1 Elisha rangdi, "RAMPAUBE sam kingnei lulo. Ainzwa RAMPAUBE rangla: ‘Ncünne aikenzwa tingdau Samaria rieki gade tokkui mdet ge*, shekel ket le, nah barley mdet kena* shekel ket le zwa beuzie.’" 2 Pecai hegwangpei kedibe ba bagie teu kelabe de Tinggwang minabe sam keligai, "Pielo, magade RAMPAUBE tinggim gade kebaki teigai liede, aikenzwa ge tei lubui ni?" Elisha keligai, "Pielo, nang cide tei kedi n miak le ngau zie dede, nang cidung ketde tyei lak."

3 Cipau tingdau namdi rieki gwale mipei hang mdai kempa mateei bam la. Penui hangge hangge de rangdi, "Anui aika daitei tsai kemaktane bam lai no? 4 Magade anui namdi ga nlüt zielie de anui rang cai, ciucai namdi ga herakum kum bam nah anui cikade tsai dizie. Dede magade anui aika bam liede anui tsai dizie. Cine, gwanglo, anui Aramme reugwame taiga mie cugo. Magade penui anuide nzang bam beuzie liecai, anui ring luzie, nah penui anuide teitset dicai, anui tsai dizie." 5 Cine penui mui rim mie kecudau cuh eh Aramme ramzeuki gage tetgai, penui tet gwang ramzeuki ga mie canglu ge, migede cika bam ma. 6 Kedanemene Rampaube ne teipwa Aram reugwame de peu hekwendung kwa nah bagidung kwa de nah reugwame kieesüt eh gwangkela kwa peu siu gaige penui hangge hangge dade rangdi, "Israelme hegwangpei au Hittitme gwangpeidung nah Egyptmedung de li pwa anuide gwaketang kera gwang." 7 Cine reugwamedung cuhlwe mui rim kecudau pakdi; penui penui paikidung, penui hekündung nah penui gadadung nah ramzeuki pelui pela kai pütdi delwe penui kering ria ziemne pakdi. 8 Mpa kelamedung ramzeuki tu lebie gwang cang luge, penui paiki ge ga lütlu delwe penui tyei nah saklu nah rangkanggeu penai kecak nah paidung pwa mie eh cidungde kebailu. Penui cailigwang dai lwe paiki keda ga lütlu delwe cikade mah kebamdung kecung dailu delwe keu mie eh cide kebailu.

9 Pecai penui hangge dage rangdi, "Anui petaube tei meda. Henai samlia keyi benai tingba da, dede anui cipaude zingde bam dida. Magade anui ting keba kemaktane kwa cai, anuide saja peubi zieda. Ciciucai cu, gwanglu, anui tet pwa hegwangpei kilungme dage paubeu go." 10 Cine penui mie delwe namdi rieki kwa kebamme de qugai. Penui penuide mpau eh, ranggai, "Anui Aramme ramzeuki ga mie, dede cika migede gah, makwa gede siu ma, dede hekündung de keupwa bam nah gada dungde keu pwabam, nah paiki dungde deuli mene bamlie." 11 Pecai rieki kekwamedung samlia keyi de sah gai, nah pecai pelung lebie hegwangpei kilungme dage pau cangbeu. 12 Pecai hegwangpei tingmui cuhlu delwe pe kilamedung dade rangdi, "Cu Ih nnui dage Arammedung anui dage dai teigai bi ranglia zie. Anui mzeu bam kecu penui cibam, cine penui ramzeuki pütdi delwe luhdung ga penuikatei mbai bam dida. Penui rang kecu, ‘Penui namdi gade mpet sangne, anui penuide ring eh tuilu zie delwe penuide namdi ga lüt luzie.’" 13 Hegwangpei kilame hangge sam keli eh rangdi, "Ih nda kiela, mipei kangge depeu hekwen mengei namdi ga bang bamkecu dungde keulu. Penui au Israelme nalung dung bang kebam nzwada, kekiee lebie tsai dida, nah aidungde anui pie kera langgai go." 14 Cine penui bagi kena nah hekwen de si delwe keulu, delwe hegwangpei penuide Aramme reugwame cai langgai eh penui ranggai, "Mie delwe pielo." 15 Penui Jordan ga penui cai mie, nah lampuidung ga Aramme kelwa delwe pak kecune penui paidung nah reunetdung zang pui pwa bam. Cine samgwamedung cailigwang delwe hegwangpei dage pau liabeu.

16 Iciuge minadung Aramme ramzeuki ga mie eh kecunglu. RAMPAUBE sam rang kecu nzwa delwe tokkui keyibe mdet ge shekel ket le nah barley mdet kena, shekel ket le zwa kecu teidi. 17 Hegwangpei kedibe ba pa ngngei kebambe de peu Herieki kekwabe tei kera sam kaigai, ge minadung herieki lampui gade pecu cai ngkaudi. Tinggwang minabe hegwangpei da gwang eh rang kegai nzwa pa tsaidi. 18 Cine cide Tinggwang minabe hegwangpei dage rang kebeu nzwa, ranggai, "Cipau tingdau Samaria rieki ga pemdet kena barley, shekel ket le ngau lu zie nah shekel ket le tangku tok pemdet ge, de kecu nzwa teicang gwanglu." 19 Cipau kedihbe Tinggwang mina sam keli eh rangdi, "Pielo, RAMPAUBE ne tinggim ga hebakidung tei gai lie de, ma aidungde tei lubui ni?" Elisha rang dai eh cu, "Pie lulo, n miak dwa gade tei gwang kecu nang ngau zie, dede nang cidung de kette tyei lak." 20 Cinzwa gapte peda tei cang di delie, kedanemene rieki gade minadung ne pecu nia di eh, pa tsaidi.