1 Remaliah napei Pekah hegwang teikelu mmi kereiehena bekum, Jotham napei Ahaz Judah gwangpei, hegwang tei mdeulu. 2 Ahaz mmi ngkai dige, pa hegwang teilu nah pa Jerusalem ga mmi kereieherok hegwang tei. Pa pe pau David teikelu nzwa ma, dede pe Tinggwang RAMPAUBE miakdwa gade kemau teidi. 3 Meliene, pa Israel gwangpeidung lampui ga tetdi; heleuh keda tei kela kemneu batadung de reli eh pa pe napei de keru ratak tei gaibeu, RAMPAUBE Israelme dwa gade gwagi kedime nzwa. 4 Pa ratak teigai nah nlumkemak reca nidung gage kehengui rugai, hangdeutudung reuga, nah tsingbang kendiak kangdung leune ga. 5 Pecai Aram gwangpei Rezin nah Remaliah napei Pekah, Israel gwangpei, Jerusalem gwaketang kera hanglu. Penui Ahaz de tuilu, dede penui pecu ngamlu tadi. 6 Cipau tingdau, Aram gwangpei Rezin Aram ziemne Elath kezeu pwa daidi nah Judahme de Elath gade gwa mpetdi. Pecai Aramme Elath da gwang, cu kecangde penui lungh bamreu. 7 Cine Ahaz Assyria gwangpei Tiglath-Pileser dage samgwame de langgai eh ranggai, "Ih au n kilabe nah n na. Gwang eh gwaketang kebam Aram gwangpei ba gade nah Israel gwangpei ba gade keli beulo." 8 Cine Ahaz rangkanggeu nah kecak RAMPAUBE ki gade ngau keludung de nah hegwangki mabamdung ga kebam de keulu delwe pa Assyria gwangpei de mtamapeu lang gaibeu. 9 Pecai Assyria gwangpei pe sam kingnei lu, nah Assyria gwangpei Damascus de ngngwa regi hang tuilu, delwe minadung de hebaang tui lwe Kir ga ngngwa miedi. Pa Aram gwangpei Rezin dede teitsetdi. 10 Hegwangpei Ahaz Assyria gwangpei Tiglath-Pileser de Damascus ga mie redau. Pa Damascus ga recabam ngaulu. Pa cingkupei Uriah de recabam rehi cide kesiakke langgai. 11 Cine cingkupei Uriah Hegwangpei Ahaz riem kegai de nzwa recabam teilu, Damascus gade lang kegaide kesiakke. Hegwangpei Ahaz Damascus gade cailigwang kemak dwa pa teicang lu. 12 Hegwangpei Damascus gade luge, pa recabam ngaulu eh recabam ga gwanglwe ratak teigai. 13 Pa keru recadung nah mei recadung nah zau reca ruigai nah recabam gage pe kekangbau recadung jai kezingai. 14 RAMPAUBE dwa ga kebam hetageu recabam, pa kerecaki dwa gade teugwang, pe recabam nah RAMPAUBE kerecaki kakga nah cide pe recabam tingpeule ge kailu. 15 Pecai Hegwangpei Ahaz cingkupei Uriah de aja kai eh ranggai, "Recabam kedi gage tingcang keru reca nah tinghegi mei reca teigailu, nah hegwangpei keru ratak nah pe mei reca tei gailu, nah mina pelane deu keru ratak nah penui gu mei reca nah penui zau recadung tei gailu. Cikage keru ratak jai pelane rui gailu, nah ratak jai pelane de. Dede hetageu recabam de a ziemne kai zeu luzie." 16 Hegwangpei Ahaz ajah kai kebeu de nzwa cingkupei Uriah teilu. 17 Pecai Hegwangpei Ahaz kehekieng pakdung nah duikwakdung keugwang keumie lu kela bamdung reu gade keu mpetdi; pa jaaidi de hetageu tumseu le ketei pekang ga kebam reu gade pwa ngkei tangtsu tsubam reu gage kaidi. 18 Assyria gwangpei ziemne RAMPAUBE kerecaki hegwale hegwangpei nlüt de si eh, penui kerecaki tei kelu de pa Sabbath ziemne lampui tet kahgwang kecu de keu mpetdi. 19 Ahaz tei kegai kedadung nah pa tei kedi leune, cidungde Judah gwangpeidung hakwak gage raupwala. 20 Ahaz pe paume de nzwa tsaidi nah pe paumedung de ngngwa David namdi gage kungdi. Pe napei Hezekiah pebam leu eh hegwang teidi.