1 Cu caihakecime napei hangge nau hap eh Elisha da gwang eh ranggai, "N kilabe a nahpei au tsai dida, nah n kilabe RAMPAUBE de rütkela nang ci. Cu pa pe paupung kelabe pe kila tei kerane a na hangnana de ngngwa teudi kera gwangla bam." 2 Cine Elisha pe dage rang, "Ih nziemne daipai tei lai? N kiga dai bam bi acu ranglia lo?" Pa rang eh, "N kilabe kiga au magede galie, maca bung ge gwale." 3 Pecai Elisha rang, "N kidame dade mie mabungdung releu teugwanglu, kemrwa bungdung. Ngaulu kebui kieege releulu. 4 Delwe nang nah n napei kena kilung ga nlütlu nah kikam ngkui dilu, delwe maca mabung cidungde leune gage rui gailu; mabung puikedibe teu ntsam dilu." 5 Cine pa Elisha dade tetdi nah pa nah pe napei kena de ngngwa nlütlu eh kikam ngkuidi. Penai mabungdung pe da pwagwangbeu, nah pa maca le nli puilu. 6 Mabungdung puidi ge, pa pe napei dage ranggai, "Mabung kedabe ada pwagwanglo." Dede pa pe dage rangdi, "Mabungdung bamsi me da." Cidau maca lwakebam mtakdi. 7 Pecai pa gwang nah Tinggwang mina de ranglia. Pa rang, "Miecu, maca de zwalu; hepau pungkela de ruidi, nah bangkelu de teu n name de ngngwa lunghlu."

8 Tingnaige Elisha Shunem ga miedi, cika mipui kenlang ge lunghbam; pa pecu ngngwa ketaktyei kera qu bi. Cine Elisha cika tetkah kegwang tane, pa cika taktyei kera mtakla. 9 Cipau puide pe nahpei dage rang, "Pielo, mina aika gwang bam kelabe de Tinggwang gu kemci peige lie kecu cu Ih cisiakte bam dida. 10 Elisha ziemne kireu gage hezeubung keceunage tei lugo anui, nah cikage zeu ge, kekaibam ge, bamrak, nah mitaubung ge kai lugo. Pecai pa anui da kegwang dau, pa cika bam luzie." 11 Cine Elisha cika gwang mtak dai kecu tingba dau, pa zeubung ga bamlu nah cika mtaklu. 12 Elisha pe kilabe Gehazi dage rang, "Aipau Shunamme pui de qugai." Pa pecu qu kegai dau, pa gwang pe dwaga saplu. 13 Elisha pe dage rangdi, "Pecu rang beulo, ‘Nang keherei aikenzwa pungpwabeu anui reluilu kerane. N ziemne daige teibeu lai no? N ziemne hegwangpei mede reugwame reu muibe de anui resiu beu ziemi?’" Pa keligai, "Ih a minadung kakga lunghbam." 14 Cine Elisha rang, "Iciucai, anui pe ziemne dai teibeu lai no?" Gehazi keligai, "Kesang, pa pena mipeina gah, nah pe nahpei cing dida." 15 Cine Elisha keligai, "Pecu qugai." Pa pecu qu kegai dau, pa kimuiki ga saplu. 16 Elisha rang, "Mmi aipau hidau, mmi ge cia, nang mipeina gede n ba ga pwabam zie." Pa rang, "Ma, a mpaubo nah Tinggwang minabe, n kilabe dade mret helo."

17 Dede pecia bekum cipau hi tingsiak dau mipuibe tetlak lu nah mipeina ge de mnalu, Elisha pecu rang kebeu de nzwa eh. 18 Henanabe ngking cuh keludau, tingnai ge pa pe pei taiga mie, luhlüt kebamme de ngngwa kebam ga. 19 Pa pe pei dage rang, "A peu, a peu." Pe pei pe kilabe dage rang, "Pecu pepui da punggwang cu." 20 Kilabe pecu pwalu delwe pepui da ngngwa gwang kebeu dau, hena nabe pe nnie ga tingna kemaktane bamlu nah pecai tsaidi. 21 Cine mipuibe cuhlu nah mipeina de Tinggwang minabe zeu gage kaidi, kikam ngkuidi, nah tet petdi. 22 Pa pe nahpei de qulu, delwe rang, "Kehereide kilame hangge nah gada ge a dage langgai beulo iciude Ih Tinggwang minabe da mie nzetlu kera nah gwang dailu kerane." 23 Pe nahpei rangdi, "Nang daitei henai pe da mie neu lano? Hekei keheci de ma mede sabbath de ma." Pa keligai, "Maduma." 24 Pecai pa gada reuga bamlu nah pe kilabe dage rang, "Teupak nzet gailo; a ziemne pak nneu diso Ih rang kemaktane." 25 Cine pa mie eh Carmel Deutu ga Tinggwang minabe da gwang.

Cine Tinggwang minabe kemdei gade pecu ngau kegai dau, pa Gehazi pe kilabe dage rang, "Pielo, Shunamme pui de gwang lada. 26 Kehereide pak pet pecu daulu nah peda ranglo, ‘Nang nah n nahpei da nah n napei kena da maleune petau bam mi?’" Pa keligai, "Petau bam lie." 27 Pa lamlwa ga Tinggwang minabe da gwang keludau, pa pe pi tuipung bamdi. Gehazi pecu niagidi kera gwang dede Tinggwang minabe rangdi, "Pecu püt dilo, kedanemene pa pelung keherei sütbam, nah RAMPAUBE a dade cipau lungrei de kebai pwabam, nah magede acu ranglia ma." 28 Pecai pa rangdi, "A mpaubo, Ih nda de mipeina ge kie ni? ‘Acu cwa helo,’ de eh Ih rang meni?" 29 Pecai Elisha Gehazi dage rang, "Hebeuh tei kera ngunia kailu nah n ba ga a tuitie pwalu. Mipuibe kiga mie cu. Mina keheibede nang dau liede, pecu kelum so, nah keheibe ncu kelum liede, pecu sam keli so. Henana be zu gage a tuitie kai gailu." 30 Dede hena nabe pui rang, "RAMPAUBE ringkebam nzwa, nah nang ringkebam nzwa, Ih ncu püt dilak." Cine Elisha cuhlu delwe pe caisui tetdi. 31 Gehazi penai dwa kelwa gwang nah tuitie de henanabe zu gage kaigai, dede henanabe marang ma mede siu ma. Cine pecai Gehazi cailigwang Elisha de redau kera nah pecu ranglia, "Henanabe au nrak beu malie."

32 Elisha kilung ga gwangcang kecudau, henanabe tsai bam nah zeu ga bam reu. 33 Cine Elisha nlütlu nah henanabe nah pecu kikam ngkuinam di nah RAMPAUBE da kekie tei.✝ 34 Pa henanabe reuga nghang zeulu; pa pemui henanabe mui gage, pe miak henanabe miak gage, nah pe ba kena de henanabe ba kena de gage kaigai. Pa henanabe reuga zeu gaige, henabe peina de pum lum gwangdi. 35 Pecai Elisha cuhlu delwe kibung tet huigai nah pa henabe peina de reuga nghang zeu dailu. Henabe peina de pia hena tangseugai ge pe miak nraklu! 36 Cine Elisha Gehazi de qugai nah rang, "Shunamme pui de qugai!" Cine pa pecu qugai, nah pa kibung ga nlwet kecudau, Elisha rang, "N napei de pwalu."✝ 37 Pecai pa hangdeu ga pe pi ga pezu pung mielu delwe hangdeu ga keumielu, nah pecai pe napei de pwalu delwe tetdi.

38 Pecai Elisha Gilgal ga gwang dai. Hangdeu ga herakum kum bam, nah caihakecime namedung pedwa ga ntum bam. Pa pe kilabe dage rang, "Li kedi de mi gage kaigai nah taktyei langgailo caihakecime namedung ziemne." 39 Hangge pau luh ga mie giniadung peei hekwa kera. Pa renaam kubetsi ngaulu nah pe pai tei puilu kera kieege renaam kubetsi de rai hekwalu. Penui cidungde pang takcai lwe gi gage kai gailu, dede cidungde daipai kenzwabe bi kecu cima. 40 Cine penui taktyei de ruigai beu minadung de peu tyei kera. Pecai, penui tyei kebam dau, penui sahgai nah rang, "Tinggwang Minabe, li ga au ketsai bam lie!" Cine penui cide tyei si gai lakdi. 41 Dede Elisha rang, "Tokkui kesa pwagwang." Pa cide li gage kelien gai nah rang, "Minadung de cide ruigai beu, iciu eh penui tyeilu kerane." Pecai li ga magede mide teimsiadi kera bam tadi.

42 Mipei ge Baal Shalishah gade Tinggwang minabe da gwang nah luhlüt raitu kelu gade barley tangku kwak ngkai pe loko ga punggwang beu, nah teipuidung riau nnwa kelube. Elisha rang, "Aide mina dungde ha beudi ciu eh penui tyeilu kerane." 43 Pe kilabe rang, "Ih aide minadung haige dwa gage kaibeu zie deni?" Dede Elisha rangdi, "Aide mina dungde peulo, iciu eh penui tyeilu kerane, kedanemene RAMPAUBE ranggai, ‘Penui tyei luzie nah kesa tyeibang luzie’" 44 Cine pe kilabe penui dwa gage taktyei kaibeu; penui tyeilu, nah kesa tyeibanglu, RAMPAUBE sampet kai kebeu sam de siakte.