1 Reis 2

Ikpongannạm-tọhna s’Devid ọnạngẹ Sọlọmọn

1 Masẹ obo kw’Devid nạngka ofora, wa onạngẹ nnwa kwẹ Sọlọmọn ntọhna bẹ́:

2 "Amma nabạra mpe, ọma be bẹ́ gwuk, asi idik masẹ ujunung, 3 asi idik nnọma s’Ọvaar Ubinọkpaabyi, kw’ode Ubinọkpaabyi kwọ, ororu: Ọma senga abẹ k’ikpukpobha, achok akpebhi pẹ, ọttạra ntọhna sẹ, ọttạra nnyina sẹ, ọttạra nttọhna sẹ ator k’oche kw’abẹ akkẹrẹ k’Nnyina s’Mosẹs. Si idik nnọ ọfha asenga ma akhaama ẹnnaanga k’ọttọhk fidede f’m’asi, ọttạra k’ibyi sidede s’mata, 4 k’oche kw’Ọvaar Ubinọkpaabyi m’okke ochok echekha chẹ ch’ọnạng-m bẹ́: ‘De iva p’iva pọ arukhu akpen k’oche kw’ọbaan bẹ́, abẹ aruk, abẹ abạra atima nttem sabẹ phyibh, ọttạra akpakpa pabẹ phyibh atwạn abaamẹ, itwuna kéde bẹ́, m’akhaama ọnạng ọkhaama kw’m’ọtạkha ẹvaarchi k’Israẹl.’

5 "Ọma oyeni asong udik ma kw’Joab kw’ode nnwa kw’Zeruya usi-m, oche kw’ọfhọ adecho afa p’akpongnạng p’Israẹl, p’ade: Abnẹr kw’ode nnwa kw’Nẹr, ọttạra Amasa kw’ode nnwa kw’Jẹtẹr. Ọfhọ bẹ obyenga isẹ sabẹ k’okpe kw’ẹmẹm, aben bẹ́ k’okpong-kpe gwọ, ọtạkha isẹ nnọ ofokha k’udikhikpa kwẹ kw’irin, ọttạra k’akpafhok py’oge. 6 Tima ekkoji chọ siẹ-ẹ oche kw’ọdaakh-ọ, tạrr okhebha ma ọnwa k’epekwur, kẹ ọbọhk kátte uruk akpen.

7 "Okhenka, si ijibha anạng iva p’Barzilayi kw’ubin Gilead. Tte abẹ attạra k’anạng p’n’achi uchiattọhk k’okpokkro kwọ, khiri wa abẹ abe abaamẹ k’okpe kw’nnạbhọ k’mbọhk s’nnwatte Absalọm.

8 "Kàbonu bẹ́, Shimeyi kw’ode nnwa kw’Gẹra kw’ubin Bahurim, k’ẹkhạma ch’Bẹnjamin uning abọ ma. Ẹma wọ wa ọsaakh-m ipyibha-ipyibha k’iwu njọ ch’nsengi mfona k’Mahanayim. Masẹ ọsạk okhebh-m k’Jọrdan, nchekhi k’eche ch’Ọvaar Ubinọkpaabyi nnạng-ẹ bẹ́, ‘Amma ọkkangkkang-kkro mạ́ntima mfhọ-ọ.’ 9 Okhenka, kẹ kátạkha masẹ ọnạng kw’nạ́n aponga-pyibha ọkhaam. Ọma ade ujunung kw’ekkoji, m’asonga-osonga oche kw’m’asi. Se bẹ́ akhạbhọ bẹ age k’epekwur ẹtaanga."

10 Wa Devid ope otor ab’otte, abẹ annọhng-ẹ k’efhondiden ch’Devid. 11 Wa Devid ode ọvaarnạng k’Hẹbrọn k’icho isenọfa, ọbạra ode ọvaarnạng k’Jẹrusalẹm k’icho ẹrạbh ukuma jobh-kanttaan. Phyi-phyibh wa ọdạbhẹ Israẹl k’icho arạbh afa. 12 Ma wọ Sọlọmọn uning ẹyạr k’ẹvaarchi ch’otte Devid, wa ẹvaar chẹ ẹbạra ittima arạnga bẹ́ gwuk.

Ẹvaar ch’Sọlọmọn ittim arạnga

13 Wa Adonija kw’ode nnwa kw’Hagit ofon ọta okhebha Batshẹba kw’ode ọkka kw’Sọlọmọn. Batshẹba ọbạbh-ẹ bẹ́, "Akwu k’ẹmẹm o?"

Ubhina bẹ́, "Uwe e, nkwu k’ẹmẹm e." 14 Ukwu ọttạra bẹ́, "Amma nkhaam udik kw’n’mben bẹ́, mkpaakh-ọ e."

Batshẹba ọbẹ́, "Kpaakh-m."

15 Oben bẹ́, "Ọma asong ma bẹ́, ọvaarfhon ngwa ode kwaam. Anạng p’Israẹl phyibh achokhu ichen bẹ́, amma wọ ndạbhẹ bẹ. Okhenka, idik ikwu ibhạkhẹ ininga. Ma, nnwotte kwaam wọ n’ọkhaam ọvaarfhon, ukwuru s’Ọvaar Ubinọkpaabyi otte kwẹ ọbọhk ọnạng-ẹ. 16 Amma nkhaam udik gwạnọ kw’n’mben bẹ́, mphyem, khaam kwẹ kárạm o."

Oben bẹ́, "Kpaakh-m kwẹ."

17 Ma wọ ofon ororo oben bẹ́, "Totokhạn, ben ọvaar Sọlọmọn ọnạng-m Abishag kw’ubin Shunam, ntạkh-ẹ k’ọbada. Amma nsong ma bẹ́, ọma khaam udik ngwa márạm."

18 Batshẹba ubhina bẹ́, "Ọbaan ma, amma m’mkpaak ọvaarnạng udik ngwa ọkpaak k’akhọ k’echo."

19 Masẹ Batshẹba ọta bẹ́, ọta ọkpaak ọvaar Sọlọmọn udik ngwọ k’echo ch’Adonija, ọvaarnạng ubina ọta okhebh-ẹ, utwunga usima ọkka, bạrasẹ n’ọta uninga ẹyạr k’ẹvaarchi chẹ. Mạnna wọ kw’ọkka uning ẹyạr k’udimbọhk kwẹ.

20 Ukwu oben bẹ́, "Amma n’mben bẹ́, mphyem-ọ idikva e. Totokhạn, khaam kárạm."

Ọvaarnạng oben bẹ́, "Nna kwaam, phyem, khiri kọ mạ́nnạm."

21 Ma wọ obeni bẹ́, "Tte Abishag kw’ubin Shunam ọbọhk anạng nnwatte Adonija, ọtạkh-ẹ k’ọbada."

22 Ọvaar Sọlọmọn ubhina ọkka bẹ́, "Asi yạn aphyem-m bẹ́, ntạkha Abishag kw’ubin Shunam nnạng Adonija k’ọbada? Wạra n’aphyemi adạkhẹ bẹ́, ntạkha ọvaarfhon nnạng-ẹ, ọgba ẹma wọ ode odennạng kwaam. Oche ngwọ gwọ wạra m’agba aphyem anạng Abiyata kw’ode ọfọhnẹja, ọttạra Joab kw’ode nnwa kw’Zeruya!"

23 Ọvaar Sọlọmọn ochekhi k’eche ch’Ọvaar Ubinọkpaabyi bẹ́, "Tte Ubinọkpaabyi ọnạng-m irem, ọbạra asẹ ibạrẹ yạn, de Adonija nạn akpen pẹ nútima otera echo ch’udik kw’ophyemi maa! 24 Oche ngwọ kw’Ọvaar Ubinọkpaabyi urukhu akpen, kw’kk’aam arạnga uttima bẹ́ gwuk, k’ẹvaar ch’otte kwaam Devid, ọbạra usi ẹnạmma chaam ebe oche kw’ochekhi, oyonga Adonija m’ope chemma!" 25 Mạnna wọ kw’ọvaar Sọlọmọn ọnạngẹ Bẹnaya kw’ode nnwa kw’Jehoyada ẹfa, ọta uvun Adonija ọfhọ.

26 Ọvaarnạng oben Abiyata kw’ode ọfọhnẹja bẹ́, "Kpa nnạm k’iwonu sọ s’ining k’Anatọt. Ọma abaan k’obo. Okhenka, amma khọ mạntọmma mạ́mfhọ, ukwuru bẹ́, ọma wọ atọhk Ikwukwur s’Echekha ch’Ọvaar Ubinọkpaabyi kw’Ọyọhng, k’ititikha s’otte kwaam Devid, abạra atạkha okhebh k’irem s’otte kwaam." 27 Mạnna wọ kw’Sọlọmọn ọrạbh Abiyata k’ọtọhm f’afọhnẹja p’Ọvaar Ubinọkpaabyi, otor k’ọtọhnga kw’Ọvaar Ubinọkpaabyi ọkpaakhẹ k’Shilo otena k’ẹchọhmfhạr ch’Ẹli.

28 Masẹ ẹkkaabha njọ ikpir Joab kw’kk’nttọhna ọkhaama ọttạra Adonija, ọyaanga Absalọm ọjẹ, ọrạbh otena k’ukkira kw’Ọvaar Ubinọkpaabyi, ọvạkha abhik p’ijabyi. 29 Wa abẹ akpaakhẹ ọvaar Sọlọmọn bẹ́, Joab kk’ọrạbha ofona k’ukkira kw’Ọvaar Ubinọkpaabyi, ọta uninga ọbaanga ijabyi. Sọlọmọn ọnạng Bẹnaya kw’ode nnwa kw’Jehoyada ẹfa bẹ́, "Sọhng ata avun-ẹ afhọ!"

30 Ma wọ Bẹnaya ofon k’ukkira kw’Ọvaar Ubinọkpaabyi, ọta oben-ẹ bẹ́, "Ọvaarnạng ọbẹ́, ayin k’iyaan e."

Okhenka, oben bẹ́, "Mma, amma m’mpe maa."

Bẹnaya ọbạra utima ẹkkaabha okkena ọvaarnạng, oben bẹ́, "Kkeri oche kw’Joab ubhin-m e."

31 Ma wọ ọvạarnạng obeni Bẹnaya bẹ́, "Si oche kw’obeni. Vun-ẹ fhọ, annọhng-ẹ, ọfha osenga ma, amma ọttạra ẹchọhmfhạr chaam phyibh annaanga iponga-pyibha s’isẹ s’anạng p’Joab ọfhọ. 32 Ọvaar Ubinọkpaabyi wọ m’ọnạng-ẹ irem k’isẹ s’kk’obyenga, ukwuru bẹ́, ẹma utim ọkkangkkang-kkro ọfhọ ajunung afa, k’okpe kw’otte kwaam Devid nạnósong. Anạng mbọ afa ade: Abnẹr kw’ode nnwa kw’Nẹr, ọbạra ode odecho kw’akpongnạng p’Israẹl, ọttạra Amasa kw’ode nnwa kw’Jẹtẹr, kw’ọbạra ode odecho kw’akpongnạng p’Juda, p’ajibhi, abạra ator ọtạm ayọhng-ẹ. 33 Tte iponga-pyibha s’isẹ sabẹ inạna Joab ọttạra iva p’iva pẹ k’echo. Okhenka, tte ẹmẹm ch’Ọvaar Ubinọkpaabyi ininga Devid abẹ, ọttạra iva p’iva pẹ, ọttạra ẹchọhmfhạr, ọttạra ẹvaar chẹ tạrr ipimmanitor."

34 Ma wọ Bẹnaya kw’ode nnwa kw’Jehoyada ofon ọta uvun Joab ọfhọ, wa abẹ annọhng-ẹ kakhẹ k’ọchọhm, k’ibyi s’anạng nạnárukha. 35 Ọvaarnạng n’ọtạk Bẹnaya kw’ode nnwa kw’Jẹhoyada usi odecho kw’akpongnạng, utima otera echo ch’Joab, ọbạra ọtạkha Zadọk kw’ode ọfọhnẹja otera echo ch’Abiyata.

36 Wa ọvaarnạng ọtọhmọ abẹ ayeri Shimeyi, oben-ẹ bẹ́, "Ibyi idwạkh-ọdwạk káta, si ọchọhm kw’m’aruk anạng ọma oyeni k’Jẹrusalẹm. 37 Songa k’udik ọkka bẹ́, iwu ch’ajek Ipekhuma s’Kidrọn, kk’apua e."

38 Shimeyi ọpọhna ọvaarnạng bẹ́, "Udik kw’akpaakhẹ ujibhi ma. Amma ọtọhmnạng kwọ m’nsi-usi oche kw’aro ọvaar kwaam ọkpaakhẹ." Wa Shimeyi uning k’Jẹrusalẹm k’okpe-bhirada.

39 Ukwu ukpira icho ittaan, atọhmnạng afa p’Shimeyi arạbh ator Akish, kw’ode nnwa kw’Maaka, ọbạra ode ọvaarnạng kw’Gat. Wa abẹ akpaakhẹ Shimeyi bẹ́, "Atọhmnạng pọ aning kha Gat e." 40 Ma wọ Shimeyi uvur ẹnyạnyaang chẹ ọta okhebha Akish kha Gat, oror atọhmnạng pẹ ose ichen. Shimeyi utim atọhmnạng pẹ ubina kha Gat ukwuna.

41 Masẹ Sọlọmọn ọbhaang bẹ́, Shimeyi kk’ubina ma Jẹrusalẹm otena k’Gat tạrr ukwuna, 42 ọvaarnạng oyeri Shimeyi, oben-ẹ bẹ́, "Ọma sạng kw’uwa ntạk echekha k’eche ch’Ọvaar Ubinọkpaabyi, mbạra ntwạr-ọ itọhng bẹ́, ‘Iwu chidede ch’ata ibyi sidede, kk’apua e?’ Wa aben-m ma iwu njọ bẹ́, ‘Udik kw’akpaakhẹ ujibh-ujibh. Amma m’nsạkha echo ọsạkha.’ 43 Oseng yạn bạra nạn echekha ch’atạk k’Ọvaar Ubinọkpaabyi náchokha, echo nábạra asạkha anạng ntọhna saam o?"

44 Ọvaarnạng ọbạra oben Shimeyi bẹ́, "Ọma asong ipyibha chidede s’uwa asi otte kwaam Devid kha ettem chọ. 45 Okhenka, ọvaar Sọlọmọn m’ọtạkha idia, ẹvaar ch’Devid m’ebe bẹ́ gwuk k’ititikha s’Ọvaar Ubinọkpaabyi tạrr ipimmanitor."

46 Mạnna wọ kw’ọvaarnạng ọnạngẹ Bẹnaya kw’ode nnwa kw’Jehoyada ẹfa. Uyin k’iyaan ọta uvun Shimeyi ọfhọ.

Ma wọ kw’ẹvaar ittim arạnga k’mbọhk s’Sọlọmọn.