1 Iciu eh RAMPAUBE Elijah de tingkai gade tinggim ngngwa nghangdi kera dau, Elijah Elisha de ngngwa Gilgal gade tetdi. 2 Elijah Elisha dage rangdi, "Kehereide, aika bamlu, kedanemene RAMPAUBE acu Bethel gage langgai." Elisha keli eh, "RAMPAUBE ring kebam nzwa, nah nang lung kebam tane, Ih ncu püt dilak." Cine penai Bethel ga miedi. 3 Caihakecime maa ge Bethel ga kebamme Elisha da gwang eh pe dage rangdi, "Nang RAMPAUBE n dade n mpaube de henai ngngwa tetti kera de cibam mi?" Elisha keli eh, "Yeo, Ih cibam, dede cide ha rang so." 4 Elijah pe dage rangdi, "Elisha, Kehereide, aika kwalu, kedanemene RAMPAUBE acu Jericho gage lang kegai ne." Pecai Elisha keli eh, "RAMPAUBE ring kebam nzwa, nah nang lungh kebam tane, Ih ncu püt dilak." Cine penai Jericho ga miedi. 5 Pecai Jericho ga kebam caihakecime maa Elisha da gwang eh pe dage rangdi, "Nang RAMPAUBE n dade n mpaube de henai ngngwa tetti kera de cibam mi?" Elisha keli eh, "Yeo, Ih cibam, dede cide ha rang so." 6 Ge Elijah pe dage rangdi, "Kehereide, aika bam lulo, kedanemene RAMPAUBE acu Jordan gage langgai au lu." Elisha keligai, "RAMPAUBE ring kela zi gade, nah nang ring kebam zi gade, Ih ncu püt dilak lie rang gaila." Cine penai tetgai. 7 Pecai, kemdei gega caihakecime maa hang riakngei ge penai Jordan ga sap kebam gade penaide mcwalu eh bam. 8 Elijah pe pai pwalu, hedui nghang lu, nah cide le hedui gage dap gai. Kereuki kenana lam mzi tsamlu ciu eh penai hangnana hangdeu kecangh ga tet ludi. 9 Cinzwa eh, penai kahpet lu caine, Elijah Elisha dage rangdi, "N dade acu ngngwa tet kedi dwa acu peu n ziemne dai tei neu labi adage ranggai lo." Elisha keli eh, "Kehereide a da n kengkieng kena kieege peu gwanglo." 10 Elijah keli eh, "Nang kie kegai de au tei paa kera ge. Dede, acu n dade ngngwa tet kecudau nang acu ngau cai, aide n da tei beuzie, dede acu ngau mecai, aide tei beulak." 11 Penai tet eh resiu kebam dau, ainie, miheu bagi ge nah miheu kwen ge ngau di, cide ne hangge ge dade penai hangna de teu ntsamdi, nah Elijah tingkai gade tinggim ga nghangdi. 12 Elisha cide ngaulu delwe sahbak eh cu, "A pei, A pei, Israel bagidung nah penui hekwen keteube!"

Pa Elijah de ngau si tadi, nah pa peniadung kerak lu nah cidung hiet kena teidi. 13 Pa Elijah pai pe dade cak mie kecude pwalu, delwe cailigwang Jordan reukung ga saplu. 14 Pa Elijah pai cak mie kecude pwa dui gage dap nah rangdi, "Daiga RAMPAUBE, Elijah Tinggwang lano?" Pa dui dap kegaidau, cide kenana lam mzi tsamlu nah Elisha kah petdi.

15 Jericho gade kegwang caihakecime maa penui kemdei gade pecu ngau keludau, penui rangdi, "Elijah rabe Elisha da bam dida!" Cine penui pecu redau kera gwanglu, delwe penui pe dwaga hangdeu ga keumielu. 16 Penui pe dage rangdi, "Cu pielo, nnui kilame kakga mipei kengkieng hang riakngei bam. Anui kie, penuide peu mie eh n mpaube de RAMPAUBE Rabe pecu ngngwa nghanglu eh pecu lamlwatu kesa gage mede kesa langkam gega kelien gai pwabam memi peu pielo." Elisha keli eh, "Lak, penuide langgai so." 17 Dede penui keibi kedine Elisha laklie dau lakdi, pa rangdi, "Penuide lang gailu." Pecai penui mina hang riakngei de langgai, nah penui langcum ne peei, dede pecu ngau luma. 18 Pa Jericho ga kebam dau, penui Elisha da cailigwang, nah pa penui da rangdi, "Ih nnui da rang meni, ‘Mie helo’?"

19 Namdi be ga mina Elisha dage rangdi, "Pielo, anui n da kiela, a mpaube ngau kebam nzwa, aipau namdi be peting be au yi bam, dede dui au sia nah hangdeu ga ma lungyi ma." 20 Elisha keli eh, "Hekwak keheci gage mcai kailwe cide a da pwa gwang beulo," cine penui cide pe da keu gwangbeu. 21 Elisha dui rwak ga mie nah mcai de dui gage kelien gaidi; pecai pa rangdi, "RAMPAUBE aide rangla, ‘Ih dui aide tei mci dida. Cu ting gade, ketsai mede hangdeu yi kemak bam si lakta.’" 22 Cine cipau cai benai dui cide mci ladi, Elisha sam rang kebeu de nzwa eh.

23 Pecai Elisha cikade Bethel ga nghangdi. Pa lampuiki gade nghang keladau, hename ge namdi be gade mpet eh pecu henui tei; penui pe dage rangdi, "Nghang cu, nang peukwakbo! Nghang cu, nang peukwakbo!" 24 Elisha pecai nreu gwang pie eh penuide ngau; pa RAMPAUBE de penuide reset kera qugai. Ge hegumpui kena hegung gade mpet eh mipeina hang riakdai kena de rejamdi. 25 Pecai Elisha cikade Carmel Deutu gage tet gaidi, nah cikade pa Samaria ga cailigwangdi.