1 Ahaziah napei Joash Judah gwangpei hegwangtei kelu mmi ngkaiekecum bekum, Jehu napei Jehoahaz Samaria ga Israelme reu hegwang teilu; pa mmi kereiehena hegwangtei. 2 Pa RAMPAUBE miakdwa gade kemau teidi nah Nebat napei Jeroboam kemaudung de nzuidi, Israel de kemau gage ngngwa kegaibe; nah Jehoahaz cidungde gade nreu luma. 3 RAMPAUBE Israelme de perata sütdi, nah pa penui de Aram gwangpei Hazael ba gage nah Hazael napei Ben Hadad ba gage peudai dai gaibeu. 4 Cine Jehoahaz RAMPAUBE dage kiegai, nah RAMPAUBE kingnei lu kedanemene pa Israelme de teikeherei cu ngau, Aram gwangpei penuide dainzwa teikeherei bambi kecu. 5 Cine RAMPAUBE Israelme de kelilu kera mige de langgai beu, nah penui Aramme ba gade paklu, nah Israelme penui kiga pedwa le lunghbam kela nzwa lunghdai lu. 6 Dede, penui Jeroboam, Israel de kemau gage ngngwa kegaibe kilungme kemau de pütti ma, nah penui cidung de tei jüja bam; nah Asherah hetsia de Samaria ga bamdi. 7 Aramme Jehoahaz de hekwen keteume mina riakngei, bagi kerei, nah hepi reugwame cang kerei gwale kaidiak tadi, kedanemene Aram gwangpei penuide ngkapdi nah penuide hecaipung ga ciurie ge nzwa teidi. 8 Jehoahaz tei gwangkedi ha kedadung, nah pa tei kegai leune nah pe kengkieng, cidungde Israel gwangpeidung hakwak gage raupwala meni? 9 Cine Jehoahaz pe paume nzwa tsaidi, nah penui pecu Samaria gage kungdi. Pe napei Jehoash pe bam leu eh hegwang teilu.

10 Judah gwangpei Joash hegwang tei kelu mmi camreiehena bekum, Jehoahaz napei Jehoash Samaria ga Israel hegwang teilu; pa mmi kereieherok hegwangtei. 11 Pa RAMPAUBE miakdwa de kemau teidi. Pa Nebat napei Jeroboam, Israel de kemau gage ngngwa kegaibe maudung de kette gidi ma, dede pa cidungde nziudi. 12 Jehoash teikedi ha kedadung, nah pa tei kegai leune, nah Judah gwangpei Amaziah de ngngwa regi kecu ga pe kengkieng, Israel gwangdung hakwak gage raupwa la meni? 13 Jehoash pe paume nzwa tsaidi, nah Jeroboam pe hegwangbam ga bamdi. Jehoash de Samaria gage Israel gwangpeidung raukie gage kungdi.

14 Elisha mateei pung eh mradi cide ne pecai pa pung caidi, cine Israel gwangpei Jehoash pe taiga hung eh pe ziemne hapdi. Pa rangdi, "Apei, apei, Israelme bagidung nah hekwen keteume ncu ngngwa tetti lau delie." 15 Elisha pe dage rangdi, "Lakpi ge nah lakpitsidung pwalu," cine Joash lakpi nah lakpitsidung pwalu. 16 Elisha Israel gwangpei dage rangdi, "Lakpi gage n ba kailu," cine pa lakpi gage peba kailu. Pecai Elisha hegwangpei ba gage peba kailu. 17 Elisha rangdi, "Naimiak kepetle kebaki de ngkei gailo," cine pa cide ngkeigai. Nah Elisha rangdi, "Kapgai," ge pa kapgai. Elisha rangdi, "Aide RAMPAUBE ngkieng kelu lakpitsi, Aram reu ngkieng kelu lakpitsi, nang Aramme de Aphek gade ketang zie nang penuide ngamlu kemaktane." 18 Pecai Elisha rangdi, "Lakpitsidung de keulu," cine Joash cidungde keulu. Pa Israel gwangpei dage rang, "Hangdeu gage kapgai," nah pa hangdeu gage piacum kapgai, pecai mtakdi. 19 Dede Tinggwang minabe pecu pe ratadi nah rangdi, "Nang pia mengei mede pia herok hangdeu gage kapgai kerabe. Iciucai nang Aram de ngkapzingdi kemaktane gwaketang luzie dede nang cu Aram de piacum rünne ketang zie."

20 Pecai Elisha tsaidi, nah penui pecu kungdi. Cu Moabme maadung mmi ramsang kum mmi kerai dau penui deu gwalütla. 21 Penui mipeige de kung kebam dau, penui Moabme maa de ngau, cine penui ketsaipau de Elisha rau gage keling gaidi. Mipei be Elisha radung de tunggai herizi, pa ring dailu eh cuh sapdi.

22 Aram gwangpei Hazael Jehoahaz hegwang ketei ting pelane Israelme de tei kehereidi. 23 Dede RAMPAUBE au Israelme dade pezai yi, nah penuide ngaunggia nah penui ziemne helungniedi, pa Abraham, Isaac, nah Jacob dage samkakkelu ziemne. Cine RAMPAUBE penuide ngkapdi ma, nah pa penuide pedade teu mdeidi ma. 24 Aram gwangpei Hazael tsaidi, nah pe napei Ben Hadad pe keleu ga hegwang teilu. 25 Jehoahaz napei Jehoash Hazael napei Ben Hadad dade namdidung pe pei Jehoahaz dade hereu ketei gade keuteu kedi dung de keu dailu. Jehoash pecu pia cum gwaketang, nah pa Israel namdi cidungde ngaudailu.