1 Hegwangpei Zedekiah hegwang ketei mmi hekui bekum, kei kerei bekei, nah ziangrei benai, Babylon gwangpei Nebuchadnezzar pe reugwame pelane de ngngwa lwe Jerusalem de gwaketang. Pa cide kemcwa gage ramzeuki teilu, nah penui gwa kera herie ge tei tegwalu. 2 Cine namdi de Hegwangpei Zedekiah hegwang ketei mmi kereieket kecang twagwa pwa bamdi. 3 Cipau kum kei mdei bekei lang hekuine benai, namdi de ga herakum kumsüt di eh cika lungh kebamme ziemne ketyeipok kette gahdi. 4 Ge namdi de pungpop lütlu, nah reugwame pelane tingmui gage hegwangpei gurie lede, herie kena kakga kebam kirie lampui lede pakdi, Chaldeanme namdi pelane twagwa pwabam liede. Hegwangpei Arabah lambie ge tet gaidi. 5 Dede Chaldeame reugwame Hegwangpei Zedekiah de gwazui mie nah pecu Jericho taiga Jordan Reuki langkam langkie de gade gwa canglu. Pe reugwame pelane pe dade zangra tetdi. 6 Penui hegwangpei de tuilu delwe pecu Babylon gwangpei da Riblah ga ngngwa hanglu, cikade penui pe ha tiaklu. 7 Zedekiah napei dungde au, penui pa kengau dwa gade penuide gitsetdi. Pecai pa pe miak kenade letmpet lu, hetageu riadungle pecu kangdi, delwe pecu Babylon ga ngngwa gwanglu.

8 Kei mengei bekei, lang henane benai, cide Babylon gwangpei Nebuchadnezzar hegwang ketei mmi kereiehekui bekum, Babylon gwangpei kilabe ge nah pe pumkwame muibe, Nebuzaradan, Jerusalem ga gwanglu. 9 Pa RAMPAUBE kerecaki, hegwangki, nah Jerusalem ga kidung pelane rudi; namdi ga ki kemlang leune si eh pa rudi. 10 Jerusalem de twagwa kebam heriedung pelane de, Babylonme reugwame pumkwame muibe kangga kebamme pelane ne cidungde teimsia di. 11 Namdi ga bangpwa kebamme minadung pelane, Babylon gwangpei dage pakgai kedimedung, nah bang kebam minadung de, pumkwame reu muibe, Nebuzaradan ne penuide ngngwa tetdi. 12 Dede pumkwame muibe hangdeu ga magahtume kesa de kai nzeu di peu kubeluhdung nah luhdung ga mata tei kerane. 13 Hetageu tsiadung RAMPAUBE ki ga kebam de, nah ma bamdung nah hetageu jaaidi de RAMPAUBE ki ga kebamdung de, Chaldeanme ne cidungde teipang takcaidi delwe hetageu de Babylon ga pung caili gwangdi. 14 Lidung, peitwakdung, mitaubung teikemmüt tie, hepiaktiadung, nah hetageu lidung pelane cingkume pwa kerecaki ga teu heta teibam kela de, Chaldeanme cidung de peciakne keu tetdi. 15 Mimüt keu mpet kela lidung nah kecak le tei kelu kwakdung, nah rangkanggeu le tei keludung, hegwangpei reket kedibe cidung de de keu tetdi. 16 Solomon RAMPAUBE ki ziemne tei kegai, tsiapum kenade, jaaidi de, nah ma bamdung de hetageu kekieege mdet kera rüt süt kecu kaipwa bam. 17 Tsiapum keraide pehu cubit kereieheset,* nah petün ga hetageu peukang ge bam. Peukang de pehu cubit kecum,* marak kedak rehi ge nah kuraletsi kai twagwa lu peukang gage, pelane hetageule teilu. Tsiapum keda de nah marak kedak rehi de keraide nzwakap da. 18 Pumkwame muibe cingku kedibe Seraiah, cingku pe kenabe Zephaniah desi eh, nah herieki kekwame hangcum de ngngwa teudi. 19 Namdi gade pa kedime ge reugwame de rengei kebambe de, nah namdi ga kebam hegwangpei de keledeume hang mengei de hebaang tei kera ngngwalu. Pa hegwangpei reugwame reu kedibe mina dungde reugwame tei kera hezi keraube de de, nah hangdeu gade minadung kemlangme namdi ga kebamme riakherok desi eh hebaang tei kera ngngwalu. 20 Pecai pumkwame muibe, Nebuzaradan, penuide ngngwalu delwe Riblah ga Babylon hegwangpei da penuide ngngwa gwanglu. 21 Babylon gwangpei penui de Hamath deu Riblah gade teitset di. Ainzwa eh, Judah pe deu gade langgi kedi gage mpetdi. 22 Judah deu ga bang kebammedung, Babylon gwangpei Nebuchadnezzar ne gi nzeu kebeumedung, pa Shaphan capei, Ahikam napei, Gedaliah de penuide pierengei kera kailu. 23 Reugwame muibedung pelane, penui nah penui minadung, Babylon gwangpei Gedaliah de deuceudibe teidi delie kecu siu luge, penui Mizpah ga Gedaliah da mie. Mina aidungde cai Nethaniah napei Ishmael, Kareah napei Johanan, Netophah gade kegwang Tanhumeth napei Seraiah, nah Maakathme pei Jaazaniah kegwang, penui nah penui minadung. 24 Gedaliah penui da nah penui minadung da sampetgai, nah penui dage ranggai, "Chaldeanme kedimedung de hing diso. Hangdeu dega lunghlu nah Babylon gwangpei gwatei lu, ciciu lude nnui ziemne yi luzie." 25 Dede kei hena bekei Nethaniah napei Ishmael, Elishama tsapei, hegwang kelak gade, mina hang kerei de ngngwalwe gwang nah Gedaliah de gwaketang. Gedaliah nah Judah ga minadung nah Babylonme pecu Mizpah ga ngngwa kebamme desi eh tsaidi. 26 Pecai minadung pelane, keceu gade kedi kecang, nah reugwame muidung, cuhlu delwe Egypt ga miedi, kedanemene penui Babylonme de hing kedine.

27 Judah gwangpei Jehoiachin de langgi kedi mmi camreiehena bekum, kei kereiekenabe kei, hekeizie ngkaiehena benai caine, Babylon gwangpei Awel-Marduk Judah gwangpei Jehoiachin de hebaangki gade lungmpet beu. Awel-Marduk hegwang teicuh kelu bekum aide teidi. 28 Pa pecu pe zaiyi eh mpaugai nah Babylon ga pecu ngngwa kela hegwangmedung kedame gu swade herüt peugwa kecu bam pwapeu. 29 Awel-Marduk Jehoiachin hebaangki painidung lwakdi, nah Jehoiachin pe teilung pelane hegwangpei gu taktyeibam gade matyei mui bamdi. 30 Ketyeipok teu maikesia tingba ramsang pe teilung zie pelane pecu pwapeu.