1 Cu Elisha mipui, pa pe napei de tei mring dai kelube pui dage marang eh pa rangdi, "cuhlu, delwe n kilungme de ngngwalwe tet culo, nah hangdeu keda ga nang bamlu kebui ga bam lulo, kedanemene RAMPAUBE aipau deu de gage mmi hena ge herakum kum gwang kera kaidi zie delie." 2 Cine mipuibe cuhlu delwe pa Tinggwang minabe kerang de mzailu, pa pe kilungme de nzanglu delwe mie Philistinme deu ga mmi hena lungh ladi. 3 Cidau mmi hena cangdi ge mipuibe Philistinme deu gade cailigwang dailu nah pa hegwangpei da mie peki nah pedeu peulo peda pe nggia kiedi. 4 Hegwangpei au cu Tinggwang minabe kila Gehazi de ngngwa resiu bam eh ranggai, "Kehereide Elisha ma keditei kegai pelane a dage ranglo." 5 Pecai pa hegwangpei dage Elisha ne dai nzwa delwe tsaikedi henanabe de tei mringlu di bi ranglia kebam dau, pe napei de tei mring kebeube pui de gwang hegwangpei dade peki nah pedeu halo pe nggia kie kera gwanglu. Gehazi rangdi, "Hegwangpei, a mpaubo, Elisha ne tei mring dai kebeube de aipau puide de lie nah aide pe napei de lie." 6 Hegwangpei mipuibe dade pe napei ha keteu gaige, pa pe dage cide rang siak de lia bam. Cine hegwangpei kedime ge de mipuibe de ngha kerane sam kaigai eh ranggai, "Pecu pegu leune nah pa tetdi kecu benai gade henai kecang pe luhdung gade luhlüt kelu pelane peu dai beudi lulo."

7 Elisha Aram gwangpei Ben Hadad teeinei eh kebam Damascus ga gwanglu. Hegwangpei dage rangbeu di, "Tinggwang minabe aika gwang bamlie." 8 Hegwangpei Hazael dage rangdi, "N ba ga mapeudung ge keulu delwe Tinggwang minabe de mie redau lo, nah pecu peu RAMPAUBE dade keteu gailo ‘Ih aipau mateei de gade yi dailu zie ni?’" 9 Cine Hazeal pecu redau kerane Damascus ga mapeu keyi leune ketsamtsam, utdung riakdai ne punglwe mie. Cine Hazael gwang Elisha dwaga saplu delwe rangdi, "N napei Aram gwangpei Ben Hadad acu n dage langgai beu, ranggai, ‘Ih a mateei aide gade yi dailu zie mi?’" 10 Elisha pe dage rangdi, "Mie, Ben Hadad dage rangbeulo, ‘Nang yi dai bi luzie,’ dede RAMPAUBE acu pwa lia kecu pa au tsaidi bi zie lie." 11 Pecai Elisha Hazael de pieling ci gai pa ngamdi kemaktane, nah Tinggwang minabe hapdi. 12 Hazael, "A mpaubo, nang daitei eh hap zeu no?" Pa keligai, "Kedanemene nang Israelme minadung dage makesia teigai zie kecu Ih ci. Nang penui renei kwakeludung mi le rudi zie nah nang penui rehangmedungde kiengtie le teitset dizie, penui hena keceu nadungde de kedeu tset, nah penui tetlak kela puidung de riempopdi zielu." 13 Hazael keligai, "N kilabe cau no, pa ma kedi aikenzwa tei kera? Pa au heteu ge gwale ma." Elisha keligai, "RAMPAUBE nang Aram reu hegwang tei zielie kecu acu keulia da." 14 Hazael pecai Elisha da de tet pwa pe mpaube da gwang dai luge hegwangpei pe dade rangdi, "Elisha n dage dai lie rang no?" Pa keligai, "Pa a dade rang kecu nang yibi luzie lie au lie." 15 Pecai Hazael pecai benai paikui keulu eh cide dui gage mpunglu delwe Ben Hadad zu gage bah gaibeu iciu eh pa tsaidi. Pecai Hazael pebam leu eh hegwang teidi.

16 Ahab napei, Joram Israel ga hegwang tei kelu mmi mengei bekum Jehoram hegwang teilu. Pa au Judah gwangpei Jehoshaphat napei. Pa Jehoshaphat Judahme ga hegwang ketei dau hegwang teilu. 17 Jehoram mmi camreiekena dau pa hegwang teilu, nah pa Jerusalem ga mmi heset ge hegwang teigwang. 18 Jehoram Israel ga hegwangmedung puisaudung de nzuidi, Ahab kelak keteidung de nzwa eh, kedanemene pa Ahab napui de penau kelune, nah pa RAMPAUBE dwaga de kemau teigai kedine. 19 Cinzwa liede, RAMPAUBE au pe kilabe David ziemne Judah de tei ngkapdi neu ma, kedanemene pa pedage peleuhme pecu peu mui zielie rang pwa kebam ziemne.

20 Jehoram hegwang ketei tingdau, Edomme Judahme kang gade ngngwa siadi, delwe penui hegwangpei ge penui reu di kera ncuhlu. 21 Pecai Jehoram pegu bagidung pelane keu lwe Zair ga kah gwanglu. Edomme ne Jehoram de twagwalu ge, pe bagi reugwame muibe cuhlwe penuide tingmui gage gwa ketang; dede Jehoram reugwamedung pakdi nah penui kidung ga cailigwangdi. 22 Cine henai kecang de Edomme Judahme de ngngwa sia bam cang. Cipau ting dau Libnah de penuide ngngwa siadi. 23 Jehoram tei kegwang kedadung, pa tei kegai pelane, Judahme gwangpeidung hakwak gage raupwa bam meni? 24 Jehoram pe peime nzwa tsaidi nah penuide ngngwa David namdi ga kungdi. Pecai pe napei Ahaziah ne pebam leu lwe hegwangpei teilu.

25 Israel gwangpei Ahab napei Joram hegwang tei kelu mmi kereiekena bekum, Judah gwangpei Jehoram napei Ahaziah hegwang teilu. 26 Ahaziah mmi ngkaiekena dau pa hegwang tei cudi, pa Jerusalem ga mmi ge hegwang tei gwang. Pepui zi cai Athaliah; pa au Israelme hegwangpei Omri napui. 27 Ahaziah Ahab kelak puisaudung de nzuidi; Ahab kelak tei kedi nzwa, pa RAMPAUBE dwade kemau teidi, kedanemene Ahaziah nautak ketei gade Ahab kibaume kecune. 28 Ahaziah Aram gwangpei Hazael de Ramoth Gilead gade regi kerane Ahab napei Joram de ngngwa lwe mie. Aramme ne Joram de tei rezamdi. 29 Hegwangpei Joram Ramah gade Aram gwangpei Hazael de ngngwa regi kecudau Aramme ne pecu tei rezam kedide yi dailu kerane Jezreel ga cailigwangdi. Cine Judah gwangpei Jehoram napei Ahaziah, Ahab napei Joram de pie kerane Jezreel ga nghungdi, kedanemene Joram de rezam kedine.