Nnwẹr s'Osenga 17

Asi ayini k’ẹtakpa

1 Wa efhonfhạr ch’Israẹl phyi-phyibh ibin k’ibyi s’owor s’Sin, isenga k’ifhon-k’ifhon oche kw’Ọvaar Ubinọkpaabyi ọtọhnọ bẹ. Abẹ asi ibyibhingasẹ sabẹ k’Rẹphidim, okhenka, wa asi p’anạng mbọ m’agwo káde. 2 Osenga ma, abẹ atima ẹkhọhr ator Mosẹs, aben-ẹ bẹ́, "Nạng mạna asi angwo."

Mosẹs ubhina bẹ bẹ́, "Ukwuru yạn kw’abạnga n’atta abamẹ o? Ode yạn kw’abạnga n’ayoma Ọvaar Ubinọkpaabyi o?"

3 Okhenka, wa asi adaakhẹ anạng mbọ tạrr abẹ ammọhnọ anạng Mosẹs, aben-ẹ bẹ́, "Ukwuru yạn kw’atima mạna ọttạra iva pamạna, ọttạra itirakpo pyamạna abina k’Ijip, ankwu ampe ma k’isi-daakha o?"

4 Ma wọ, Mosẹs ọgạm ọkpẹkhẹ Ọvaar Ubinọkpaabyi oben bẹ́, "Ma, m’nsi anạng mba yạn o? Abẹ k’ifor adia sabẹ m’atọbh-m ata e." 5 Ọvaar Ubinọkpaabyi ubhina Mosẹs bẹ́, "Chi anạng mbọ eden. Tima adecho bạnọ p’Israẹl, atạkha uchikwura nwọ kw’atim avun k’ọraanga kw’Nile, sọhng. 6 Amma m’mbọ-ọ k’ititikha k’ẹtakpa ch’Horẹb. Vun uchikwura nwọ ma ẹtakpa njọ, asi m’ayin-uyin k’oche kw’anạng mbọ m’agwo." Ma wọ, wa Mosẹs usi oche ngwọ k’ititikha s’adecho p’Israẹl. 7 Wa Mosẹs oyeri ibyi nnọ Masa*17.7 Masa k’eHiburu uyini Eyoma. ọttạra Mẹriba*17.7 Mẹriba k’eHiburu uyini Ẹtta, akkaam-chichi., ukwuru bẹ́, ma wọ kw’anạng p’Israẹl atta Mosẹs abẹ, abạra ayoma Ọvaar Ubinọkpaabyi, aben bẹ́, "Ma, Ọvaar Ubinọkpaabyi uning mạna abẹ sa a, mạna abẹ núninga?"

Anạng p’Israẹl akhem anạng p’Amalẹk

8 Wa anạng p’Amalẹk arim anạng p’Israẹl abẹ k’Rẹphidim. 9 Mosẹs oben Joshua bẹ́, "Tekha ajunung bạnọ p’m’atima arima anạng p’Amalẹk abẹ. Uphyini m’mbe k’okpecho k’ẹrạng, ọttạra uchikwura kw’Ubinọkpaabyi k’ọbọhk kwaam." 10 Ma wọ, Joshua urim anạng p’Amalẹk abẹ, oche kw’Mosẹs kk’ẹfa ọnạnga. Mosẹs ọttạra Aarọn ọttạra Hur afon ata abe k’okpecho k’ẹrạng. 11 Okpe kwidede kw’Mosẹs udir mbọhk k’ẹrạng, anạng p’Israẹl akhema, de ọsạk mbọhk, anạng p’Amalẹk akhema. 12 Okpe kw’mbọhk ikwokhu Mosẹs, abẹ adira ẹta achokh-ẹ uninga ẹyạr. Aarọn ọttạra Hur avạkha mbọhk s’Mosẹs atima k’ẹrạng, ọnạng-ọnạng ọbọhk kwẹ. Wa mbọhk nnọ itọhk oche ngwọ-ngwọ tạrr iwu ẹsa. 13 Ma wọ, Joshua utim ọkkangkkang-kkro okhema akpongnạng p’Amalẹk.

14 Ma wọ, Ọvaar Ubinọkpaabyi obeni Mosẹs bẹ́, "Kkẹr idik nna k’nnwẹr, ode udik-ujimakwẹ. Ọbaan bẹ́, Joshua ọbhaanga kwẹ, ukwuru bẹ́, m’ndimi eche ch’Amalẹk k’ọyagbin phyi-phyibh."

15 Ma wọ, Mosẹs usi ijabyi, oyeri sẹ, "Ọvaar Ubinọkpaabyi wọ ode Okhema kwaam." 16 Oben bẹ́, "Ukwuru sabẹ adir mbọhk k’ẹrạng atena ẹvaarchi ch’Ọvaar Ubinọkpaabyi uning, Ọvaar Ubinọkpaabyi m’urima anạng p’Amalẹk abẹ k’igbọ-k’igbọ."