1 Jeroboam Israel gwangpei hegwang teikelu mmi ngkaiehena bekum, Judah gwangpei Azariah Amaziah napei hegwang teilu. 2 Azariah mmi kereieherok dige pa hegwang teilu, nah Jerusalem ga pa mmi riakngeiekena hegwangtei. Pe pui au Jerusalemme, pe zi cai Jekoliah. 3 Pa pe pei Amaziah tei kegai nzwa RAMPAUBE miakdwa gade petaube teilu. 4 Ciuliede, nlumkemakme reca nidung de au keugi dima. Minadung cu kecang de cikage ratak nah marim kehengui rugai la. 5 RAMPAUBE hegwangpei de teikeherei gai iciu eh pa ketsai benai kecangde mpa ladi nah ki ketsam ga lunghdi. Hegwangpei napei Jotham, pe kilungme nah mina reu kedi teidi. 6 Azariah tei kegwang kedadung, pa tei kedi leune, Judah gwangpeidung hakwak gage raupwala meni? 7 Cine Azariah pe paume de nzwa tsaidi; penui pecu David namdi ga pe paume de kekung gage kungdi. Pe napei Jotham pe bam leu eh hegwang teilu.

8 Judah gwangpei Azariah hegwang tei kelu mmi camreieheset bekum, Jeroboam napei Zechariah Samaria ga kei herok ge Israel reu hegwangtei. 9 Pa pe pei tei kegai nzwa, RAMPAUBE miakdwa gade kemau teidi. Pa Nebat napei Jeroboam, Israel de kemau gage ngngwa kegaibe maudung de gidi ma. 10 Shallum Jabesh napei Zechariah de teitset kera heciemtei di, pecu Ibleam gade gwaketang, nah pecu teitsetdi. Pecai pa pe bam leu eh hegwang teilu. 11 Zechariah tei kegai kedadung, cidungde Israel gwangpei hakwak gage rau pwala. 12 RAMPAUBE Jehu dage sampet kebeude tei canglu, "N leuhme ceheu mdai kecang Israel hegwang ga hegwang teizie," de kebeude.

13 Judah gwangpei Azariah hegwang tei kelu mmi camreiehekui bekum Shallum Jabesh napei hegwang teilu, nah pa Samaria ga keige rünne hegwangtei. 14 Menahem Gadi napei Tirzah gade Samaria ga nghang. Samaria gade pa Shallum Jabesh napei de gwaketang. Pa pecu teitsetdi nah pebam leu eh hegwang teilu. 15 Shallum tei kegai kedadung nah pa mbai eh tei kedi hade, cidungde Israel gwangpeidung hakwak gage raupwala. 16 Pecai Menahem Tiphsah, cika kelunghme pelane, nah Tirzah twagwa kebam deuraidung de gwaketang, kedanemene penui pecu namdi de ngkeibeu kemakne. Cine pa cide gwaketang, nah pa renam cika tetlak kelapui zadung rakpop ciodi. *

17 Judah gwangpei Azariah hegwang tei kelu mmi camreiehekui bekum, Gadi napei Menahem Israel reu hegwang teilu; Pa Samaria ga mmi kerei hegwangtei. 18 Pa RAMPAUBE miakdwa kemau teidi. Pe teilung pelane, pa Nebat napei Jeroboam, Israel de kemau gage ngngwa kegaibe maudung de gidi ma. 19 Pecai Assyria gwangpei Pul hangdeube de renia gwang, nah Menahem Pul de rangkanggeu talent cangge peu, iciu eh Pul ngha pa ngaulu eh pe ba ga kebam Israel gwangram teingkienglu kerane. 20 Menahem Assyria gwangpei de peu kerane rangkanggeu cide Israelme keheime dade ngaulu, penui hangge de peu pecu rangkanggeu shekel riakngei peu. Cine Assyria gwangpei cailigwangdi nah hangdeu cika bam tadi. 21 Menahem tei kegwang kedadung, nah pa tei kedi leune, Israel gwangpeidung hakwak gage raupwala meni? 22 Cine Menahem pe paume nzwa tsaidi, nah Pekahiah pe napei pe bam leu eh hegwang teilu.

23 Judah gwangpei Azariah hegwang tei kelu mmi riakngei bekum, Pekahiah Menahem napei Israel reu Samaria ga hegwang teilu; pa mmi kena hegwangtei. 24 Pa RAMPAUBE miakdwa gade kemau teidi. Pa Nebat napei Jeroboam Israelme de kemau gage ngngwa kegaibe maudung de pütdi ma. 25 Pekahiah da kedime ge Remaliah napei pezi Pekah bam, cipaude heciemtei eh pecu ketang. Gilead gade mina riakngei de ngngwalwe, Pekah ne Pekahiah, Argob nah Arieh de Samaria ga, hegwangki kuda gade teitset di. Pekah Pekahiah de teitset di delwe pe bam leu eh hegwang teilu. 26 Pekahiah tei kegai kedadung, pa tei kedi leune, Israel gwangpeidung hakwak gage raupwala.

27 Judah gwangpei Azariah hegwang tei kelu mmi riakngeiekena bekum, Remaliah napei Pekah Israel reu Samaria ga hegwang teilu; pa mmi ngkai hegwangtei. 28 Pa RAMPAUBE miakdwa gade kemau teidi. Pa Nebat napei Jeroboam, Israel de kemau gage ngngwa kegaibe maudung de gidi ma. 29 Israel gwangpei Pekah hegwang ketei ting dau, Tiglath-Pileser Assyria gwangpei gwang nah Ijon, Abel Beth Maacah, Janoah, Kedesh, Hazor, Gilead, Galilee, nah Naphtali deu pelane tuilu. Pa Assyria gage minadung de ngngwa tetgaidi. 30 Cine Hoshea Elah napei Remaliah napei Pekah de mmau eh heciem riemlu. Pa pecu gwaketang nah pecu teitsetdi. Pecai pa pe bam leu eh hegwang teilu, Uzziah napei Jotham hegwangtei kelu mmi ngkai bekum. 31 Pekah ha keda teikedidung, pa tei kegai leune, cidungde Israel gwangpeidung hakwak gage raupwala.

32 Remaliah napei Pekah, Israel gwangpei, hegwang tei kelu mmi kena bekum, Azariah napei Jotham, Judah gwangpei hegwang teilu. 33 Pa hegwang tei kelu dau pa mmi ngkaiemengei di; pa Jerusalem ga mmi kereieherok hegwangtei. Pe pui zi cai Jerushah; pa cai Zadok napui. 34 Jotham RAMPAUBE miakdwa gade kemau teidi. Pa pe pei Azariah tei kegai leune puisau de nzuidi. 35 Ciuliede, nlumkemakme reca nidung au keugi dima. Minadung cu kecang de kereca nidung gage ratak teigai nah kehengui rugai. Jotham ne RAMPAUBE ki nreule rieki de teigai. 36 Jotham tei kegai kedadung, nah pa tei kedi leune, Judah gwangpeidung hakwak gage raupwala meni? 37 Cipau tingdau RAMPAUBE ne Aram gwangpei Rezin, nah Remaliah napei Pekah de Judah gwaketang kera langgai. 38 Jotham pe paume nzwa tsaidi nah David namdi ga pe paume de kekung gage kungdi. Pecai pe napei Ahaz, pe bam leu eh hegwang teilu.