1 Caihakecibe napeimedung Elisha dage rangdi, "Anui ncu ngngwa lungh kebam heni de anui pelane ziemne ceu ham lie. 2 Ngau nggia eh peu anuide Jordan ga mielo, nah cika mileune de tsingbang bilu delwe anui heni cika lungh kera ki tei lugo." Elisha keligai, "Nnui mie cu." 3 Penui kakga hangge rangdi, "Ngaunggia eh n kilame de nzangmie beulo." Elisha keligai. "Ih miezie." 4 Cine pa penuide nzang mielu, nah penui Jordan ga gwang luge, penui tsingbangdung bi ngkau cudi. 5 Dede bi bam kecudau hangge gu nreu peu dui ga cakmie dige; pa sah cudi delwe rangdi, "Oh, a mpaubo, cide au releukelu nreu lie!" 6 Cine Tinggwang minabe rangdi, "Daiga cakmie dino?" Minabe Elisha de pebam saulia beu. Pecai pa tsingtie ge danglu, delwe dui gage keliengai nah hegeu de nlim peu cuhdi. 7 Elisha rangdi, "Keu ncuh lu" Cine minabe peba ketwamie delwe cide keulu.

8 Cu Aramme gwangpei Israelme de ngngwa hereu tei bamla. Pa pe kilame de kelunglia delwe, ranggai, "A ramzeuki heni cikenzwa gega tei kera cetlu." 9 Cine Tinggwang minabe Israelme gwangpei dage langgai, "Cipau bam mide au tet kah sia bi de lie, kedanemene Aramme cika nghung laulu debeu." 10 Israelme gwangpei Tinggwang minabe pecu mrai rang mriak kegai ni de gage sam langgai. Hegwangpei cika piana cum swade kiee eh kemie dau, pa mriak delwe mie. 11 Aramme gwangpei sam aidungde ci nswa kelu ci luge perata sütdi delwe pa pe kilame de qulu delwe penui dage rangdi, "Nnui a dage ranglia lak ni caube anui kakga Israelme gwangpei, lambi?" 12 Cine pe kilame hangge rangdi, "Melie, a mpaubo, hegwangpei, dede Israel ga caihakecibe Elisha Israelme gwangpei dage nang nzeubung gade kerang samdung pau beu bamlie." 13 Hegwangpei keligai, "Mie delwe Elisha daiga bam bi pielo, iciude Ih mina de langpwa pecu tuilu kerane." Iciu ge pe dage, "Ainie, pa au Dothan ga bamlie," de eh rangbeu.

14 Cine hegwangpei Dothan gage hekündung, bagidung, nah reugwame kekiee langgai. Penui tingmui dau gwang canglu delwe namdi de twagwalu. 15 Pecai Tinggwang kilabe minabe cuh zilu delwe hegwale mie ge, ainie, reugwame kekiee ge hekündung nah bagidung teulwe namdi twagwa pwa bamdi. Pe kilabe pe dage rangdi, "Oh, a mpaubo! Anui dai nzwa lai?" 16 Elisha sam keligai, "Hingso, kedanemene anuide ngngwa kebamme au penuide ngngwa kelame swade kieeki lu." 17 Elisha kekie tei eh rangdi, "RAMPAUBO, nang pemiak tei mrak beulo Ih kiela iciu eh pa ma ngaulu kerane." Pecai RAMPAUBE kilabe miak tei mrak gaibeu ge pa mangaulu. Ainie, lamlwatu ga hekwendung nah bagidung ne puiting de Elisha taiga twagwa pung kebam ngaulu. 18 Pecai Arameanme pe da nghung keladau Elisha kekie tei eh RAMPAUBE dage rangdi, "Mina aidung miak teiciet dilo, Ih n dage kiela." Cine RAMPAUBE penui miak teicietdi, Elisha kie kegai nzwa. 19 Pecai Elisha Aramme dage rangbeu, "Aide lampui ma, mede aide namdi de ma. Acai suilu sangne, Ih nnui pei kelabe pei da nnuide nzang gwang beu zie" de beu. Pecai pa penuide Samaria ga nzang gwangdi.

20 Cidau penui Samaria ga gwanglu ge, Elisha rangdi, "RAMPAUBO, mina aidung miak tei mrak beulo iciu eh peu penuide mangaulu kerane." RAMPAUBE penui miak ngkei gai beu nah penui mangaulu, nah ainie, penui au Samaria namdi sumga gwang bamdi. 21 Israel gwangpei pa penuide ngau kegai dau Elisha dage rangdi, "Apei, Ih penuide teitset dizie mi? Ih penuide teitset dizie mi?" 22 Elisha keligai, "Nang penuide teitset sia bi da, nang n kiengtie nah n lakpi le tui kelumedung de nang teitset zie ni? Tangku nah dui penui dwaga ge dung gai beulo, iciu de peu penuide sak nah tyeilu kera, delwe penui mpaube da gwangdi lulo." 23 Cine hegwangpei penui ziemne taktyei kekiee ge mteilu, penui tyei nah sak cang luge, pa penuide lang gidi, nah penui mpaupei da penui cailigwangdi. Aramme reugwa aipau maade peting ketiege Israelme deu ga gwang dai tadi.

24 Pecai matie mene Aramme hegwangpei Ben Hadad pe reugwame pelane de quhekwalu delwe Samaria de gwaketang eh cide tuilu. 25 Cine Samaria ga herakum kumdi gwangdi. Ainie, penui cide tui pwa bamdi, cika gada peu rangkang geu riakheset, nah tamhau teu rangkang geu mengei le zwa cu kecang. 26 Israel hegwangpei kirie taiga tetkah gwang keladau, mipui ge pe dage sahgai, "A mpaubo, hegwangpei, acu ngha lo." 27 Pa rangdi, "Magade RAMPAUBE ncu ngha beu melie cai, Ih dainzwa ncu nghalu laino? Hecaipung gade mede zauniakbam gade madung ge de mpet me deni?" 28 Hegwangpei rang jüja eh, "Ncu dai ne tei keherei au no?" Pa keligai, "Aipau puide a dage rangdi, ‘N napei de halo iciu de henai anui pecu lang tyeilu kerane, nah anui ncünne a napei de tyei dailu kera.’" 29 Cine anui a napei de swalu delwe pecu tyeilu, nah pecai benai Ih pe dage rangdi, "N napei de halo anai iciu eh anui pecu lang tyei kerane, dede pa au pe napei de hebai di dilie". 30 Cine hegwangpei mipui samdung siu kegaidau, pa pepaidung hietdi (cu pa kirie ga tet kah gwangla) nah minadung pie gaige pa au roso pai petei tung eh balwe bam kecu ngau. 31 Pecai pa rangdi, "Magade henai Shaphat napei Elisha peu danglu mecai, Tinggwang de peu acu tei keherei liagai kelak peu tei kelube teilo."

32 Dede Elisha au peki ga ntum bam, nah hangkiamedung de pecu ngngwa ntum bam. Hegwangpei pe taiga kebam mipei gede langgai, dede samgwabe Elisha da gwang kecudau, pa hangkiame dage rangdi, "Pielo aipau de mide teiketsetme napeide dainzwa apeu dang teu tet kera langgai zeubi, Pielo, samgwame gwang sangne, kikam ngkuidi, nah kikam ngkui gimlu pecu peu lüt so. Pe mpaube pi kwa pecai la meni?" 33 Pa penuide marang kebam dau, ainie, samgwabe pe taiga gwang canglu. Hegwangpei ainzwa rang lie, "Ainie, keherei aide RAMPAUBE dade gwang lie. Daitei Ih RAMPAUBE de kwabam si lai no?"