1 Kʉ pə tə̂ alɔ nə səkɔ, Sɔlə kâ kâtə̂ kə li tshelə ye gâ pâ kə mbrə aəmbrʉ aərə tə̂ atrawaya nə̂ Âgbɔ̂ Əyïngerə də kə wo əndje ne. Tshə nâ ə wû âgbɔ̂ awotokrɔ 2 ə yû ətshə tə̂ fraka ə̂në ə za äwä kə ətshə ndə kə pa tshə na ə li aanda aangbɔ mâ Damasə ndə kə pa tshə â sɔtə̂ alabə̈ azü, akoshe də ayashe ə̂në əndje sə̂ kə za äwä nə̂ Jezu kɔ, tshə i əndje ə gu də əndje mâ Jeruzalamə.

3 Alɔ ə̂në tshə sə̂ pə lə äwä ə ndô trö də Damasə nə gâ ye kɔ, bə pa bə dji, ə̈bə̈ ə̂yîəwo tô mâ lafɔ ə jêrə ə tshê dji ətshə. 4 Tshə tê gâ tə̂ ashɔ, ə djî tshema ə̂në ə pâ kə ətshə ə pa: «Sɔlə, Sɔlə, bə sə kə gi əyo tə̂ əmə mbrə yekɔ?» 5 Tshə yû ətshe ə pa: «Âgbɔ̂ Əyïngerə, bə də̂ əde kə sə̂?» Tshema nə kîrə əpʉ ə pâ: «Əmə, mə də̂ Jezu ə̂në əbə, bə sə kə gi əyo tə̂ əmə kɔ. 6 Bale, äfɔ ə nä mâ lə gala nə, mâ je, əndje sə kə yisə̂ ərə ə̂në bə lï ndə kə mbrə nə kɔ kə əbə.»

7 Azü ə̂në əndje də a-Sɔlə nə sə̂ kə na ana nə kɔ kâ ə sə̂ kʉ ngboo də awa. Əndje djî tshema nə, bale əndje wû əzü wû bale ne. 8 Sɔlə nə âfɔ tə̂ ashɔ nə â ala ye sə̂ ngaa, bale tshə wû ərə wû bale ne. Əndje têgbɔ kəna ye ə têgbɔ ndə kə pa əndje na də ətshə mâ Damasə je. 9 Tshə mâ əlo vəta ə lîshi lî, ə zɨ̂ rəgo zɨ̂ wala ə ndjû ə̂ngû ndjû ne.

10 Kandää, ə̈bə̈ trawaya sə̂ je mâ Damasə nə, əɨrɨ ye kə də̂ Ananiasə. Âgbɔ̂ Əyïngerə pâ kə ətshə lə ə̈bə̈ kə wu ərə mata ə̈lü ə pa: «Ananiasə!» Tshə yîndə nə ə pa: «Âgbɔ̂ Əyïngerə, əmə kə səye!» 11 Bale, Âgbɔ̂ Əyïngerə nə pâ kə ətshə ə pa: «Äfɔ ə nä mâ lə äwä ə̂në əndje e ə pa "äwä ndji" kɔ ə yü tshuku ə̈bə̈ əzü nə̂ əgɔ Tarsə, lə anda nə̂ Zudə, əɨrɨ ye kə də̂ Sɔlə. Tshə sə̂ kə yu Ndjapä, 12 bale tshə wû ə̈bə̈ ərə mata ə̈lü ə wû ə̈bə̈ koshe ə̂në əɨrɨ ye kə də̂ Ananiasə kɔ, tshə lî ə kô kəna ye gâ pâ ye ndə kə pa ala ye nə sɔ.» 13 Ananiasə nə kîrə əpʉ ə pa: «Âgbɔ̂ Əyïngerə, mə djî lə ama azü ngbatshe ə pa koshe səkɔ mbrə̂ aəmbrʉ aərə ngbatshe tə̂ azü nə̂ zə lə Jeruzalamə. 14 Tshə nâ kotəye də awlra ə̂në aâgbɔ̂ azü nə̂ aawotokrɔ zâ kə ətshə kɔ ndə kə pa tshə i azü nɔ̂ ə̂në əndje dji əɨrɨ zə kɔ.» 15 Bale, Âgbɔ̂ Əyïngerə nə pâ kə ətshə ə pa: «Nä je, mbrə ə̂në mə kê koshe səye tə əyïkosəra nə̂ əmə ndə kə pa tshə yisə̂ əɨrɨ əmə kə aata amarä də alayïngerə nə̂ əndje ndje kə azü əgɔ Isərayalə ka əndje yerɔ. 16 Mə sə kə yisə̂ aərə əyo nɔ̂ ə̂në tshə wu je mbrə əɨrɨ əmə kɔ kə ətshə.»

17 Bale, Ananiasə nə nâ na ye. Alɔ ə̂në tshə lî gâ lə anda nə, tshə kô kəna ye gâ pâ Sɔlə nə ə pâ: «Sɔlə, aye əmə, Âgbɔ̂ Əyïngerə Jezu ə̂në tshə bʉ̂ gâ tə̂ zə lə äwä ə̂në bə nâ tə̂ nə kɔ, wlâ əmə ndə kə pa ala zə sɔ, ndje Âgbɔ̂ Yîrə̂ su əbə trɔ̂.» 18 Kʉ pə kôto, alabə̈ aərə yɔ̂ lə ala Sɔlə nə gâ tʉ mata adjepe giangû â tshə vɔ̂tə̂ kə lishi. Tshə âfɔ ə zâ batamo. 19 Mandânə, tshə zɨ̂ rəgo â gbɔ̂gbɔ tə̂ ye.

Sɔlə nə dâka pə gâ ndə atrawaya ə̂në əndje sə̂ mâ Damasə nə je kɔ gâ tə̂ alabə̈ aəlo. 20 Bale, kʉ pə kôto, tshə vɔ̂tə̂ kə yisə̂ əpʉ lə aanda aangbɔ ə pa Jezu sə tə Ɨrɨ Ndjapä. 21 Azü nɔ̂ ə̂në əndje djî əpʉ nə̂ ye kɔ, kumu əndje kpê pâ əndu əndje â əndje pâ: «Ə də̂ ətshə ə̂në tshə gî əyo tə̂ azü ə̂në əndje dji əɨrɨ Jezu mâ Jeruzalamə kɔ də̂ kə sə̂ ne a? Tshə nâ nâ koye ndə kə pa tshə ko əndje ə i əndje ə gu də əndje kə aâgbɔ̂ azü nə̂ aawotokrɔ ne a?»

22 Bale, Sɔlə nə gbɔ̂ ə gbɔ̂ alɔnɔ̂ də kə yisə̂ əpʉ nə, ə yîsə̂ əpʉ nə ə pa Jezu sə tə Kristə nə â Ajuwufu ə̂në əndje sə̂ mâ Damasə nə kɔ wû əpʉ ə̂në əndje pa kə ətshə kɔ wû ne.

23 Əndʉ nə dɨ̂ mandânə, Ajuwufu nə djî tə̂ əndje ndə kə wo Sɔlə nə. 24 Bale, Sɔlə nə djî ndə nə. Əndje kpêa ndje amanda tshelə gala nə ə kpêa də alɔ də tsheləbu ndə kə pa əndje wo ətshə. 25 Bale, də ə̈bə̈ tsheləbu, atrawaya nə̂ ye zâ ətshə gâ lə ə̈bə̈ mbogɔ̂ ə jêrə də ətshə də nə gâ tʉ tə̂ dati ə̂në ə sə̂ dji gala nə kɔ.

26 Alɔ ə̂në Sɔlə nə yî kumu ye mâ Jeruzalamə kɔ, tshə prâ äwä ndə kə pa tshə na gâ lə ə̂grû tə̂ atrawaya. Bale, əndje nɔ̂ kpê rawa ye ə kpê, əndje wû wû ə pa tshə sə̂ ngâ tə̂ ə̈bə̈ trawaya gâ ye ne. 27 Bale, Barənabasə zâ ətshə gâ ngotə̂ ye ə nâ də ətshə gâ tə̂ azü-awla nə. Tshə pâ ndəma äwä ə̂në Sɔlə nə wû Âgbɔ̂ Əyïngerə ə̂në tshə pâ əpʉ kə ətshə lə äwä kɔ kə əndje. Tshə pâ ndje ndəma äwä ə̂në Sɔlə nə pâ əpʉ orâ orâ də əɨrɨ Jezu mâ Damasə kɔ kə əndje. 28 Kʉ pə tə̂ alɔ nə səkɔ, Sɔlə nə dâka pə kʉ kpə ngotə̂ əndje, əndje də aəndje nâ ana lə gala Jeruzalamə nə â tshə yîsə̂ əpʉ orâ orâ də əɨrɨ Âgbɔ̂ Əyïngerə nə. 29 Tshə pâ əpʉ ə shêra ndje ashera də Ajuwufu ə̂në əndje pa ama grakə kɔ. Bale, əndje prâ äwä ndə kə pa əndje wo ətshə. 30 Alɔ ə̂në alaye azü lə Kristə djî ndə nə, əndje zâ ətshə ə nâ də ətshə mâ Sezare ə wlâ ətshə gu nə mâ Tarsə.

31 Ə vɔ̂tə̂ nə tə̂ alɔ nə səkɔ, Laglizə sə̂ lə blatshe lə ashɔ aəgɔ Jude də Galile gâ ndə Samari nɔ̂. Laglizə nə gbɔ̂gbɔ tə̂ ye, ə mbrə̂ aərə tə̂ äwä kə kpe rawa Âgbɔ̂ Əyïngerə â gêrə tə̂ äwä Âgbɔ̂ Yîrə̂.

32 Piarə nâ tə̂ aətshe lə aəgɔ səkɔ nɔ̂. Tshə nâ ndje mâ ndə azü nə̂ Ndjapä ə̂në əndje sə̂ mâ Lida kɔ. 33 Mâ je, tshə tê ə̈bə̈ koshe ə̂në əɨrɨ ye kə də̂ Ene kɔ. Alabə̈ aərə tshekotə̂ koshe səkɔ tshû gâ ye â tshə shô ə shô kʉ gâ pâ klʉngbʉ lə ə̂ngû mindû amanə vəta. 34 Piarə nə pâ kə ətshə ə pa: «Ene, Jezu Kristə grɔ̂ rəka tə̂ zə gâ ye! Äfɔ ə gämba klʉngbʉ nə̂ zə nə də ə̂tə̂ zə.» Bale, kʉ pə kôto, tshə âfɔ. 35 Azü tshelə Lida də tshelagɔ akpla ətshe əgɔ Sarɔ nɔ̂ wû ətshə â dô tə̂ əndje gu nə gâ tə̂ Âgbɔ̂ Əyïngerə.

36 Ə̈bə̈ yashe sə̂ je mâ Jope, tə trawaya nə̂ Jezu, əɨrɨ ye kə də̂ Tabita, ə̂në əndje ê də ama grakə ə pa «Dorəkasə» kɔ, âdâ nə kə də̂ «Mble». Tshə sə̂ kə mbrə kʉtə̂ aə̂rɔ̂ aərə kə azü ə kô aərə kə alayïəyo. 37 Ndə ə̈bə̈ alɔ, rəka zâ ətshə â tshə tshû. Əndje yɔ̂ ətshə ə zâ ətshə gâ lə ə̈bə̈ bəlindəyea djoko lafɔ. 38 Gala Lida nə dɨ̂ dɨ̂ tə̂ Jope nə ne. Atrawaya mâ Jope nə djî ə pa Piarə nə sə̂ mâ Lida, əndje wlâ alabə̈ akoshe bishi kə ətshə ə kɨ̂ ə̂sə̂ əyo tə̂ əndje kə ətshə ə pa: «Nä katshä mâ ndə ä mâtəye kane!» 39 Piarə nə âfɔ katshä â əndje də aəndje gû na ye. Alɔ ə̂në Piarə nə yî kumu ye mâ je, əndje ô də ətshə mâ lə bəlindəyea nə djoko lafɔ je. Ayashe koya nɔ̂ nâ gâ tə̂ ye də əkɨ ə mâ aəkro ləba də aə̈ngrʉ̈ aləba ə̂në Dorəkasə nə sû alɔ ə̂në tshə dâka pə tə sorô kɔ kə ətshə. 40 Piarə nə grɔ̂ azü nə nɔ̂ lə anda nə gashu, ə gbə̂te ə yû Ndjapä. Mandânə, tshə dô tə̂ ye gâ tə̂ kuzu nə ə pâ: «Tabita, äfɔ!»

Bale, Tabita nə vrû ala ye â alɔ ə̂në tshə wû Piarə nə kɔ, tshə âfɔ ə sə̂ gâ tʉ. 41 Piarə nə têgbɔ kəna ye ə gbə̂tɔ ətshə gâ lafɔ. Mandânə, tshə ê azü nə̂ Ndjapä də ayashe koya nə ə mâ ətshə kə əndje tə sorô nə. 42 Azü tshelə Jope nə nɔ̂ djî ndə əpʉ səkɔ â ə̂kpû azü zâ lɔsu əndje kə Âgbɔ̂ Əyïngerə. 43 Piarə nə dâka pə mâ Jope nə mâ je ʉrrr gâ tə̂ ə̈bə̈ əlo mâ ndə ə̈bə̈ awombrə kosəra akwa, ə̂në əndje ê ətshə Shemɔ kɔ.