1 Jehu hegwang tei kelu mmi hena bekum, Joash hegwang tei cuhdi, pa Jerusalem ga mmi riakdai hegwang tei. Pe pui zi Zibiah, pa au Beershebame. 2 Joash RAMPAUBE miakdwa gade petaube tei muila, kedanemene cingkupei Jehoiada pe dage ranglia kebeune. 3 Dede nlumkemakme nidung keugi dima. Minadung cude ratak tei nah perim kehengui nlumkemak nidung gage rugai la.

4 Joash cingkume dage ranggai, "RAMPAUBE kiga kemci makai teu kegwang rangkang pelane hekwalu, hange ge dade keu kela rangkang de, hezi kerau gade ha kelade mede, mige sampet kegai gade ngau kelude, mede RAMPAUBE ne helung tei beu eh minadung suiyi makai keu gwang kelade, 5 cingkume rangkang keteume penui hangge dade rangkang keulu kerabe iciu eh kerecaki ga siakedi kengau keheibe de retaklu kerane." 6 Dede Joash Hegwang tei kelu mmi ngkaiekecum bekum kecang de cingkume kerecaki retak ma. 7 Cine Hegwangpei Joash, cingkupei Jehoiada nah cingku kedame de ku gai, pa penui dage rangdi, "Nnui daitei eh kerecaki ga magede retak meno? Cu gade nnui rangkang keu kelame dade keusi talu, dede kerecaki retak kera ziemne hekwa kelude keulu delwe nah retaklu kebuime de cide peulu." 8 Cine cingkume minadung dade rangkang keu tadi kera nah kerecaki de retak tadi kera penui kesuisam lu.

9 Meliene, cingkupei Jehoiada ubung pwalu, pegum gage peki teitiplu, delwe ubung de recabam taiga ge kaizeu, RAMPAUBE ki ga lüt ge zetle ge. Cingkume kerecaki kimui kwa kebamme RAMPAUBE ki ga rangkang kegwang pelane pwa ubung de gage kailu.✝ 10 Keheidaude penui ubung de rangkang pui kedi ngau luge, hegwangki ga keraube penai cingku kedibe gwang delwe rangkang bungdung gage kaidi nah cide peilu, RAMPAUBE kerecaki gade rangkang ngaukelu. 11 Penui rangkang mdet kelude RAMPAUBE kerecaki ga pie kerengeime ba gage kaibeu dila. Penui cide RAMPAUBE kerecaki ga tsingtaketeime nah bata tei kebamme de peu dila, 12 nah tangtsu ta keteime nah tangtsu kepangme zie teibeu la, RAMPAUBE kerecaki retak kerane tsing nah tangtsu lui kedi ziemne, nah cide retak kerane mpet maikesia pelane ziemne. 13 Dede cipau rangkang de RAMPAUBE ki ga keu kegwang ketde rangkanggeu piakdung, mitaubungdung kemtautiedung, hekwak, teluidung, mede kecak mede rangkanggeu nia ge ketei zie tei ma. 14 Penui aipau rangkang de RAMPAUBE ki retak bam kecume de peudi. 15 Cipau reude, bata kerengeime dade rangkang ha rang mci liagai kera gede tei dima, kedanemene mina aidungde au masangsüt kecune. 16 Dede teimau kedi recadung ziemne kaikebeu rangkang nah kemau recadung ziemne kaikebeu rangkang de RAMPAUBE kerecaki gage kai ma, kedanemene cide cingkupeidung gu kecune.

17 Cidau Aram Gwangpei Hazael Gath de gwaketang nah regi, delwe cide gwalu. Pecai Hazael Jerusalem gwaketang kera cetlu. 18 Judah gwangpei Joash pepei Judah gwangpeidung Jehoshaphat nah Jehoram nah Ahaziah teimci kedi, nah pa ne teimci kegai de ma pelane keulu, nah RAMPAUBE ki nah hegwangki ga mania kibungdung gade kecakdung ngaukelu pelane Aram gwangpei Hazael dage langgai beudi. Pecai Hazael Jerusalem gade tetdi.

19 Joash tei kegwang pelane, cidungde Judah gwangdung hakwak gage raupwala meni? 20 Pe kilamedung ngngwa heciem riem cuhdi; penui Silla kehung lampui, Beth Millo gade Joash de gwaketang. 21 Shimeath napei Jozabad* nah Shomer napei Jehozabad, pe kilamedung, pecu gwaketang, nah pa tsaidi. Penui Joash de David namdi ga pe paume de kekung gage kungdi, nah pe napei Amaziah pe bam leu eh hegwang teidi.