1 Manasseh hegwangpei tei mdeu keludau pa mmi kereiekena di; pa Jerusalem ga mmi riakngeimengei hegwang tei. Pe pui zi cai Hephzibah. 2 RAMPAUBE Israelme dwa gade gwa kedi be leuhdung zai de nzui kecu nzwa, pa RAMPAUBE miakngau gade kemau teidi. 3 Kedanemene pa nlum kemak reca nidung de Hezekiah pe pei ne tei ngkap kedi de retak dailu, nah pa Baal ziemne recabam teilu, Israel gwangpei Ahab tei kegai nzwa Asherah mie teilu, nah pa tinggim hegidung pelane da keumie eh cidungde recadi. 4 Manasseh RAMPAUBE ki ga recabam teilu, RAMPAUBE aja kaibeu liede, "Jerusalem ga a zi kelunghta bam zie." 5 Pa RAMPAUBE ki ga kigu kena gage tinggim hegidung ziemne recabam teilu. 6 Pa pe napei de pwa keru ratak teigai, pa herarai nah reka ta tei nah ketsaime de mpaukelame nah rabe de mpau kelame dade ma keteu. Pa RAMPAUBE miakngau gade kemau kedi tei gaidi eh, perata teidi. 7 Pa Asherah mie heri kelude, cide pa RAMPAUBE ki gage kailu. Cipau heni ha de RAMPAUBE David nah pe napei Solomon dage ranggai; pa ainzwa rangbeu, "Ih a zi kelunghta kai dizie, aipau Jerusalem gade nah ki gade, Ih Israel leuh pelane gade kedetkelu be da. 8 Ih penuide aja kai kebeu leune penui mzai sünne lucai nah a kilabe Moses penuide aja kai kebeu hezaidung de pelane mnei lu cai, Ih penui paume de kepeu deu de gade Ih Israel de peu gwagi kecu tei lak." 9 Dede minadung sam kingnei tadi, nah RAMPAUBE Israelme dwa ga tei ngkap kedi heleuhdung swade diki kecu maudung gage Manasseh penuide ngngwa gaidi. 10 Cine RAMPAUBE pe kilame caihakecime dage ranggai, 11 Kedanemene Judah gwangpei Manasseh ma kemneeu aidungde tei gaida, nah Amorme pe dwa ga tei kegai swa de siaki kecudung teigai, nah pe miedung de le Judah de kemau gage ngngwa gaidi 12 cine RAMPAUBE Israel Tinggwang, ainzwa rangzeu: Pielo, Ih Jerusalem nah Judah gage aikenzwa kekap ge langgai zieda, nah cide ha siu kelume de keheu dizie. 13 Ih Samaria de ngkap kegai nzwa ci kesiakke Jerusalem de de ngkap dizie, nah Ahab leuhme de ngkap kegai nzwa; Ih Jerusalem minadung de maimci dizie, li ge hui mci kedi nzwa, cide hui kedi nah ngkum kedi nzwa beu zie. 14 Ih a mapwamaleuhme bang kelume de gi dizie nah penuide penui ngauraume ba gage kai dizie. Penuide ngauraume ne ngam luzie, nah penui ngauraume leune ziemne penui au tui kelu mabam ge dizie, 15 kedanemene penui a miakngau gade kemau tei gaidi, nah penui paume Egypt ga mpet kelu gade henai kecang a rata tei kedine.

16 Cipaureude, Manasseh Jerusalem penli tuge lam de kedale ge ketsai le teipui di kemaktane maukemakme jai tei lwa gai. Pa aide Judah de peu kemau tei kegai gage si eh tei gai, penui RAMPAUBE miakngau gade kemau tei kegaidau. 17 Manasseh tei kegai ha kedadung, pa kemau tei kedi leune, cidungde Judah gwangpei heta ketei hakwak gage rau pwala meni? 18 Manasseh pe paume de ngngwa tsaidi nah pekatei pe ki gurie Uzza gurie gage kungdi. Amon pe napei pebam leu eh hegwang teidi.

19 Amon hegwang tei kelu dau pa mmi ngkaiekena di; pa Jerusalem ga mmi kena hegwang tei. Pe pui zi cai Meshullemeth; pa cai Jotbah Haruz napui. 20 Pa RAMPAUBE miakngau gade kemau teidi, pe pei Manasseh tei kegai nzwa. 21 Amon pe pei tet kegai puisau leune ga nzuidi nah cidungde ga keumie eh pe pei mamie reca kela de reca di. 22 Pa RAMPAUBE, pe paume Tinggwang de mlai di, nah RAMPAUBE lampui ga tet ma. 23 Amon kilame pecu mmau eh heciem riemlu delwe hegwangpei de pekatei pe ki gade teitsetti. 24 Dede hangdeu ga kebam mina ne hegwangpei Amon de mmau eh heciem riem kelamedung de teitsetti, nah penui pe napei Josiah de peu pe bam leu eh hegwang teilu. 25 Amon tei kegai ha kedadung, pa tei kedidung, cidungde Judah gwangpei hakwak gage raupwa la meluini? 26 Minadung pecu Uzza gurie pe rau gage kungdi, nah pe napei Josiah pebam leu eh hegwang teidi.