1 Jehoiakim hegwang ketei tingdau, Babylon gwangpei Nebuchadnezzar Judah de gwaketang lüt; Jehoiakim pe kila tei mmi kecum ziemne. Pecai Jehoiakim nreulu nah Nebuchadnezzar de renia di. 2 RAMPAUBE Jehoiakim de renia eh langgai Chaldeanme, Aramme, Moabme, nah Ammonme maadung de; Pa Judah de renia eh ngkapdi kerane penuide langgai. Aide RAMPAUBE sam pe kilame caihakecime dade teigai zielie rang kebeude nzwa eh. 3 RAMPAUBE ne rangkebeu gade aide Judah ga gwang zeuda, pe dwa gade penuide keugidi kerane, Manasseh maudung ziemne, pa tei kedidung leune ziemne,* 4 nah pa maukemakme jai teilwa kedine de, kedanemene pa maukemakme jai le Jerusalem teipui di. RAMPAUBE cipau maude gibeuneu tadi. 5 Jehoiakim ha kedadung, nah pa tei kegai leune, cidungde Judah gwangpeidung ha kwak gage rau pwabam meni? 6 Jehoiakim tsai dige, pe napei Jehoiachin ne pebam leu eh hegwang teilu. 7 Egypt gwangpei pe deu gwale pet eh gwaketang si tadi, kedanemene Babylon gwangpei ne Egypt gwangpei kangga kebam deudung pelane kezeu pwadi kecune, Egypt reuceuna gade Euphrates Reuki ga kecang.

8 Jehoiachin hegwang tei keludau pa mmi kereieheset di; pa Jerusalem ga keicum hegwangtei. Pe pui zi cai Nehushta; pa becai Jerusalemme Elnathan napui. 9 Pa RAMPAUBE dwade dai maubi kecube teidi; pe pei teikedi leune pa teidi.

10 Cipau tingdau Babylon gwangpei Nebuchadnezzar reugwame Jerusalem de gwaketang nah namdi de twagwalu. 11 Pe reugwame twagwa kebamdau Babylon gwangpei Nebuchadnezzar namdi ga lüt, 12 nah Judah gwangpei Jehoiachin, pa, pe pui, pe kilame, pe hegwangki ga kedime, nah pe kangga kedimedung de ngngwa Babylon gwangpei kangga nlütdi. Babylon gwangpei pa hegwang teikelu mmi heset bekum pecu tuilu. 13 Nebuchadnezzar RAMPAUBE kerecaki ga maniadung pemi kehung pelane cikade keumpet lu, nah hegwangki ga kebam dungde de. Israel gwangpei Solomon ne kerecaki ga kecak niadung tei kegaide pa dang kecaidi, RAMPAUBE mrai rangpwa kela nzwa eh. 14 Pa Jerusalem pelane, muiteume pelane, nah reugwame pelane, hebaangme cangkerei, nah bata tei kecime pelane nah hegeu kerekime de langgi di. Migede de püt nzeu dima hangdeube ga ma gahtume de gwale. 15 Nebuchadnezzar Jehoiachin de Babylon gage langgidi, hegwangpei pui, pe naudung, kedime, nah hangdeu reu kedimedung desi eh. Pa penuide Jerusalem gade Babylon gage langgi di. 16 Reugwame pelane, cang hena ge, nah bata tei kecime cangge, nah hegeu kerekime, penui pelane regi lu kebuime, Babylon gwangpei mipei aidungde de ngngwa gwang Babylon gage langgi di. 17 Babylon gwangpei, Jehoiachin pei sinabe Mattaniah de peu pebam leu eh hegwang teilu, nah pezi msiak lipwa Zedekiah teidi.

18 Zedekiah hegwang tei keludau pa mmi ngkaieket di; pa Jerusalem ga mmi kereieket hegwangtei. Pe pui zi cai Hamutal; pa cai Libnah gade kegwang Jeremiah napui. 19 Pa RAMPAUBE dwade dai maubi kecube tei; Jehoiakim teigwang kedi leune pa teidi. 20 RAMPAUBE rata gade, ma aidung leune teikedi tei Jerusalem nah Judah ga, pa penuide pedwa gade langgi di kemaktane. Pecai Zedekiah Babylon gwangpei de renia di.