1 «Alabä əmə də alaye əmə, e djï əpʉ səye ə̂në mə sə kə pa nə gâ pâ əpʉ ə̂në e zâ gâ lə kumu əmə kɔ.»

2 Alɔ ə̂në əndje djî əpʉ nə ə̂në tshə sə̂ kə pa nə kə əndje kɔ ə sə̂ də ama ebrʉ kɔ, ətshe nə sə̂ kwatə̂ye kokoko rô pâ nə. Bale, Palɔ nə pâ: 3 «Əmə, mə sə tə Juwufu, əndje zû əmə mâ Tarsə lə ashɔ əgɔ Silisi; bale, əndje bâta əmə kotəye lə Jeruzalamə, mə wûsə̂ ərə tshekudu Gamalialə ə̂në tshə yîsə̂ äwä kə bata âgbɔ̂ əpʉ nə̂ alätä də äwänə kə əmə. Mə sə̂ də əgo kə mbrə kə Ndjapä mata ə̂në e sə də nə nɔ̂ kpəsəye kɔ. 4 Mə gî əyo tə̂ azü ə̂në əndje zâ äwä Âgbɔ̂ Əyïngerə kɔ ʉrrr alabə̈ əndje tshû. Mə zâ ama ə pa əndje i akoshe də ayashe ə ko əndje gâ lə anda kânga. 5 Âgbɔ̂ awotokrɔ gâ ndə aangbɔ nə̂ aâgbɔ̂ azü nə lï ndə kə pa əndje pa ə pa əpʉ nə ə̂në mə pa kɔ sə tə djatra əpʉ. Gâ pâ nə, əndje kə tâ fraka â zâ kə əmə ndə kə pa mə na də nə kə alaye, Ajuwufu mâ Damasə kɔ, ndə kə pa mə i azü nə̂ Kristə nə mâ je ə gu də əndje mâ Jeruzalamə mâtəye ə gi əyo tə̂ əndje.»

6 «Alɔ ə̂në mə dâka pə lə äwä ə ndô trö də Damasə nə gâ ye kɔ, alɔ kâ gu ndə tshegrutshe, bə pa bə dji, ə̈bə̈ âgbɔ̂ ə̂yîəwo tô mâ lafɔ ə tshê dji əmə. 7 Mə tê gâ tə̂ ashɔ ə djî ə̈bə̈ tshema ə̂në ə pâ əpʉ kə əmə ə pa: "Sɔlə, Sɔlə, bə sə kə gi əyo tə̂ əmə mbrə yekɔ?" 8 Mə kîrə əpʉ ə pa: "Âgbɔ̂ Əyïngerə, bə də̂ əde kə sə̂?" Bale, tshə pâ kə əmə ə pa: "Əmə, mə də̂ Jezu nə̂ əgɔ Nazaratə, ə̂në əbə, bə sə kə gi əyo tə̂ əmə kɔ." 9 Azü ə̂në əndje sə̂ ngotə̂ əmə kɔ wû ə̂yîəwo nə, bale, əndje djî tshema əzü nə ə̂në tshə pa əpʉ nə kə əmə kɔ djî ne. 10 Bale, mə pâ: "Âgbɔ̂ Əyïngerə, mə mbrə atâ?" Âgbɔ̂ Əyïngerə nə pâ kə əmə ə pa: "Äfɔ ə nä mâ Damasə, mâ je, əndje yisə̂ ərə ə̂në Ndjapä zâ ama kə əbə gâ ye ə pa bə mbrə nə kɔ kə əbə je." 11 Mbrə kə tshe ə̂yîəwo nə, mə lîshi lî ne, bale, azü nə ə̂në əndje sə̂ ngotə̂ əmə kɔ têgbɔ kəna əmə ə nâ də əmə mâ Damasə je.

12 «Kandää, mâ je, ə̈bə̈ koshe ə̂në əɨrɨ ye kə də̂ Ananiasə kɔ sə̂ je. Tshə yîndə Əpʉ Ndjapä ngbatshe, ə sə̂ kə bata âgbɔ̂ əpʉ nə̂ Mayïzə, Ajuwufu əgɔ Damasə nə nɔ̂ sə̂ kə pa ə̂rɔ̂ əpʉ nə̂ ye. 13 Tshə nâ gâ tə̂ əmə ə pâ kə əmə ə pa: "Sɔlə, aye əmə, ala zə sɔ̈!" Kʉ pə kôto, ala əmə sɔ̂ â mə wû ətshə. 14 Tshə pâ: "Ndjapä nə̂ alätä əzə̂ kê əbə ətshinə gâ ye ndə kə pa bə wusə̂ ərə ə̂në tshelə ye yində nə kɔ, bə wu Jezu, ə̂rɔ̂ əzü ə dji tshema ye. 15 Mbrə ə̂në bə sə kə sə tə awopa aəpʉ aərə nə̂ ye ə̂në bə wû ə djî gâ ye kɔ gâ ətshi azü nɔ̂. 16 Bale, ə̂në a lə ye, bə ka tə̂ yekɔ? Äfɔ ə zä batamo ə ë əɨrɨ ye kanika tshə yutu anyaka nə̂ zə."

17 «Mandânə, mə gû mâ Jeruzalamə. Bale, alɔ ə̂në mə sə kə yu Ndjapä lə Anda Ndjapä kɔ, mə wû ərə 18 â wû Âgbɔ̂ Əyïngerə â tshə pâ kə əmə ə pa: "Mbrə̈ katshä ə wütu lə gala Jeruzalamə nə katshä, mbrə ə̂në azü nə sə sə kə yində əpʉ ə̂në bə pa gâ pâ əpʉ nə̂ əmə kɔ ne." 19 Bale, mə pâ: "Âgbɔ̂ Əyïngerə, əndje də ə̂tə̂ əndje, əndje wusə̂ nə ə pa mə nâ lə anda aangbɔ bale bale ndə kə pa mə ko azü ə̂në əndje zâ lɔsu əndje kə əbə gâ ye kɔ ə wli əndje gâ lə anda kânga ə da əndje. 20 Bale, alɔ ə̂në azü sə̂ kə wo Etianə, tə awopa əpʉ gâ pâ zə kə azü kɔ, mə sə̂ ndje je. Kə wo ətshə nə ə̂në əndje wô ətshə kɔ, mə yîndə nə gâ ndə nə kə əndje ə bâta aləba nə̂ azü nə ə̂në əndje sə̂ kə wo ətshə kɔ." 21 Bale, Âgbɔ̂ Əyïngerə nə pâ kə əmə ə pa: "Rö, mbrə ə̂në mə sə kə wla əbə ngrʉ̂ kə azü ə̂në əndje sə sə tə Ajuwufu ne kɔ."»

22 Azü nə djî Palɔ nə ʉrrr gâ tə̂ alɔ ə̂në tshə pâ aəpʉ səkɔ. Bale, əndje vɔ̂tə̂ kə ta râwâ ə pa: «E wö marä tə̂ əzü rəke! Tshə lï lï ndə kə daka pə pâ ashɔ ne!» 23 Bale, əndje sə̂ kə ta râwâ ə sə̂ kə wli aləba nə̂ əndje gâ lafɔ ə sə̂ kə gʉ ashɔ gâ lafɔ. 24 Komandâ nə̂ atrugu nə zâ ama ndə kə pa əndje li də Palɔ nə gâ lə kɔpiɔ nə̂ atrugu nə ə da ətshə də djakwa ndə kə pa tshə pa âdâ əpʉ nə ə̂në ə̂kpû azü nə ə ta râwâ nə rə tə̂ ye kɔ. 25 Bale, alɔ ə̂në əndje sə̂ kə i Palɔ nə ndə kə pa əndje da ətshə də djakwa nə kɔ, Palɔ nə pâ kə âgbɔ̂ əzü nə̂ atrugu nə ə̂në tshə sə̂ je kɔ ə pa: «Əndje za äwä kə e ndə kə pa e da əgblə əgɔ Rɔmə, ə̂në əndje te te pa ə wa ngbanga ndje gâ lə kumu ye ne kɔ də djakwa?» 26 Ə̂në âgbɔ̂ əzü nə̂ atrugu nə djî əpʉ səkɔ, tshə nâ ə pâ ndə nə kə komandâ nə̂ əndje nə ə pa: «Bə sə kə mbrə atâ? Koshe səye sə tə əzü əgɔ Rɔmə.» 27 Rəkɔ, komandâ nə̂ atrugu nə nâ ə yû Palɔ nə ə pa: «Pä kə əmə, bə sə tə əzü əgɔ Rɔmə a?» Palɔ nə kîrə əpʉ ə pa: «Ayî.» 28 Komandâ nə̂ atrugu nə zâ əpʉ ə pâ: «Əmə, mə ndɨ̂ əgerə ngendja â dô tə̂ əmə tə əgblə əgɔ Rɔmə kɔ.» Palɔ nə pâ: «Bale, əmə, əndje zû əmə ə zû də nə.»

29 Kʉ pə kôto, azü nə ə̂në əndje yîndə kə da ətshə kəmə ndə kə pa əndje yu ətshə kɔ, gî tə̂ əndje gashe tə̂ ye gâ ye. Bale, awa mbrə̂ komandâ nə̂ atrugu nə ə̂në tshə wûsə̂ nə ə pa Palɔ sə̂ tə əzü əgɔ Rɔmə â əne zâ ama â əndje î ətshə kɔ.

30 Komandâ nə̂ atrugu nə yîndə kə pa tshə wusə̂ djatra âdâ əpʉ sə̂ ə̂në Ajuwufu lea Palɔ nə tə̂ nə kɔ. Rəkɔ, tshekra, tshə zâ ama â əndje wôra Palɔ nə ə zâ ama ndə kə pa aâgbɔ̂ azü nə̂ aawotokrɔ gâ ndə azü aangbɔ ngbanga nə̂ Ajuwufu nə ngbo tə̂ əndje gâ tə̂ nə. Mandânə, tshə zâ ama ə pa əndje na də Palɔ nə â əndje zâ ətshə na nə gâ ətshi əndje.