1 Cu Judah gwangpei Jehoshaphat hegwang tei kelu mmi kereieheset bekum, Ahab napei Joram Samaria ga Israel reu hegwang tei cudi; mmi kereiekena pa hegwang tei gwang. 2 RAMPAUBE dwa gade pa kemau teidi, dede pe pei nah pe pui nzwa kemau tei cang mah; kedanemene pe pei tei kegai Baal de kereca tsusum pa keugi kedine. 3 Dede Nebat napei Jeroboam Israel de kemau ketei ga ngngwa gai kedibe maudung de pa de tei lala; cide gade pa nghim dima.

4 Cu Moab gwangpei Mesha meurünna guila. Pa Israel gwangpei dage meurünna 100,000 ge, nah meurün mai 100,000 ge gu habeu. 5 Dede Ahab tsai kedicai, Moab gwangpei Israel gwangpei de renia cudi. 6 Cine cipau tingdau hegwangpei Joram Israelme de hereu ziemne mteilu kerane Samaria gade tetdi. 7 Pa Jehoshaphat Judah gwangpei dage sam ge lang eh, ranggai, "Moab gwangpei acu renia cu dida. Moab da hereu tei kera nang acu ngngwa mie ziemi?" Jehoshaphat keli eh, "Ih mie zie. Ih de nang nzwa da, a mina de n mina da, a hekündung n hekündung da." 8 Pecai pa rangdi, "Daipau lampui gade anui gwaketang lai?" Jehoshaphat keli eh, "Edom gu hetaideu lampui gade." 9 Cine Israel gwangpei Judah gwangpei nah Edom gwangpei de ngngwa mie. Penui lang henane tet ladi, nah cine penuide nzang kela reugwame ziemne mede makaunedung ziemne dui gahdi. 10 Cine Israel gwangpei rangdi, "Aide dai no? RAMPAUBE hegwang kecum de qu kecude penuide Moab kangga kai di kerane ni?" 11 Dede Jehoshaphat rangdi, "Anui RAMPAUBE dade ma keteulu kera RAMPAUBE gu caihakecime ge de aika gah ni?" Israel kilame gwangpei hangge keli eh rangdi, "Elijah ba gage dui rui kegai be, Shaphat napei Elisha aika bam." 12 Jehoshaphat rangdi, "RAMPAUBE sam au pe da la." Cine Israel gwangpei, Jehoshaphat, nah Edom gwangpei pe da miedi.

13 Elisha Israel gwangpei dage rangdi, "Ih n dage daipai teigai swa laino? N pui nah n pei gu caihakecime da mielo." Cine Israel gwangpei pe dage rangdi, "Lak, kedanemene RAMPAUBE aipau hegwang kecum de penuide Moab kangga kai di kerane qugai." 14 Elisha keligai, "Ih ring kela Reugwame reu RAMPAUBE, Ih pe dwa sap kelabe, Ih Judah gwangpei Jehoshaphat de rüt melie cai, Ih ncu ngngwa magede teilak, mede ncu pie de lak. 15 Dede cu leiteikelame ge de a da ngngwa gwangbeu." Pecai cide gwang leibung kekwabe lei kwa gai ge, RAMPAUBE ba Elisha reu ga gwanglu. 16 Pa rangdi, "RAMPAUBE aide rangla, ‘Kecangh kereuki langkam aide ga peu hekwaki le pui dilu.’ 17 Kedanemene RAMPAUBE aide rangla, ‘Nang tingkai ngau lak, mede nang tingrui de ngau lak, dede kereuki langkam aide ga dui le pui dizie, nah nang nah n kauruine nah ngu kaune pelane dui sak luzie.’ 18 Aide au RAMPAUBE ziemne matei kerelui nage. Pa nnui de de Moabme reu kengkieng peu zie. 19 Nnui renei kwakelu namdi leu nah keyi namdi leune gwaketang zie, tsingbang keyibe leune dang dizie, dui rwak leune tei mtak dizie, nah hangdeu keyi leu tangtsudung le tei msia dizie." 20 Cine tingcang ratak teibeu kera tingdau, Edom lam gade dui lwa mie; deudi dui le puidi.

21 Cidau Moabme pelane, hegwangmedung ne penuide renia kera gwangla lie siukelu dau, penui penuikatei gwang ngkwalu, hereunet punglu kebuime leune, nah penui herai ga gwang bamlu. 22 Penui tingcang nuge cuhlu nah tingnaimiak dui reu ga tau bam. Moabme penuide mcwa kebam dui de pie gaige, cide hejai nzwa gierei eh ngaudi. 23 Penui sahbak eh, "Aide au hejai! Hegwangmedung de tei ngkap bidi au zie da, nah penui hangge gede teitset dida! Cine cu, Moab, anui mielwe penuide hecung eh mapwa lugo!" 24 Penui Israelme ramzeuki ga gwang keludau, Moabme cimezing kebam gade Israelme penuide gwaketang eh, penui dwaga penui pak cudi. Israel reugwame Moabme deudung ga gwazui mie eh penuide teitset ladi. 25 Penui namdidung de ngkapdi, nah hangdeu keyi leu ga tangtsu le heling pui gai di kemaktane cide keliengai. Penui dui rwak leune tei mtak di nah tsingbang keyi leune dang gidi. Kir Hareseth rünne bang nzeu di pe tangtsudung pebam ga bam eh. Dede reugwamedung cide twagwapung delwe cide gwaketang. 26 Moab gwangpei Mesha hereu cide sia kedi ngaulu ge, pa kingtie pwa kelame mina hai hena gede ngngwa delwe Edom gwangpei de renia kera mie, dede penui teilu tadi. 27 Cine pa pe neraibe, pecai pebam pwa leu kerabe de ngngwalu, delwe pecu pwa kirie reu gage keru ratak teigai. Cine Israel ga rata le puidi, nah Israelme reugwame Mesha gwangpei dade tetdi delwe penui deu ga cailigwangdi.