratə, sə tə əzü ə̂në Ndjapä yîsə̂ nə gashu kə e ə pa əne kə wlâ ətshə kɔ. Tə̂ äwä ye, Ndjapä mbrə̂ aərə ə̈lü kpî kpî kpî lə takpa tə̂ e, mata ə̂në, e-e də ə̂tə̂ e, e wusə̂ nə kɔ. 23 Əndje zâ koshe səkɔ gâ lə kəna e ə lï də ərə ə̂në Ndjapä zâ ama ndə kə mbrə nə də ərə ə̂në tshə gâmba ndə kə mbrə nə kɔ. E zâ ətshə gâ lə kəna adulu â əndje kû ətshə gâ ala masheyɔ â wô ətshə. 24 Bale, Ndjapä shê ətshə lə takpa tə̂ akuzu, ə djɔ̂ ətshə lə əyo kuzu, mbrə ə̂në kuzu lï lï ndə kə pa ə ro pâ ye ne. 25 Mbrə ə̂në Davidə pâ əpʉ gâ pâ əpʉ nə̂ ye ə pa:

"Mə sə kə wu Âgbɔ̂ Əyïngerə alɔnɔ̂ ətshi əmə,

mbrə ə̂në tshə sə gâ ndə ndəkɔ əmə,

kanika mə gu gugu ne.

26 Âdârə ə̂në lɔsu əmə sə də ə̂rû

â mə sə kə wli ətshi də ə̂rû kɔ kə sə̂.

Mə â sə mə mâ lə ə̂dû ye,

lɔsu əmə sə kə sə kʉ gâ pâ zə.

27 Mbrə ə̂në bə sə sə kə tshi əmə tʉ tə̂ ə̂sə̂ akuzu ne,

bə sə sə kə katə̂ əmə ne,

əmə ə̂në bə kê əmə gâ ye kɔ,

mə fu lə ə̂dû ne.

28 Bə yîsə̂ äwä sorô kə əmə,

bə sə kə za ə̂rû gâ tə̂ lɔsu əmə ə̂në mə sə gâ ətshi zə kɔ."*

29 «Alaye əmə, e kä ə kä mə pa əpʉ orâ kə e gâ pâ əpʉ nə̂ ätä əzə̂ də Davidə nə: tshə tshû, əndje shî ətshə gâ ye, ə̂dû ye daka pə kpəsəye lə takpa tə̂ əzə̂ kotəye. 30 Bale, tshə sə̂ tə awopandəma Ndjapä ə wûsə̂ nə ə pa Ndjapä drâ ama ə pâ əpʉ kə əne ə pa ə̈bə̈ angwa əne sə kə sə tə əyïngerə gâ mandâ əne. 31 Davidə nə wûsə̂ nə angbʉlînə ə pa Kristə ə she je. Âdârə ə̂në tshə pâ əpʉ gâ pâ əpʉ nə̂ ye ə pa:

"Ndjapä sə sə kə katə̂ ye tʉ tə̂ ə̂sə̂ akuzu ne

â əndu ye sə sə kə fu lə ə̂dû ne."*

32 «Jezu ə̂në mə pa ndə ye kɔ, Ndjapä shê ətshə gâ ye, ä wû ətshə də ala ä. 33 Ndjapä zâ ətshə o na ye mâ lafɔ gâ ye â tshə sə̂ gâ tʉ gâ ndə ndəkɔ ye. Abä zâ Âgbɔ̂ Yîrə̂ ə̂në tshə zâ ama də əpʉ ye kerə kɔ kə ətshə, â tshə wlâ ətshə gâ pâ ä. Ə tə nə də̂ e wu â dji kɔ. 34 Mbrə ə̂në Davidə də ə̂tə̂ ye ô ô mâ lafɔ ne, bale tshə pâ əpʉ ə pa:

"Əyïlingû pâ kə Âgbɔ̂ Əyïngerə nə̂ əmə ə pa:

Sə̈ gâ tʉ gâ ndə ndəkɔ əmə

35 ʉrrr ndjɔ mə mbrə alayïkowɔ nə̂ zə tə mbata ə̈nü zə gâ ye kane."*

36 «Azü əgɔ Isərayalə nɔ̂ lï ndə kə wusə̂ nə ngâ ə pa: Jezu nə ə̂në e kû ətshə gâ ala masheyɔ kɔ, Ndjapä mbrə̂ ətshə tə Âgbɔ̂ Əyïngerə də Kristə gâ ye.»

37 Alɔ ə̂në azü nə djî əpʉ səkɔ, əpʉ nə zâ lɔsu əndje. Əndje yû Piarə də ə̂dû azü-awla nə ə pa: «Alaye azü, ä sə kə mbrə atâ?» 38 Piarə nə pâ kə əndje ə pa: «E tshï äwä angbrɔ kə mbrə tə̂ e tʉ, əzü bale bale zä batamo də əɨrɨ Jezu Kristə ka tshelə anyaka nə̂ e gba, ka Ndjapä za Âgbɔ̂ Yîrə̂ kə e. 39 Mbrə ə̂në Ndjapä zâ ama də əpʉ səkɔ mbrə e də aləvu e, ndje mbrə azü ə̂në əndje sə lə aəgɔ ngrʉ̂ kɔ, azü nɔ̂ ə̂në Əyïlingû tə Ndjapä nə̂ əzə̂ ə e əndje je kɔ.»

40 Piarə nə pâ aəpʉ kə əndje ngbatshe ndə kə pa əpʉ nə za lɔsu əndje, tshə pâ: «E tshï äwä azü tshe kpəsəye ə̂në əndje sə tə əmbrʉ nə kɔ tʉ ka Ndjapä she e lə kuzu.»

41 Azü ə̂në əndje yîndə əpʉ nə̂ Piarə nə kɔ, əndje zâ batamo. Tə̂ alɔ nə səkɔ, azü mata sake vəta (3 000) tê gâ ndə ə̂kpû azü nə ə̂në əndje zâ lɔsu əndje kə Jezu gâ ye kɔ.

42 Azü nə nɔ̂ sə̂ kə ngbo tə̂ əndje gâ tə̂ nə alɔnɔ̂ ndə kə dji əpʉ nə̂ azü-awla nə, ə sə̂ kə dji tə̂ əndje tə̂ äwä kə mbrə aərə äwä bale, ə zɨ rəgo äwä bale ə yu Ndjapä äwä bale. 43 Awa mbrə̂ əzü bale bale, mbrə ə̂në Ndjapä sə̂ kə mbrə aərə ə̈lü də aərə ə̂në ə rô pâ kumu azü kɔ ngbatshe tə̂ äwä azü-awla nə. 44 Azü nə nɔ̂ ə̂në əndje zâ lɔsu əndje kə Jezu nə kɔ ngbô tə̂ əndje gâ tə̂ nə bale â aərə nə̂ əndje nɔ̂ sə̂ bale. 45 Əndje kâ aashɔ də aərə nə̂ əndje ə krû tshelə ngendja nə Lïndə̂ aərə ə̂në əzü bale bale mâ əgo nə kɔ. 46 Alɔnɔ̂, tə̂ äwä kə dji tə̂ əndje, əndje sə̂ kə ngbo tə̂ əndje gâ tə̂ nə mâ lə Anda Ndjapä, ə sə̂ kə zɨ rəgo kpə ə̂sə̂ nə bale lə aanda nə̂ əndje, ə zɨ rəgo nə də ə̂rû tə̂ lɔsu əndje də ə̂rɔ̂ tshelə əndje. 47 Əndje sə̂ kə mbe Ndjapä â azü nɔ̂ yîndə əndje. Alɔnɔ̂, Âgbɔ̂ Əyïngerə sə̂ kə ko azü ə̂në əndje shê lə kuzu gâ ye kɔ gâ ndə əndje lə aangbɔ nə.