1 Jehoahaz napei Jehoash Israel ga hegwang teikelu mmi pekenabe kum, Joash napei Amaziah, Judah gwangpei, hegwang tei cuhdi. 2 Pa hegwang tei keludau pa mmi ngkaiemengei di; pa Jerusalem ga mmi ngkaiehekui hegwang tei. Pe cai Jerusalemme, pe zi Jehoaddan. 3 Pa RAMPAUBE miakdwa gade petaube teilu, dede pe pau David nzwa ma. Pa ma pelane pe pei nzwa Joash teigwang. 4 Dede nlumkemakme reca nidung tei ngkau dima. Mina cu kecang nlumkemakme reca nidung gage ratak teigai nah kehengui rugai jüja ladi. 5 Aiciu la pe hegwang tei ngkienglu herizi, pa pe pei, hegwangpei de daptset kedi kilame de teitsetdi. 6 Dede pa mide dapketsetme name de teitsetdi ma; meliene, pa Moses zai laisiukwak gage rauteu kela nzwa RAMPAUBE ne rang kebeubedung de mzuilu eh, ranggai, "Mipuipei de penui name mau ziemne teitsetdi lak, mede hename de penui puipei mau ziemne teitsetdi lak. Meliene, mina keheibe de pekatei pe mau ziemne teitset zie." 7 Pa Mcai langkam gade Edom reugwame cang kerei de teitsetdi; pa hereu gade Sela namdi de tuilu nah cide de Joktheel lie qula, henai kecang de cinzwa qula. 8 Pecai Amaziah samgwame de Jehoahaz napei Jehoash Jehu capei Israel gwangpei de langgai eh ranggai, "Anui hereu gade gwang kezumok eh redau go." 9 Dede Israel gwangpei Jehoash samgwame de Judah gwangpei Amaziah da langgai cailigai eh ranggai, "Lebanon ga kebam hetupui ge Lebanon ga cedar bang ge dage sam langgai eh ranggai, ‘N napui de peu a napei naulo,’ dede Lebanon ga makaune ge kahgwang eh hetupui de dau ngkaudi. 10 Nang Edom de ngam kesang luda, nah ngang dida. Nang ngkieng kelu dega hegie bamlu, dede kilung ga bamlu, kedanemene daitei nang ncu nah Judah de kekap peu kerabe rünne peei lano?" 11 Dede Amaziah kingnei raudi. Cine Israel gwangpei Jehoash gwakwtang eh pa nah Judah gwangpei Amaziah Judah deu Beth Shemesh gade hangge gede keregi. 12 Judahme de Israel ne ngamdi, nah mina keheibe de peki riep gage pakgai di. 13 Israel gwangpei Jehoash, Beth Shemesh gade Judah gwangpei Amaziah, Jehoash napei Ahaziah capei de tuilu. Pa Jerusalem ga gwanglu delwe Jerusalem kirie de tei ngkaudi Ephraim Rieki gade kimiak Rieki ga kecang, pemdei cubit hai mdai nage. 14 Pa rangkanggeu nah kecak pelane nah maniadung leune RAMPAUBE ki gade ngaukeludung nah hegwangki mabam pemi kehung pelane punglu eh tuikelume de ngngwalwe Samaria ga cailigwangdi. 15 Jehoash tei kegwang kedadung nah pa tei kegai leune, pe kengkieng, nah pa Judah gwangpei Amaziah de ngngwa hereu ketei ha cidungde Israel gwangpeidung hakwak gage raupwala meni? 16 Pecai Jehoash pe paumedung nzwa tsaidi nah Samaria ga Israel gwangpeidung de kekung gage kungdi, nah pe napei Jeroboam bam leu eh hegwang teilu. 17 Israel gwangpei, Jehoahaz napei Jehoash tsaikedi cai, Judah gwangpei Amaziah Joash napei mmi kereimengei lunghlu. 18 Amaziah tei kegwang kedadung, cidungde Judah gwangpeidung hakwak gage raupwala meni? 19 Penui Amaziah de teitsetdi kera Jerusalem gade heciem ge riem, nah pa Lachish gage pak gaidi. Pa Lachish gage pakgai di, dede penui minadung de langgai eh pecu Lachish ga zuimie eh cikade pecu teitsetdi. 20 Penui pecu hekwen ge gage pung cailigwangdi, nah pecu David namdi ga paumedung kekung gage kungdi. 21 Judah minadung pelane ngngwa Azariah, mmi kereieherok gede peu pe pei Amaziah bam leu eh hegwang teilu. 22 Hegwangpei Amaziah pe paume de nzwa tsai kedicai, Azariah Elath retaklu delwe Judah de peu daidi.

23 Joash napei Amaziah Judah ga hegwang teikelu mmi kereimengei bekum, Jehoash napei Jeroboam Samaria ga hegwang tei cuhdi, pa mmi riakdaieket hegwangtei. 24 Pa RAMPAUBE miakdwa gade kemau teidi. Pa Nebat napei Jeroboam Israel de kemau puisau gage ngngwa kegaibe maudung de gidi ma. 25 Pa Israel rai Lebo Hamath gade Arabah Jaaidi ga kecang tui dailu, RAMPAUBE, Israel Tinggwang samdung de mzai eh Gath Hepher gade kegwang pe kilabe caihakecibe Jonah, Amittai napei dage sampet kebeude. 26 Kedanemene RAMPAUBE Israelme keherei kebam de ngau kelune, cide pelane ziemne rei süt kecu ge, hebaangme nah hebaang teikemakme ziemne de, nah Israelme de ngha kera migede gahdi. 27 Cine RAMPAUBE tiggim kangde Israel de pa ngkap zingdi laklie ranggai; meliene, pa penuide Jeroboam Jehoash napei ba gade kelibeu. 28 Jeroboam tei kegwang kedadung, pa tei kedi pelane, pe kengkieng, pa hereu ketei nah Israel ziemne Judah da kebam Damascus penai Hamath de ngau dai kelu aidungde Israel gwangdung hakwak gage raupwala meni? 29 Jeroboam pe paume, Israel gwangdung nzwa tsaidi, nah pe napei Zechariah pebam leu eh hegwang teilu.