Mateo 25

Kutongwa kwoKupejeleja

31 "Paachezha Mwananhulumyana woNhu mukungaima kukwe, akale ingilozi jose jilinaye, pakalepo unoogala pechigalo chiche chobushe chinongaima. 32 Mbeli kukwe kunookubunganywa induji jose, akale iye unoojipambulanya, sondyisi epambulanya imhwizi nembuji, 33 akale unoobiga imhwizi kululyi lulwe, koga imbuji kuchesho. 34 Ngweno She unooti kuna yabo baiko kululyi lulwe, ‘Izhani, imwi balokombolelwa baTate bangu, tolani ishabo lyobushe bumwakalonganyilwa kuvila kumatangisilo enyika, 35 nokuti ndilinenzhala mwakandipa zwokulya, ndilinenyota mwakandipa zwokunwa, ndilimwezi mwakanditambula, 36 ndakabeli chinkuna mwakandimbajika, ndilwala mwakandishanyila, ndilimuntolongo mwakezha kwandili.’ 37 Pakalepo bakalulama banooshandula beti, ‘Tezi ndilini patakakubona ulinenzhala tikakupa cholya, kana ulinenyota tikakupa chonwa? 38 Akale ndilini patakakubona uli mwezi tikakutambula, kana ulichinkuna tikakumbajika. 39 Akale ndilini patakakubona ulwala kana uli muntolongo akale tikakushanyila?’ 40 Akale She unoobashandula eti, ‘Chokomende ndoti kwamuli, yezwo zwamwakatila umwe wabanakwaina bangu upopasi, mwakazwitila imi.’ "

41 "Pakalepo unooti kuna yabo baiko kuchesho chiche, ‘Ibhudani kwandili, imwi mulofizhwa, mungwine mumoto usinopela wakalonganyilwa guluzhanje nengilozi jije, 42 ndakabeli nenzhala, amujakandipa zwolya, ndakabeli nenyota akale amujakandipa zwonwa, 43 ndakabeli mwezi akale amujakanditambula, ndilichinkuna amujakandimbajika, ndilwala akale ndili muntolongo, amujakandishanyila.’ 44 Pakalepo naibo banooshandula beti, ‘Tezi, ndilini patakakubona uli nenzhala, uli nenyota, uli mwezi, ulichinkuna, ulwala, kana ulimuntolongo, tikasokubhancha?’ 45 Pakalepo She unoobashandula eti, ‘Chokomende ndinoti kwamuli, sezwo musakatila umwe waaba bopasi, amujakanditila.’ 46 Akale ibo banoonda kukulangwa kusinopela, koga balolulama banoongwina mubupenyu businopela."