1 Cu Samaria namdi ga hegwangpei Ahab leuhme mina riakhena lungh bamla. Samaria ga Jezreel namdi keteume dage Jehu laisiudung raulu delwe penui dage langgai, nah kecingmedung de si eh Ahab leuhme mapie kelamedung dage, ainzwa rang eh, 2 "Nnui mpaube leuhmedung nnui da la, nah nnui bagidung nah hekündung de nah renei kwakelu namdi nah hereunetdung ge de bam. Cine, laisiu aide nnui da gwanglu herizi, 3 nnui mpaube leuhme kakga de yitube nah petautube de kedetlu, delwe pecu pe pei hegwangbam gage kailu, delwe nnui mpaube hegwang ria ziemne regilu." 4 Dede penui au ngngidi nah penuikatei kak gade rangdi, "Pielo, hegwangpei kena de Jehu dwa saplu ma. Cine dainzwa anui saplu lai?" 5 Ge hegwangki kerengeibe peide, nah namdi reu kedibe peide, nah kecingmedung de si eh, nah hename de nkwet cuh kecume, Jehu dage sam lang keligai eh ainzwa ranggai, "Anui n kilamedung lie. Nang anui de teilo kebeu leune anui tei zie. Anui mige de de hegwangpei tei lak. N dwaga de petaube tei lulo." 6 Pecai Jehu pie pekenabe penui dage laisiu raugai, rang eh, "Nnui magade a lambie bam lie cai, nah nnui a kwa kingnei zie lie cai, nnui mpaube leuhme pei peudung pwalu delwe ncünne tingcang aipau ting ga Jezreel a da gwanglu." Hegwangpei leuhmedung, pumpei riakhena ge, penuide pie rengei cu kebeume, namdi ga kenlangme da bam. 7 Cine laisiu penui da kegwang dau, penui hegwangpei napeidung de ngngwa lwe penuide teitsetdi, riakhena ge, penui peudung marakdung gage kailu, delwe penuide de Jezreel ga Jehu dage lang gaidi. 8 Samgwame ge Jehu da gwang eh ranggai, "Penui hegwangpei napeidung peudung punggwang luda." Cine pa rangdi, "Cidungde keheswa sauna tei lwe kirie dwa gage tingcang kecang kailu." 9 Tingcang Jehu tet pet delwe saplu, nah mina pelane dage rangdi, "Nnui zie ma. Pielo, Ih a mpaube de teitset kera heciem riem lwe pecu teitset dida, dede caune aidung pelane de teitsetdi dino? 10 Cu nnui RAMPAUBE sam de, pa Ahab kelak ha kerang de ket de hangdeu ga cakmie di lak lie kecu ci mcilu da, kedanemene RAMPAUBE pe kilabe Elijah dage pa kerang de teidi delu." 11 Cine Jehu Jezreel ga kebam Ahab kelak bang kebam pelane de, nah pe mina kenlangme pelane, pe zangme kemname, nah pe cingkumedung, de teitsetdi, penui hangge de bang kemaktane.

12 Pecai Jehu cuhlu delwe tetdi; pa Samaria ga miedi. Pa meurün kekwame ki Beth Eked ga gwang keladau, 13 pa Judah gwangpei Ahaziah siname de redaulu. Jehu penui dage rangdi, "Nnui cau no?" Penui keligai, "Anui au Ahaziah siname lie, nah hegwangpei name de nah Hegwangpui Jezebel name de kelum gai kerane anui hung lalie." 14 Jehu pekatei pe minadung dage rangdi, "Penuide ring eh tuilu." Cine penuide ring eh tuilu delwe Beth Eked tekwa gage penuide teitset gaidi, mina riakdai pelane de. Pa mige de de peu ringbam ma.

15 Jehu cikade tet kedidau, pa Recab napei Jehonadab pecu redau kera gwang eh redaulu. Jehu pecu kelumgai delwe pe dage rangdi, "N mlung ada bammi, a mlung n da kebam nzwa eh?" Jehonadab keligai, "yeo lie." Jehu rangdi, "Magade ciciu cai, n ba acu peulo." Cine pa Jehu de pe ba peu, nah Jehu Jehonadab de ngngwalu delwe pecu ngngwa bagi ga nlütdi. 16 Jehu rangdi, "Acu ngngwa gwang eh RAMPAUBE ziemne Ih a lung kaikebam pielo." Cine pe gu bagi ga pa Jonadab de ngngwa cwa lwe tetdi. 17 Pa Samaria ga gwang kelu dau, Samaria ga Ahab leuhme gade bang kebam pelane de Jehu teitsetdi, pa Ahab hegwang ria de tei msiadi kemaktane, penuide RAMPAUBE sam gade ndaa penuide rang kebeu nzwa eh, pa Elijah de rang kebeu de.

18 Pecai Jehu mina pelane de qu hekwalu delwe penui dage rangdi, "Ahab manage Baal gwa tei dida, dede Jehu pe gwa tei kiee gwa zie. 19 Cu ciziemne Baal caihakecime pelane de ada ge qu hekwalu, pecu reca kelame leune de, nah pe cingkume pelane de. Peu mige de de bang diso, kedanemene Ih Baal de ratak kedi ge teibeu kera bamlu. Keheibe de gwang kemakme ring gai lak." Dede Jehu aide cwa eh teidi, Baal de reca kelame de teitset kera kecet gade. 20 Jehu rangdi, "Baal de reca kera ting ge riet lulo." Cine penui cide sah gai. 21 Ge Jehu sam Israel deu pelane gage langgai nah Baal de reca kelame leune gwanglu, cine mige de gwang tadi kemak bam ma cika. Penui Baal kerecaki ga lütlu, nah cide tuge lamde kedale tu kecang puilu. 22 Jehu cingkupei pai kekaibung kerengeibe dage rangdi, "Baal de reca kelame pelane ziemne paidung keu mpet lulo." Cine cipau pei de penuide paidung keu mpet beu. 23 Cine Jehu Recab napei Jehonadab de ngngwa lwe Baal kerecaki ga lütdi, nah pa Baal de reca kelame dage rangdi, "Peei pielo nah peu nnui kak ga RAMPAUBE kilame de peu migede de nnui da bam helo, dede Baal de reca kelame rünne bam lu." 24 Pecai penai ratakdung nah keru recadung teigai beu kera lütdi. Cu Jehu hegwale sap kebam mina riakheset de kedetlu, nah pa penui dage rangbeu, "Magade Ih nnui ba gage ngngwa gwang gai kebeu minadung hangge de pakdi cai, peu cipau peide de pak kedibe de teitsetdi zie, pak kedibe teilung ziemne."

25 Cine Jehu keru reca tei canglu herizi, pa kekwame nah kedimedung dage rangdi, "Lütlwe penuide teitsetdi. Peu mige de de mpet so." Cine penui penuide kiengtie tu le teitsetdi, nah kekwabe nah kedimedung penuide kelien mpetdi delwe Baal kerecaki helung le lütdi. 26 Penui tangtsu tsiadung Baal kerecaki ga kebamdung de teu kerei mpetlu delwe penui cidungde rudi. 27 Pecai penui Baal tsusum de tei ngkaudi, nah Baal kerecaki de tei msiadi delwe cide heteuki ge teidi, henai kecang de cide cinzwa eh bam. 28 Ainzwa eh Jehu Israel gade Baal de reca kecu tei nggadi.

29 Dede Jehu Jeroboam napei Nebat kemaudung de gidi ma, cide cai, Bethel penai Dan ga kecak tumseudung de reca kecu, cide le pa Israel de peu kemau tei. 30 Cine RAMPAUBE Jehu dage rangdi, "Kedanemene nang adwa de petau lie kecube tei mmi kelune, nah a mlung ga ma pelane kebam nzwa Ahab leuhme dage tei kegaine, n leuhme Israel hegwangbam ga ceheu pe mdaibe kecang bam zie." 31 Dede Jehu RAMPAUBE, Israel Tinggwang, zai de pe mlung pelane tei eh mzailu ma. Pa Jeroboam maudung gade nreu tetdi ma, pa Israel de kemau gage ngngwa kegai gade.

32 Cipau tingbadung dau RAMPAUBE Israel dage pe cuikuidung tei mceudi, nah Hazael Israelme de Israel deu raidung gade ngamlu, 33 Jordan kepetle bie gade, Gilead deu pelane, Gad leuhme, nah Reuben leuhme, nah Manasseh leuhme, Aroer gade, cide Arnon Langkam taiga, Gilead gade Bashan kecang. 34 Jehu tadung kedadung cai, pa teikedi pelane, nah pe kengkieng pelane, cidung de Israel gwangpeidung tei kegwangdung hakwak gage raupwala meni? 35 Jehu pe paume nzwa tsaidi, nah penui pecu Samaria gage kungdi. Pecai pe napei Jehoahaz pe bam leu eh hegwang teilu. 36 Jehu Samaria ga mmi ngkaieheset Israel reu hegwang teilu.