1 Josiah hegwang tei kelu dau pa mmi heset di; pa Jerusalem ga mmi camreieket hegwangtei. Pepui zi cai Jedidah (pa cai Bozkathme Adaiah napui). 2 Pa RAMPAUBE miakngau gade dai petaubi teilu. Pa pe pau David zai pelane mzuilu, nah pa zetle ge mede hile ge nreugai dima.

3 Cinzwa eh hegwangpei Josiah hegwang tei kelu mmi kereieheset bekum, Azaliah napei Meshullam capei Shaphan, keraube de, pa RAMPAUBE ki gage langgai eh ranggai, 4 "Cingku kedibe Hilkiah da hang cuh nah pecu rangbeu lu RAMPAUBE ki ga rangkang pwalwet kebam de pei kera, kerecaki kekwame ne minadung dade hekwa kelube. 5 Cide makam keteime RAMPAUBE ki pie rengei kebamme ba gage peu beulu, nah cide penuide peu RAMPAUBE ki ga kebamme makam keteime de peulu, penuide peu kerecaki sia kebam retaklu kerane. 6 Penuide peu rangkang peulu tsingta keteime, ki keteime, nah tangtsuta keteime de, nah tangtsu pang nah tsing lui kera ziemne de, kerecaki retak kerane." 7 Dede penuide rangkang peu kegaidung de rau ma, kedanemene penui cide masang eh keu hetatei kelune.

8 Hilkiah cingku kedibe Shaphan keraube dage rang, "Ih RAMPAUBE ki gade hezai laisiukwak de ngaulu." Cine Hilkiah laisiukwak de Shaphan dage peudi, nah pa cide pei gai. 9 Shaphan hegwangpei da laisiukwak de keulwe mie, nah pecu pau de beu eh ranggai, "N kilamedung rangkang de luteu dida kerecaki gade ngau kelu de nah penui cide peu dida RAMPAUBE ki pie rengei eh kwakebamme makam keteime ba gage." 10 Pecai keraube Shaphan hegwangpei dage rangdi, "Hilkiah cingku kedibe acu laisiukwak ge pwa peu." Pecai Shaphan hegwangpei dage cide pei gaibeu. 11 Cinzwa eh hegwangpei hezai samdung de siulu ge, pa pe paini hietdi. 12 Hegwangpei cingkupei Hilkiah, Shaphan napei Ahikam, Micaiah napei Akbor, keraube Shaphan, nah Asaiah, pe kilabe de aja kai eh ranggai, 13 "Mie delwe RAMPAUBE de ngngwa mpaulo a ziemne, nah mina ziemne nah Judah pelane ziemne, laisiukwak aide gade samdung ngau kelu de ziemne. RAMPAUBE anuide pe ratasüt bam dida kedanemene anui paume aipau laisiukwak samdung anuide mzai lulo rau kenzeu leune tei mzailu kemakne."

14 Cine cingkupei Hilkiah, Ahikam, Akbor, Shaphan, nah Asaiah caihakecibepui Huldah da mie, Tikvah napei Harhas capei Shallum nau, paiheni kerengeibe (pa Jerusalem keheci lebie lunghla), nah penui pecu ngngwa mpau. 15 Pa penui dage rangdi, "Aide RAMPAUBE, Israel Tinggwang ne ranggai: ‘A dage ncu langkegaibe pei de rangbeu, 16 "Aide RAMPAUBE rangzeu: ‘Pielo, Ih heni aide nah cika lunghkebam pelane da kengkap teugwang beuzie, Judah gwangpei pwapei kelu laisiukwak ga raupwa kela leune nzwa eh. 17 Kedanemene penui acu gidi eh hera kedadung dage perim kehengui rugai di, iciu eh penui a rata teidi penui teikegai tahdung pelane le, ciziemne heni aide de mlai eh a rata cuh dida, nah cide nghim di lakta.’" 18 Dede Judah gwangpei da, RAMPAUBE lungning keteu kera ncu langkegaibe, aide nang pe dage rang zie: "RAMPAUBE, Israel Tinggwang aide rangla: ‘Nang siu kelu samdung de, 19 n mlung nciep kecu ziemne, nah RAMPAUBE dwade ncu tei hena kelu ziemne, heni aide nah cika lungkebamme de mlai eh Ih rang kegai nang siu kelu dau, penuide kemtage teidi kera nah reset pung eh, nah nang n painidung hietdi nah a dwade hap kegai ziemne, Ih de n kwa kingnei da, aide RAMPAUBE ne ndu kegai. 20 Pielo, Ih ncu n paume dage kaibeu zie, nah nang lungciep gade n rau ga gwanglu zie. Ih kengkap heni aide ga kaigai lai kebam pelane nang ngau canglak.’"’" Cine minadung sam aide teu eh hegwangpei da cailigwang.