1 Cine hegwangpei, samgwame de langgai eh penui Judah nah Jerusalem ga hangkiame pelane de pe dage qu hekwa gailu. 2 Ge hegwangpei, Judah ga minadung pelane nah Jerusalem ga kelungme pelane, nah cingkume, caihakecime nah minadung pelane, keceu gade kedi kecang pecu nzang eh RAMPAUBE ki ga hangdi. Cidau pa, RAMPAUBE ki gade ngau kelu Samkak laisiukwak samria pekiene penui kangbau kebam gade peigai. 3 Hegwangpei kipi ga saplu delwe RAMPAUBE dwa gade samkaklu, pe mlung pelane nah pe keringria pelane teu eh RAMPAUBE caisui kera nah pe ajadung mnei kera, pe zaidung mzai kera, samkakkelu aipau samdung de aipau laisiukwak ga raupwa kebam de teicanglu kerane. Ciu eh mina pelane samkakkelu de mzai kera sampetlu.

4 Hegwangpei cingku kedibe Hilkiah, pe kangga kebam cingkumedung, nah kirieki kwa kebammedung de RAMPAUBE kerecaki gade Baal nah Asherah de, nah tinggim ga hegidung leune de teu kereca niadung pelane keu mpetti lo aja kaigai. Pa cidungde Jerusalem gwale luhdung ga Kidron langkam gage rudi delwe pe mimütdung Bethel gage pwa gaidi. 5 Pa mamie kereca cingkumedung Judah gwangpeidung ne peu Judah namdidung ga nah Jerusalem taigadung ga nlum kemakme reca bamdung ga perim kehengui ru kera kedet kelumedung de keu mpetti, Baal de, tingnaimiak, hekei, kideudung de, nah tinggim gidung pelane de kehengui rugai kebeume de. 6 Pa RAMPAUBE kerecaki gade Asherah mie keu mpetti, Jerusalem gwale Kidron langkam gage delwe cide cikage rudi. Pa cide teikecai pwa rebui teidi delwe cipau rebui de mteibena raukie gage teizangra gai di. 7 Pa RAMPAUBE kerecaki ga kebam kerecaki helipeidung kibungdung, mipuidung Asherah ziemne painidung dak kela bungde tei gidi. 8 Josiah Judah namdidung gade cingkume pelane de ngngwa gwanglu delwe cingkumedung kehengui ru kela recabam dungde tei heradi, Geba gade Beersheba kecang. Pa heriekidung ga kereca nidung Joshua rieki (deuceudibe) kimui ga kebam dungde teingkap di, namdi rieki hile kebamde. 9 Cipau recabamdung cingkume dungde peu Jerusalem ga RAMPAUBE recabam ga hegwa tei kera peu meliede, penui cehikaikemak tangku de penui sinamedung de ngngwa tyei. 10 Josiah Ben Hinnom langkam ga kebam Topheth de tei heradi, ciu eh peu mige dede pe napei mede pe napui de peu Molech dage keru ratak ge tei eh mi gage rugai melu kerane. 11 Pa Judah gwangpeidung tingnaimiak dage reca tei mci gai kedi kündung de keu mpetti. Cidungde RAMPAUBE kerecaki kigu taiga bam, ki kerengei kedibe, Nathan-Melek kibung taiga. Josiah tingnaimiak dage reca teibeu kedi hekwen garidung de rudi. 12 Judah gwangpeidung ne tei kelu, Ahaz kibung nreube kipeureu ga recabamdung kebamdung de hegwangpei Josiah tei msiadi, nah RAMPAUBE kerecaki kigu kena ga Manasseh ne tei kegai recabamdung de si eh. Josiah cidungde rüt kecaigidi delwe cidungde Kidron langkam gage kelien gidi. 13 Hegwangpei Jerusalem naimiak kepetlebie mcikemak deutu ga kebam kereca nidung Israel gwangpei Solomon ne Sidonme kemneeu mie Ashtoreth ziemne tei pwa kebamdung de tei msiadi; Moabme kemneu mie Chemosh ziemne, nah Ammonme kemneeu mie Molech ziemne tei keludung de. 14 Pa tangtsu tsiadung de tei takcaidi nah Asherah miedung de teingkaudi delwe pa cipau nidung de mina rahdung le tei puidi.

15 Josiah Bethel ga kebam recabam de nah kereca ni Jeroboam Nebat napei (Israelme de kemau gage ngngwa kegaibe) ne tei kelude de teingkap ciakdti. Pa cipau recabam de nah kereca ni de de rudi delwe cide rütkecai pwa rebui teidi. Pa Asherah mie de si eh rudi. 16 Pecai Josiah pie twagwa kegai dau, pa hangdeutu reuga kebam heraudung de ngau. Pa mina rahdung heraudung gade keu mpet kerane minadung de langgai; delwe pa cidungde recabam gage rudi, ainzwa eh pa recabam de tei heradi. Aide Tinggwang minabe rang kegai RAMPAUBE sam, aidungde mrai rang nswa kegaibe de. 17 Pecai pa rangdi, "Ih kengau de cau rau no?" Ge namdi minadung pe sam keligai, "Cide Tinggwang minabe, Judah gade gwang eh nang Bethel recabam tei nsia kedi aidungde mrai rang kebeube rau lie." 18 Cine Josiah rangdi, "Cide peu bamlu. Migede pe rahdung li kelai lak." Cine penui pe rah nah Samaria gade kegwang caihakecibe rahdung deu keli tadi. 19 Pecai Josiah Samaria namdidung ga nlumkemak reca nidung ga kebam kidung pelane radi, cide Israel gwangpeidung ne tei kegaide, nah cide ne RAMPAUBE rata tei di. Pa Bethel ga tei kegai nzwa eh penui dage teigai. 20 Pa kerecabamdung ga bata ketei cingkume pelane de recabamdung gage gi gai nah pa penui reu gage mina rahdung pwa ru gai. Pecai pa Jerusalem ga cailigwangdi.

21 Pecai hegwangpei mina pelane dage aja kai eh ranggai, "Samkakkelu laisiukwak aipau de ga raupwa kela nzwa, kahkegwangngyi de RAMPAUBE n Tinggwang de kerüt gade mnei lulo." 22 Tutiakme ne Israelme de teu kegwangting gade, mede Israel mede Judah gwangpeidung tingdau leune ga cikenzwa Kahkegwangngyi madaude hengyi mereu. 23 Dede hegwangpei Josiah hegwang tei kelu mmi kereieheset bekum RAMPAUBE Kahkegwangngyi aide Jerusalem gade hengyilu.

24 Josiah ketsaime de mede rabe dungde mpau kelame desi eh gwagi di. Pa rekaniadung, mamiedung, nah kemneu niadung pelane Judah deu ga nah Jerusalem ga kebam pelane keu gidi, iciu eh cingkupei Hilkiah RAMPAUBE Kerecaki gade ngau kelu laisiukwak ga hezai samdung raupwa kela de teicanglu kerane. 25 Josiah dwale pa nzwa hegwang gede gah, pe mlung pelane, pe keringria pelane, nah pe kengking pelane teu eh RAMPAUBE da kegwang, nah Moses zai pelane mzai kelu. Mede Josiah nzwa hegwang gede pecai cuh luma.

26 Iciude, Manasseh RAMPAUBE rata tei eh bata kesiadung tei kegai leune ziemne Judah de mmau eh RAMPAUBE pe rata süt kebam de gade nghim dima. 27 Cine RAMPAUBE rangdi, "Ih Israel de a dwa gade keugi kedi nzwa Ih Judah de de keugi dizie, nah Ih kedet kelu Jerusalem, namdi aide, nah Ih ‘A zi cika bamzie’ de kebeu ki de de keu gidi zie."

28 Josiah tei kegai ha kedadung, pa tei kegai leunedung, cidungde Judah gwangpeidung hakwak ga raupwa bam meluini? 29 Pa hegwang ketei tingdau, Egypt gwangpei Pharaoh Necho, Euphrates Reuki gade Assyria gwangpei de regi kera mie. Hegwangpei Josiah Necho de hereu gade redau kera mie, nah Necho ne pecu Megiddo gade teitsetti. 30 Josiah kilamedung, pe paau Megiddo gade bagi ge gage punglwe Jerusalem ga pung gwanglu, delwe pe rau gage pecu kungdi. Pecai Judah ga minadung Josiah napei Jehoahaz de ngngwalu, pecu keniaklu delwe peu pe bam leu eh pecu hegwang teilu.

31 Jehoahaz hegwang tei kelu dau pa mmi ngkaiekecum di, nah pa Jerusalem ga keicum hegwang tei. Pepui zi cai Hamutal; pa Libnah gade kegwang Jeremiah napui. 32 Jehoahaz RAMPAUBE miakngau gade kemau teidi, pe paume tei kegwang leune nzwa eh. 33 Pharaoh Necho Hamath deu Riblah gade pecu hebaangki gage kaidi, iciu eh pa Jerusalem ga hegwang tei melu kerane. Pecai Necho Judahme de peu heraha rangkanggeu talent haige nah kecak talent ket* suh. 34 Pharaoh Necho Josiah napei Eliakim de peu pe pei Josiah bam leu eh hegwangpei teilu, delwe pezi msiak lipwa Jehoiakim teidi. Dede pa Jehoahaz de Egypt ga ngngwa mie di, nah Jehoahaz cika de tsaidi. 35 Jehoiakim rangkanggeu nah kecak de Pharaoh de ha beu. Pharaoh kie kebam heraha de teicanglu kerane, Jehoiakim minadung dade heraha ha nah pa hangdeu ga minadung de kemei tei eh peu rangkanggeu nah kecak penui mabam rehi gade peu pwa pecu peu.

36 Jehoiakim pa hegwang tei keludau pa mmi ngkaiemengei di, nah pa Jerusalem ga mmi kereieket hegwang tei. Pepui zi cai Zebidah; pa au Rumah gade kegwang Pedaiah napui. 37 Jehoiakim RAMPAUBE miakngau gade kemau leu teidi, pe paume tei kegwang nzwa eh.