1 Agripa nə pâ kə Palɔ nə ə pa: «Mə za äwä kə əbə ndə kə pa bə pa əpʉ gâ pâ əpʉ ə̂në əndje zâ gâ lə kumu zə kɔ.» Bale, Palɔ nə yî kəna ye ə pâ əpʉ gâ pâ əpʉ nə̂ ye nə ə pa: 2 «Əyïngerə Agripa, mə sə də ə̂rû tə̂ lɔsu əmə kpəsəye ə̂në mə sə kə yisə̂ əpʉ gâ ətshi zə gâ pâ aəpʉ nɔ̂ ə̂në Ajuwufu zâ gâ lə kumu əmə kɔ. 3 Mbrə ə̂në bə wûsə̂ mandʉ ərə nə̂ Ajuwufu nɔ̂ kpro gâ ndə aəpʉ ashera nə̂ əndje gâ ye. Rəkɔ, mə tegbɔ ə̈nü zə ndə kə pa bə ru tshelə zə ə dji əmə.

4 «Kə sə əmə pə lə mɔdɔ tə̂ əmə, ə vɔ̂tə̂ nə mâ tə̂ ama nə, lə takpa tə̂ azü əgɔ nə̂ əmə, ndje lə gala Jeruzalamə, Ajuwufu nɔ̂ wusə̂ nə. 5 Əndje yêrɔ əmə kerə, â kədə əndje yində nə, əndje sə kə pa ndə nə ə pa mə sə̂ leme-e tə əzü aangbɔ nə̂ Afariza, ə̂në ə sə tə aangbɔ ə̂në əpʉ nə gbɔ ə rô ə̂dû aangbɔ nɔ̂ lə kə vrɔ Ndjapä nə̂ ä kɔ. 6 Bale, kpəsəye, əndje na də əmə gâ ətshi ngbanga mbrə əpʉ kə za lɔsu əmə gâ pâ əpʉ ama Ndjapä ə̂në tshə pâ kə alätä ä kɔ. 7 Amarä morofo amanə bishi nə̂ əgɔ nə̂ ä zâ lɔsu əndje gâ pâ əpʉ səkɔ ndə kə pa ndəma Ndjapä nə mbrə â əndje sə kə vrɔ ətshə alɔnɔ̂ sɔ də tsheləbu sɔ də alɔ. Mbrə kə za lɔsu əmə gâ pâ əpʉ səkɔ, wââ əyïngerə, də̂ Ajuwufu nâ də əmə gâ lə ngbanga kɔ. 8 Mbrə yekɔ də̂, e-e Ajuwufu, e wu ənə̂ e ə pa Ndjapä lï lï ndə kə pa tshə she akuzu ne kɔ?

9 «Bale, ənə̂ əmə, leme-e, mə wû ənə̂ əmə ə pa mə sə̂ kə kânga äwä lə aərə nɔ̂ tə̂ əɨrɨ Jezu, əzü tshe Nazaratə. 10 Ərə ə̂në mə mbrə̂ mâ Jeruzalamə kɔ kə sə̂. Əmə də ə̂tə̂ əmə, mə kô azü nə̂ Kristə ngbatshe gâ lə anda kânga, mandânə ə̂në aâgbɔ̂ azü nə̂ aawotokrɔ zâ awlra kə əmə gâ ye kɔ. Bale, alɔ ə̂në azü â yində kə wa ngbanga kuzu gâ lə kumu əndje, mə yîndə nə gâ ndə nə kə əndje. 11 Äwä ngbatshe lə aanda aangbɔ, mə gî əyo tə̂ əndje, ə kô əndje də awlra ə pa əndje gu əɨrɨ Jezu nə. Ə̂në tshelə əmə kô əmə tə̂ əndje rô pâ nə gâ ye kɔ, mə gî əyo tə̂ əndje ʉrrr sɔ lə agala nə̂ atshângâ.»

12 «Ə sə rə də̂, ndə ə̈bə̈ alɔ, aâgbɔ̂ azü nə̂ aawotokrɔ zâ äwä də ama kə əmə, mə nâ mâ Damasə də əɨrɨ əndje. 13 Əyïngerə! Mə sə̂ lə äwä, alɔ sə̂ gu ndə tshegrutshe mə wû ə̈bə̈ ə̂yîəwo ə̂në ə tô mâ lafɔ kɔ, ə tshê dji əmə də agbɔbəngâ ana nə̂ əmə nə, ə tshê ə rô alɔ. 14 Ä-ä nɔ̂, ä tê gâ tə̂ ashɔ â mə djî ə̈bə̈ tshema ə̂në ə pâ əpʉ kə əmə də ama ebrʉ ə pa: "Sɔlə, Sɔlə, bə sə kə gi əyo tə̂ əmə mbrə yekɔ? Bə mbrə awlra ambanə, bə mbrə awlra mata agia ə̂në əndje sə kə trɔ ətshə də ayɔ ə̂në əndje gʉ ama nə ə gʉ kɔ ə sə kə yisə̂ äwä də nə kə ətshə kɔ." 15 Mə yû ətshe ə pa: "Âgbɔ̂ Əyïngerə, bə də̂ əde kə sə̂?" Bale, Âgbɔ̂ Əyïngerə nə kîrə əpʉ kə əmə ə pa: "Əmə, mə də̂ Jezu ə̂në əbə, bə sə kə gi əyo tə̂ əmə kɔ. 16 Bale, äfɔ ə kä gâ lafɔ. Mbrə ə̂në, ərə ə̂në mə bʉ̂ gâ tə̂ zə ndə nə kɔ kə səye: mə kê əbə ndə kə pa bə sə tə əyïkosəra nə̂ əmə də awopandəma aərə nə̂ əmə ə̂në bə wû gâ ye kɔ gâ ndə aənə̂ sə̂ ə̂në mə yisə̂ nə kə əbə je kɔ kə azü. 17 Mə djɔ̂ əbə lə takpa tə̂ Ajuwufu də ə̂dû amarä ə̂në mə sə kə wla əbə kə əndje kɔ. 18 Mə wla əbə ndə kə pa bə vru ala əndje, kanika əndje tshi äwä əbutshe tʉ ə gu ndə ə̂yîəwo, ə tshi äwä awlra nə̂ Sataa tʉ ə gu gâ ndə Ndjapä, kanika tshelə anyaka nə̂ əndje gba, əndje sɔtə̂ ətshe lə takpa tə̂ azü ə̂në əndje sə tə azü nə̂ Ndjapä kɔ tə̂ äwä kə za lɔsu əndje kə əmə."»

19 «Âdârə ə̂në, əyïngerə Agripa, mə wə̂ra tə̂ əmə wə̂ra tə̂ əpʉ ama ərə səkɔ ə̂në ə tô mâ lafɔ ə̂në mə wû kɔ ne. 20 Bale, mə vɔ̂tə̂ kə mʉ əpʉ kə azü əgɔ Damasə ətshinə, mandânə kə azü gala Jeruzalamə, kə azü ashɔ əgɔ Jude nɔ̂, gâ mandânə kə azü əgɔ ə̂në əndje sə sə tə Ajuwufu ne kɔ. Mə pâ kə əndje ə pa əndje tshi äwä angbrɔ kə mbrə tə̂ əndje tʉ, ə do tə̂ əndje gu nə gâ ndə Ndjapä, ə mbrə aərə ə̂në ə yisə̂ nə ə pa əndje tshî angbrɔ äwä kə mbrə tə̂ əndje nə tʉ gâ ye kɔ. 21 Mbrə əpʉ səye də̂ Ajuwufu têgbɔ əmə lə Anda Ndjapä â yîndə kə wo əmə kɔ. 22 Bale, Ndjapä bâta əmə â mə daka pə ʉrrr ndjɔ kpəsəye â yisə̂ əpʉ səye ətshi azü nɔ̂: aəngʉ azü də aâgbɔ̂ azü kɔ. Mə yîsə̂ ə̈bə̈ əpʉ yî kpî tə̂ əpʉ ərə ə̂në aawopandəma Ndjapä gâ ndə Mayïzə pâ ə wutu je kɔ ne. 23 Əpʉ nə də̂: Kristə nə ə wu əyo je ə she tə əlî əzü lə takpa tə̂ akuzu je, ə mʉ əpʉ ə̂yîəwo kə she azü lə kuzu kɔ kə azü əgɔ nə̂ ä də azü ə̂në əndje sə sə tə Ajuwufu ne kɔ je.»

24 Ə̂në Palɔ nə sə̂ kə pa əpʉ gâ pâ əpʉ nə̂ ye nə rə kɔ, Festusə nə tâ râwâ ə pa: «Palɔ, ângwâ sə lə kumu zə a! Bə wusə̂ ərə ʉrrr ə mbrə əbə tə yïrə̈ gâ ye a!» 25 Palɔ nə kîrə əpʉ kə ətshə ə pa: «Âgbɔ̂ əzü Festusə, yïrə̈ mbrə əmə mbrə ne. Bale, djatra aəpʉ də aəpʉ nə̂ aə̂rɔ̂ azü də̂ mə pa kɔ. 26 Əyïngerə djî əpʉ aərə səkɔ gâ ye, rəkɔ, mə sə kə pa əpʉ orâ orâ kə ətshə. Mbrə ə̂në mə wûsə̂ nə ngâ ə pa tshə tshɔ tshɔ ndə kə wusə̂ nə ne, mbrə ə̂në ərə səkɔ wû wûtu lə angbanə ne. 27 Əyïngerə Agripa, bə yində əpʉ ə̂në aawopandəma Ndjapä nə pâ kɔ də lɔsu zə a? Mə wusə̂ nə ə pa bə yində əpʉ nə də lɔsu zə!» 28 Bale, Agripa nə pâ kə Palɔ nə ə pa: «Bə pa ənə̂ zə ə pa bə sə kə do əmə tə əzü nə̂ Kristə nə kʉ diawû rə a?» 29 Palɔ nə kîrə əpʉ ə pa: «Â sə mə katshä katshä səye wala ndə ə̈bə̈ alɔ, mə yu Ndjapä ə pa ə də̂ kʉtə̂ əbə də̂ ne, bale, e-e də azü nɔ̂ ə̂në əndje djî əpʉ nə̂ əmə kpəsəye kɔ, e do tə̂ e mata ə̂në mə səye, kʉtə̂ ərə bale, əndje i e i də ə̂wû kowɔ ne!» 30 Bale, əyïngerə də komandâ əgɔ nə gâ ndə Berenisə gâ ndə azü nə ə̂në əndje də aəndje sə̂ gâ tʉ lə anda ngbanga nə kɔ, âfɔ 31 â ə̂në əndje sə̂ kə gbətɔ tə̂ əndje gashe kɔ, əndje pâ lə takpa tə̂ əndje ə pa: «Koshe səye mbrə̂ ə̈bə̈ ərə mbrə̂ bale ə̂në ə lï də kuzu wala də kânga kɔ ne.» 32 Bale, Agripa nə pâ kə Festusə nə ə pa: «Əndje wôra kəmə koshe səye gâ ye, kədə tshə pâ pâ ndə kə wu kəmə Sezarə ne.»