1 Alɔ ə̂në Piarə gâ ndə Zââ nə dâka pə kə pa əpʉ kə ə̂kpû azü nə kɔ, aawotokrɔ də âgbɔ̂ əzü nə̂ atrugu Anda Ndjapä gâ ndə Asadusa yî kumu əndje. 2 Tshelə əndje kô əndje wââ mbrə əpʉ ə̂në Piarə gâ ndə Zââ sə̂ kə yisə̂ nə kə azü nə ə pa Jezu shê gâ ye, rəkɔ akuzu sə kə she nə kɔ. 3 Azü nə têgbɔ əndje ə kô əndje gâ lə anda kânga ʉrrr ora, mbrə ə̂në alɔ dɨ̂ gâ ye. 4 Bale, lə takpa tə̂ əndje ə̂në əndje djî əpʉ nə̂ azü-awla nə kɔ, azü ngbatshe yîndə əpʉ nə də lɔsu əndje â kumu azü ə̂në əndje zâ lɔsu əndje kə Jezu kɔ ngbâ mata sake mindû.

5 Tshe nə krâ, əgbro azü nə̂ Ajuwufu nə də aâgbɔ̂ azü nə gâ ndə aawoyisə̂ âgbɔ̂ əpʉ nə̂ Mayïzə ngbô tə̂ əndje gâ tə̂ nə mâ Jeruzalamə. 6 Âgbɔ̂ awotokrɔ Aanə də Kayifə də Zââ də Alegəzandrə gâ ndə azü tshelə bəngʉ nə̂ âgbɔ̂ əzü nə̂ aawotokrɔ nɔ̂ də ə̂tə̂ əndje sə̂ je. 7 Əndje zâ ama ə pa əndje na də Piarə gâ ndə Zââ nə gâ ətshi alane â əndje yû əndje ə pa: «E grɔ̂ rəka tə̂ koshe səke də awlra yekɔ wala də əɨrɨ əde?» 8 Bale, Âgbɔ̂ Yîrə̂ sû Piarə nə trɔ̂ â tshə pâ kə əndje ə pa: «Amakɔndji də aâgbɔ̂ azü, 9 mata ə̂në e yû ä kpəsəye gâ pâ ə̂rɔ̂ ərə ə̂në ä mbrə̂ kə wurtʉ, gâ pâ äwä ə̂në rəka nə̂ ye nglɔ̂ kɔ, 10 e wüsə̂ nə ngâ kane, e-e nɔ̂ də azü əgɔ Isərayalə nɔ̂: də əɨrɨ Jezu Kristə nə̂ əgɔ Nazaratə, ətshə ə̂në e kû ətshə gâ ala masheyɔ â Ndjapä shê ətshə gâ ye kɔ, də̂ koshe səye kâ gâ ətshi e də ə̂rɔ̂ akwa ye kɔ. 11 Jezu nə sə tə ətshə ə̂në Fraka nə̂ Ndjapä pâ əpʉ gâ pâ ye ə pa:

"Əkpʉ ə̂në e-e, aawombrə anda, e wə̂ra tə̂ e tə̂ nə kɔ,

ə dô tə̂ ye tə âgbɔ̂ əkpʉ ə̈nü anda nə."*4.11 Wu Ətsh 118.22; Mat 21.42.

12 «Kə she lə kuzu sə kʉ tə̂ äwä ye, mbrə ə̂në pâ ashɔ nɔ̂, ə̈bə̈ əɨrɨ kpî ə̂në Ndjapä zâ lə takpa tə̂ azü ndə kə pa əzə̂ she lə kuzu tə̂ äwä nə kɔ guta gu bale ne.»

13 Kumu aawowa ngbanga nə̂ Ajuwufu nə kpê pa əndu əndje, mbrə ə̂në Piarə gâ ndə Zââ nə pâ əpʉ nə pâ də awa ne, əndje ə̂në əndje sə̂ tə aamba azü ə mânda ərə mânda ne kɔ. Azü nə yêrɔ əndje kpro tə azü ə̂në əndje sə̂ leme-e gâ ngotə̂ Jezu kɔ. 14 Bale, əndje wû koshe nə ə̂në rəka nə̂ ye nə nglɔ̂ gâ ye kɔ, tshə kâ gâ ngotə̂ Piarə nə də Zââ nə, əndje sə̂ sə̂ də ə̈bə̈ əpʉ bale ndə kə pa əndje pa ne. 15 Əndje zâ ama kə Piarə nə gâ ndə Zââ nə ə pa əndje wûtu lə anda ngbanga nə gashu. Mandânə, əndje pâ ashera lə takpa tə̂ əndje. 16 Əndje pâ: «A sə kə mbrə yekɔ tə̂ azü səye? Mbrə ə̂në azü əgɔ Jeruzalamə nɔ̂ wusə̂ nə ngâ ə pa azü səye kə mbrə̂ ərə ə̈lü səye kɔ â äwä ndə kə pa a vʉsə̂ nə guta gu ne. 17 Bale, ndə kə pa əpʉ səkɔ za ətshe za kwatə̂ye na na ye lə takpa tə̂ azü ne, a shëra əndje ə ngä kə əndje ə pa əndje kwa tə̂ əndje kwa ə pa əpʉ mandânə səye kə ə̈bə̈ əzü də əɨrɨ Jezu ne.» 18 Bale, əndje ê Piarə nə gâ ndə Zââ nə ə pâ kə əndje ə pa əndje pa əpʉ pa ə yisə̂ ərə yi kwatəndje də əɨrɨ Jezu ne. 19 Bale, Piarə nə gâ ndə Zââ nə kîrə əpʉ kə əndje ə pa: «Ə sə tə ə̂rɔ̂nə, lə ala Ndjapä, ndə kə pa ä dji əpʉ ama e ə ro kə dji əpʉ ama Ndjapä a? E-e kə wu. 20 Ənə̂ ä, ä lï lï ndə kə pa ä ngbo ama ä gâ tə̂ nə də əpʉ ərə ə̂në ä wû ə djî gâ ye kɔ ne.»

21 Alayïngbanga nə ngâ kə əndje kwatəndje, mandânə, ə kâ tə̂ əndje. Əndje sɔ̂tə̂ ə̈bə̈ əpʉ sɔ̂ ndə kə pa əndje mbrə̂ ə̈bə̈ ərə tə̂ əndje mbrə nə ne. Mbrə ə̂në azü nɔ̂ sə̂ kə mbe Ndjapä mbrə ərə ə̂në ə wûtu kɔ. 22 Koshe nə ə̂në rəka nə̂ ye nə nglɔ̂ tə̂ äwä ərə ə̈lü səkɔ sə̂ də ə̂ngû ə rô zazü bishi gâ ye.

23 Ə̂në əndje kâtə̂ əndje trale kɔ, Piarə nə gâ ndə Zââ nə gû mâ lə takpa tə̂ agbɔbəngâ əndje nə ə pâ ndəma əpʉ ərə ə̂në aâgbɔ̂ azü nə̂ aawotokrɔ nə də aâgbɔ̂ azü nə pâ kə əndje kɔ. 24 Alɔ ə̂në azü nə djî ndəma əpʉ nə ə̂në əndje pâ kɔ, azü nə yû Ndjapä mvrɔ ə pa: «Əyïlingû, əbə kə mbrə̂ tshelafɔ, də ashɔ, də ə̂ngû əngbrʉ gâ ndə aərə tshelə nə nɔ̂ kɔ. 25 Əbə kə pâ əpʉ, tə̂ äwä Âgbɔ̂ Yîrə̂, lə ama Davidə, tə ätä ä, tə əyïkosəra nə̂ zə, ə pa:

"Mbrə yekɔ də̂ amarä kpî âfɔ də əpʉ awlra kɔ?

 azü aəgɔ sə kə pa əpʉ ə̂në âdâ nə guta gu ne kɔ?

26 Alayïngerə tshepashɔ gâmba tə̂ əndje mbrə kowɔ

â amakɔndji âfɔ də awlra tə̂ Əyïlingû də Kristə nə̂ ye."*4.25-26 Wu Ətsh 2.1-2.

27 «Mbrə ə̂në, tə djatra əpʉ, Erɔdə gâ ndə Pasə Pilatə ngbô tə̂ əndje gâ tə̂ nə, lə gala səye də amarä kpî də azü əgɔ Isərayalə ə âfɔ də əpʉ gâ tə̂ Jezu, əyïkosəra nə̂ zə ə̂në tshə sə kpî kɔ, ə̂në bə kê ətshə tə Kristə gâ ye kɔ. 28 Əndje mbrə̂ ərə nɔ̂ ə̂në bə zâ ama, tə̂ äwä awlra nə̂ zə, ə yîndə nə angbʉlînə ndə kə mbrə nə gâ ye kɔ. 29 Kpəsəye, Əyïlingû, djï kə nga ə̂në əndje ngâ kə ä kɔ. Zä awlra kə ä ndə kə pa ä pa əpʉ nə̂ zə pa də awa bale ne. 30 Yïsə̂ awlra nə̂ zə gashu ndə kə pa arəka nə̂ azü nglɔ, aərə ə̈lü də aərə ə̂në kumu azü ə kpe pâ əndu əndje mbrə nə kɔ wutu də əɨrɨ Jezu, əyïkosəra nə̂ zə ə̂në tshə sə kpî kɔ.»

31 Alɔ ə̂në əndje yû Ndjapä ə nglɔ̂ gâ ye kɔ, ətshe nə ə̂në əndje sə̂ tə̂ nə kɔ même tə̂ ye. Âgbɔ̂ Yîrə̂ sû əndje nɔ̂ trɔ̂ â əndje vɔ̂tə̂ kə mʉ Əpʉ Ndjapä mʉ də awa ne.

32 Ə̂kpû azü nə ə̂në əndje zâ lɔsu əndje kə Jezu kɔ djî tə̂ əndje lə əpʉ nə̂ əndje də lɔsu əndje bale də yîrə̂ əndje bale. Əzü bale pâ pâ ərə nə̂ əne sə tə ənə̂ əne ne, bale əndje ngbô aərə nə̂ əndje nɔ̂ gâ tə̂ nə bale ə krû tshelə nə lə takpa tə̂ əndje. 33 Azü-awla nə yîsə̂ əpʉ kə she Âgbɔ̂ Əyïngerə Jezu də âgbɔ̂ awlra â Ndjapä yîsə̂ ə̂rɔ̂tə̂ ye kə əndje nɔ̂ tə̂ äwä kpî kpî kpî. 34 Ə̈bə̈ əyïəyo sə̂ sə̂ lə takpa tə̂ əndje bale ne, mbrə ə̂në alayïnga akəndɨ də alayïnga aanda kâ akəndɨ də aanda nə̂ əndje nə ə nâ də ngendja nə 35 ə kô kə azü-awla nə. Əndje krû tshelə ngendja nə tə̂ əzü bale bale ə lï də ərə ə̂në tshə mâ əgo nə kɔ.

36 Ə̈bə̈ koshe sə̂ je, əɨrɨ ye də̂ Jozafu, azü-awla nə ê ətshə ə pa Barənabasə, âdâ nə kə də «awogbɔgbɔ lɔsu azü». Tshə sə̂ lə marä nə̂ Levi, tə əzü əgɔ Shiprə. 37 Tshə kâ ə̈bə̈ kəndɨ nə̂ ye ə nâ də ngendja nə ə kô kə azü-awla nə.