1 Cu Israel gwangpei Elah napei Hoshea hegwang teikelu mmi kecum bekum, Judah gwangpei Ahaz napei Hezekiah hegwang tei cuhdi. 2 Pa mmi ngkaiemengei dige pa hegwang teilu, pa Jerusalem ga mmi ngkaiehekui hegwang tei. Pepui zi cai Abijah, pa au Zechariah napui. 3 Pa RAMPAUBE miakdwa gade petaube teilu, pe pau David tei kegai puisau mzuilu. 4 Pa nlumkemakme reca nidung keu gidi, tsusumdung tei pangdi, nah Asherah miedung bi ngkaudi. Pa Moses ne hetageu le henei teikelu, Nehushtan lie qu kela de teipang takcaidi, kedanemene Israelme cipau tingdau cide de kehengui rugai kelane. 5 Hezekiah RAMPAUBE Israel Tinggwang de nlumlu, cine pecai Judah hegwangmedung kakga, mede pedwale hegwang tei gwang kedidung kakgade migede pa kenzwa gah. 6 Kedanemene pa RAMPAUBE dade masanglu. Pa pecai sui mtak dima, dede RAMPAUBE ne Moses dage aja kai kebeu zaidung mzailu. 7 Cine RAMPAUBE Hezekiah de ngngwala, nah keheiga pa miede pa ngkienglu. Pa Assyria gwangpei de reniadi nah pekang nlüt ma. 8 Pa Philistin gade Gaza nah pe deurai kecang, nah reketbam gade riekelu namdi kecang gwaketang.

9 Hezekiah hegwang tei kelu mmi mdai bekum de, cide Elah napei Hoshea Israel gwangpei hegwang tei kelu mmi hena bekum, Assyria gwangpei Shalmaneser Samaria de gwalüt eh cide twagwalu. 10 Mmi kecum kekamle dau penui cide gwalu, cide Hezekiah hegwang teikelu mmi herok bekum, nah Israel gwangpei Hoshea hegwang teikelu mmi hekui bekum; ainzwa eh Samaria tuilu. 11 Cine Assyria gwangpei Israel de nimteu Assyria ga gwangdi, delwe penuide Halah, nah Gozan ga Habor Reuki gage, nah Medes namdidung gage kaidi. 12 Pa aide tei gai, kedanemene penui RAMPAUBE penui Tinggwang zai mnei ta kedine, dede penui RAMPAUBE kilabe Moses ne kepeu ajadung nah samkakkelu zaidung de gikah kedine. Penui kingnei ma nah tei raudi.

13 Pecai Hegwangpei Hezekiah hegwang tei kelu mmi kereiemdai bekum, Assyria gwangpei Sennacherib, Judah ga riekelu namdi pelane de gwalüt eh cidungde gumlu. 14 Cine Judah gwangpei Hezekiah Lachish ga kebam Assyria gwangpei dage sam langgai eh, ranggai, "Ih nda ge tei mau dida. A dade caili lu. Nang keheibe acu mpüt gai kebeube Ih pung luzie." Assyria gwangpei Judah gwangpei Hezekiah dage rangkang geu talent haicum nah kecak talent camrei peulo kiegai. 15 Cine Hezekiah pecu RAMPAUBE ki nah hegwangki mabam ga kebam rangkang geu pelane peudi. 16 Ge Hezekiah RAMPAUBE kerecaki kikamdung gade, nah pa kikamtsiadung gade kemaipwa kebam kecak de tei mpetlu delwe Assyria gwangpei kecak peudi.

17 Dede Assyria gwangpei pe reugwa kekie ge de ngngwa hekwalu, Tartan nah Rabsaris nah reugwamuibe kedibe de si eh Lachish gade Jerusalem gwangpei Hezekiah da langgai. Penui beuh lampuidung tet gwang nah Jerusalem hegwale ga gwang canglu. Penui rejaai nreube gade reuna duilwa kebam paiketame luh lampui taiga gwang saplu. 18 Penui Hezekiah gwangpei de qu kegai dau, Hilkiah napei Eliakim, hegwangki pie kerengeibe, nah keraube Shebna, nah Asaph napei Joah kerauta dung kerengeibe, penuide redau kera tetpetlu.

19 Cine reugwamuibe ditube penui dage sam aide Hezekiah dage ranggai beulo beu, Hegwang kedibe, Assyria gwangpei ainzwa rangzeu: "Daiziemne nang n mlung dilau eh bamno? 20 Nang kemta samdung rünne rangla, ncu ngha kerame nah hereu tei kera kengkieng bamlie rangkebam. Nang caude nlum bamno, nang acu ngngwa renia kera? 21 Ainie, nang Egypt hekuubangle teu hetuitie teikelu aide de nlum bam, dede mige cika ngngei gai eh pang dicai, peba kam dizie. Cide nzwa Egypt gwangpei Pharaoh au pecu nlum kela keheibe dage tei gaila. 22 Dede nang adage, ‘Anui RAMPAUBE anui Tinggwang de nlum bam,’ de eh rang lubui; dede Hezekiah nlumkemak reca nidung nah recabamdung tei msaidi meni nah pa Judah dage nah Jerusalem dage, ‘Nnui Jerusalem ga aipau recabam dwa gade recalu maisia’ de eh rang meni? 23 Ciziemne cu Ih, ncu peu litak keyi ge a mpaube Assyria gwangpei de ngngwa tei neu bam. Ih ncu hekwen cangna peu zie, magade nang cidungde teu kerame ngau lubui cai. 24 Dainzwa nang kedibe a mpaube kilame de mneitube dede canglu lai? Nang Egyptme bagidung nah hekwen keteume dage n kenlum kai dida! 25 Ih heni aide de regi nah ngkapti kera RAMPAUBE si mene aika mbeuh hang lie bam ni? RAMPAUBE adage rangbeu, ‘Hangdeu aide gwaketanglu nah ngkapdi lo.’"

26 Pecai Hilkiah napei Eliakim, nah Shebnah, nah Joah reugwamuibe ditube dage rangdi, kehereide n kilame dade Aramaic let gade rang lulo, kedanemene anui cide cibam. Anuide Judahme let gade rang so kirie reuga kebamme kingnei bamlu. 27 Dede reugwamui ditube penui dage rangdi, "A mpaube acu nnui mpaube nah nnui dage sam aidungde rang kera langgai ni? Pa acu kirie reuga bam kebamme ziemne de si eh langgai me ni, penuide penuikatei penui teu tyei zie nah penuikatei penui zung sak zie nnui de ngngwalwe?" 28 Pecai reugwamui ditube cu saplwe sahbak eh Jewme let gade ranggai, hegwang kedibe Assyria gwangpei sam kingnei lulo. 29 Hegwangpei rangzeu, ‘Peu Hezekiah de nnuide cwa diso, kedanemene pa nnuide a kengkieng gade keli gai laklu. 30 Hezekiah sam ziemne nnui RAMPAUBE de nlum so, pa, "RAMPAUBE anuide kelibeu bi zie, nah namdi aide Assyria gwangpei ba gage kai dilak,"’ de eh kerang ziemne. 31 Hezekiah kwa kingnei so, kedanemene Assyria gwangpei ainzwa rangzeu: ‘Acu ngngwa kezuyi lu, nah ada gwanglu. Iciu lucai nnui pelane de pekatei pe kubetsibang gade tyei zie, nah pekatei pe tangzüttsibang gade, nah pekatei pe tekwa gade dui sakzie. 32 Ih gwang eh nnuide hangdeu ge nnui katei nnui deu kenzwa ge ga ngngwa tet gai kemaktane nnui aide teibam zie. Cipau deude au, ketyei kesak nah zau keheci, tangku nah kubetsi kebam deu ge, olive bangdung nah heliadui kebam deu ge. Iciu eh nnui ring luzie nah tsai dilak.’ "Hezekiah nnuide kemeu kera tei eh ‘RAMPAUBE ne anuide kelibeu zie’ de eh kerang dau pekwa kingnei so. 33 Heleuh keda rabedung gede penuide Assyria gwangpei ba gade kelilu dini? 34 Hamath nah Arpad rabedung dai ga lano? Sepharvaim, hena, nah Ivvah rabedung daiga lano? Penui a ba gade Samaria kelilu dini? 35 Heleuhdung rabedung pelane kakde, rabe kette pe deu a kengkieng kang gade kelilu kera bam ni? Dainzwa RAMPAUBE Jerusalem kelibeu zie no a kengkieng kang gade?"

36 Dede minadung zingde di nah sam gede keli tadi, kedanemene Hegwangpei aja kai gaibeu, "Pesam keli so," de eh. 37 Pecai Hilkiah napei Eliakim, hegwangki pie kerengeibe, keraube Shebna, nah Asaph napei Joah kerau tadung kerengeibe, penui paini hiet ti eh Hezekiah da gwang nah pe dage reugwamui ditube samdung de pau liabeu.