1 Judah Gwangpei Ahaz hegwang tei kelu mmi kereiekena bekum, Elah napei Hoshea hegwang tei mdeulu. Pa Samaria ga Israelme reu mmi hekui ge hegwang tei. 2 Pa RAMPAUBE miakdwa gade kemau teidi, dede pedwa Israel gwangdung tei kegwang mau kieege tei dima. 3 Assyria gwangpei Shalmaneser pecu gwaketang, nah Hoshea pe kila tei, nah heraha pecu pwapeudi. 4 Ge Assyria gwangpei Hoshea heciem kesia riam kebam cilu, kedanemene Hoshea Egypt gwangpei So dage samgwame de langgai; nah pa Assyria gwangpei de heraha mmi ramsang peu kela nzwa de peu tadi. Cine Assyria gwangpei pecu tuilwe hebaangki gage baangdi. 5 Pecai Assyria gwangpei hangdeu pelane gwaketang eh Samaria gwaketang nah mmi kecum ge cide twagwa pwa bamdi. 6 Hoshea hegwang tei kelu mmi hekui bekum, Assyria gwangpei Samaria tuilu nah Israelme de Assyria ga nimteu gwangdi. Pa penuide Halah, Gozan ga Habor Reuki, nah Medes namdidung gage kaidi.

7 Kedanemene Israelme RAMPAUBE penui Tinggwang, penuide Egypt gwangpei Pharaoh ba gade nah Egypt deu gade ngngwampet kebeube dage kemau teigai kedine, penui mibaang teidi. Penui hera keda dungde recadi, 8 nah RAMPAUBE ne Israelme dwade gwagi kedi leuhdung zai mzui, nah Israel gwangpeidung ne hezai tei kebeudung nzuidi. 9 Israelmedung ngkim eh, RAMPAUBE penui Tinggwang, dwa de petau kemakbedung teidi. Penui ziemne penui nlumkemak reca nidung penui namdi leune ga, reketbam gade riekelu namdi ga kecang teilu. 10 Hangdeutu kehu leune gage nah tsingbang kemdiak leune kangga penui tsusumdung nah Asherah miedung sum silu. 11 RAMPAUBE penui dwa gade gwagi kedi leuhdung zai mzui eh penui nlumkemak reca nidung leu gage kehengui rugai. Israelme kemau tadung tei eh RAMPAUBE rata teidi; 12 penui mamiedung de recadi, RAMPAUBE penui dage, "Nnui ma aidungde tei lak," de eh rang liede. 13 Dede RAMPAUBE ndugai, Israel penai Judah dage peu pe samgwame leune nah caihakecime leu dage, rang eh, "Nnui kemau lampui gade nreulu nah aja nah hezaidung Ih kai kebeu de mzailu, nah Ih nnui paume nah Ih a kilame caihakecime dade nnui dage kaikebeu hezaidung pelane mzai sünne lulo." 14 Dede penui kingnei tadi, meliene penui lung hung zudi eh penui peimedung RAMPAUBE penui Tinggwang de nlumlu kemakme nzwadi. 15 Penui pezaidung nah pa penui paume de ngngwa samkak keludungde, nah samkak kelu hezaidung pa penuide kepeudung mzai raudi. Penui kemta miedung caisuidi nah penui penuikatei kemtame teidi. Penuide twagwa pung kebam mamie de reca kela leuhdung zai, RAMPAUBE reli helo penuide aja kaibeu liede penui suidi. 16 Penui RAMPAUBE penui Tinggwang sam kaikebeu pelane gikahdi. Penui reca kera hegeu tumseu rehi kena teilu. Penui Asherah mie gede teilu, nah penui tinggim ga hegidung pelane nah Baal de recadi. 17 Penui penui napeidung nah napuidung de pwa keru ratak teigai, penui rekame nah kehemeu dung sui keteudi, penui RAMPAUBE miakdwa gade kemaube gage penui ting ngngwangdi, nah penui pe rata teidi. 18 Ciziemne RAMPAUBE Israelme de pe rata sütti nah pe miakdwa gade penuide keu gidi. Judahme leuhme gwale migede bam si tadi.

19 Judah kecang de RAMPAUBE penui Tinggwang ajadung mzailu tadi, nah penui Israel tei kela caisui teidi. 20 Cine RAMPAUBE Israel leuh pelane de pütti; pa penuide keherei peu nah penui ngauraume ba gage kaidi, pa pe miakdwa gade penuide gwa gidi kemaktane. 21 Pa David kedi ria gade Israel de teu pangdi, nah penui Nebat napei Jeroboam de peu hegwang teilu. Jeroboam Israel de peu RAMPAUBE caisui tei melu kerane teu ntsamdi, nah penuide peu kemau kedi teidi. 22 Israel leuhme Jeroboam kemau ta leune nzuidi, nah penui cidungde gade mpet ntsamlu tadi. 23 Cine RAMPAUBE Israel de pe dwa gade gwa gidi, pa pe kilame caihakecimedung dage pa teizie lie kerang nzwa eh. Cine Israel de penuikatei penui deu gade langgi pwa Assyria gage kaidi, nah cu kecang de ainzwa cika lunghla.

24 Assyria gwangpei Babylon, Kuthah, Avva, Hamath nah Sepharvaim gade mina de ngngwa gwanglu, nah Israelme langgai kedime nding gade penuide peu Samaria namdidung lunghlu. Penui Samaria gumlu nah namdidung ga lungdi. 25 Penui cika lungh mdeu keludau penui RAMPAUBE de reca tadi. Cine RAMPAUBE hinghodung penui kakga ge langgai eh kangge de teitsetdi. 26 Cine penui Assyria gwangpei dage ranggai, "Nang heleuhdung de peu gwang Samaria namdidung ga lungh kedimedung Tinggwang lukeneu zaidung de ci ma. Cine pa hinghodung de penui kakgage langgai, nah ainie, hinghodung minadung de teitset bam dida, kedanemene penui cipau deu ga Tinggwang luukeneu zaidung ci kemakne."

27 Cine Assyria gwangpei aja kai eh ranggai, "Nnui cikade ngngwa gwang kelu cingkume gede ngngwa gwanglu, delwe pecu peu mie cika lunghlu, iciu eh pecu peu penuide cipau deu ga Tinggwang luukeneu zaidung minadung dage ledeu beulu." 28 Cine penui Samaria gade langgi kedi cingkume gede peu gwang eh Bethel ga lunghlu; pa penuide dainzwa RAMPAUBE de reca labi ledeubeu. 29 Heleuh ketsamtsam penuikatei penui gu rabe mie riep teilu, nah cidungde Samariame ne tei kelu nlumkemakme reca nidung gage kailu, heleuh ketsamtsam leune penui lungh kebam namdidung gage kailu. 30 Babylonme Succoth Benoth rabe mie teilu; Kuthahme ne Nergal rabe mie teilu; Hamathme Ashima rabe mie teilu. 31 Avvime Nibhaz nah Tartak rabe mie teilu. Sepharvame penui name de mi gage keru ratak tei pwa Sepharvame rabe Adrammelek nah Anammelek de peu. 32 Penui RAMPAUBE de herüt peu, nah penuikatei penui kakgade kerecadung ga cingkume tei kera kedetlu, mina aidungde penui ziemne kereca nidung kerecakidung ga ratak teibeu. 33 Penui RAMPAUBE de herüt peu, nah penui rabe dede reca, heleuhdung kakgade penui langgi kedimedung zai mzaidi.

34 Henai kecangde penui penui zaidung kehegwa de ga tetla. Penui RAMPAUBE de herüt peu ma, mede penui hezaidung, aja, mede RAMPAUBE, pa Jacob leuhme de peu Israel zielie de msiak kebeube aja kai kebeudungde mzai ma. 35 Kedanemene RAMPAUBE penuide ngngwa samkakkelu ge teilu delwe aja kaigai, "Nnui hera kedadungde reca so, mede nnui penui da keumie so, mede penui gwatei so, mede penui dage ratak teigai so. 36 Dede RAMPAUBE, Egypt deu gade kengking nah pumchi kedi teu eh, nnuide ngngwa mpet kebeube de nnui herüt peu maisia, nnui pe dage keumie zie nah nnui pe dage ratak teigai zie. 37 Pa hezaidung pelane nah ajadung nnui ziemne rau kebeudung, nnui cidungde kelungta mzai zie. Cine nnui hera kedadung de reca so, 38 nah Ih nnuide ngngwa samkak kelude, nnui nsungta lak; mede hera kedadungde nnui herüt peulak. 39 Dede RAMPAUBE nnui Tinggwang de nnui herüt peu maisia. Pa nnui ngauraume kengking gade nnuide keli beuzie." 40 Penui kingnei tadi, kedanemene penui ndaa tei kelabe tei jüja la kedine. 41 Cine heleuh aidungde RAMPAUBE mie hinglu, nah penui ne tei kelu miedung de de penui recadi, nah penui name de nah, penui tsamedung de cinzwa teigwang. Henai kecang de penui paume tei kelade penui tei jüja ladi.