1 RAMPAUBE Moses dage rangdi, "Pharaoh da gwang culo, kedanemene Ih pe mlung nah pe kilamedung mlung teitak dida. Ih aide tei kegai au a kengking gade miswakegah marehidung penui kakga keulia lu kerane. 2 Ih de aide tei gai ciude Ih tei kegaidung, Ih dainzwa delwe Egyptme de teikeherei süt gaibi, nah Ih dai kenzwa a kengking teu marehidung ketsamtsam penui kakgage tei gaibi nnuide peu nnui namedung nah tsamedung dage ranglia lu kerane. Ainzwa eh nnui Ih RAMPAUBE lie kecu ci luzie." 3 Cine Moses penai Aaron Pharaoh da mie delwe pe dage rangdi, "RAMPAUBE, Hebrewme Tinggwang, aide rangla: ‘Daitiege nang a dwaga nkatei ncu tei henah rau eh lano? Peu a minadung de tet lulo iciude penui acu reca lu kerane. 4 Dede magade nang a minadung de peu tet rau dicai, kingnei lulo, ncünne Ih n deu gage tangrim teugwang gaizie. 5 Penui hangdeu reu gumpui pwa dizie ciude migede kideu ngaukemak tei dizie. Penui tangheu ne tei nsia di kemak bang keludung tyei zie. Penui nnui ziemne luhdung ga tsingbang lungcuh kebeu ketket kecu tyei teu dizie. 6 Penui n kilung, nah n kilame kidung, nah Egyptme ki lie kela pelane ga pui dizie, ma aide n pei de mede n pau de madau de ngaukemak ge, penui kideu ga gwang kelu gade henai tingba kecang de magede ngaula kemak ge zie.’" Pecai Moses nreu delwe Pharaoh dade tet mpetdi. 7 Pharaoh kilamedung pe dage rangdi, "Daitie ge mipei aide anuide tei hebwak la zieno? Israelme de tet kera peu dilo iciude penui RAMPAUBE penui Tinggwang de reca lu kerane. Egypt ngkap di delie kecu nang cilu mereu ni?" 8 Moses penai Aaron de Pharaoh dage ngngwa gwang dailu, pa penai dage rangdi, "Mie eh RAMPAUBE nnui Tinggwang de reca lu culo. Dede dai kenzwa medung ne tet lai?" 9 Moses rangdi, "Henamedung nah kecingmedung, napeimedung nah napuimedung de anui ngngwa eh mie zie. Anui kaunedung nah kauruine haudung de ngngwa tet zie, kedanemene anui RAMPAUBE ziemne hengyi maisia." 10 Pharaoh penai dage rangdi, "Peu RAMPAUBE de nnui da la kesang kelube tei lulo, magade Ih nnuide peu tet nah nnui namedung de tet kera peu liecai. Pielo, nnui lungga makesiadung ge la. 11 Lak! Nnui kakgade midung ge mie lulo, nah RAMPAUBE de reca lulo, kedanemene nnui cide teineu la kecune." Ge pharaoh dwa gade Moses penai Aaron de gwa mpet di. 12 Pecai RAMPAUBE Moses dage rangdi, "Egyptme deu reu gage n ba hwapet lo tangrim pet kerane, iciu eh penui gwang Egyptme deu de gwaketang eh tangheu ne teimsia kebangbe ceheidung kebam pelane tyeilu kerane." 13 Moses pe tui keulwe Egyptme deu reu gage hwagai, nah RAMPAUBE naimiak kepetle tingkai teugwang hangdeu reu ge tingmui tingba pelane guigai. Tingcang gwangzeu ge, naimiak kepetle tingkai ne tangrimdung teugwangbeu. 14 Tangrimdung Egyptme deu pelane ga gwangdi nah hangdeu pelane gum teudi. Gwang kedile tingdung de madaude hangdeu ga tangrim hau kieepwa ai kenzwa teima nah gwangsi kera de ai kenzwa teisi lak. 15 Penui hangdeu peureu pelane gumpui pwadi ciu eh muidi. Penui hangdeu ga cehei nei pelane nah tsingbang ga matsi pelane tangheu ne teimsia kebangbe tyeilu. Egyptme deu pelane ga, ring kebam cehei kemdiak, mede tsingbang gede, mede cehei nei luhdung ga kette bamsi tadi. 16 Pecai Pharaoh Moses penai Aaron de zette qugai nah penai gwang luge, pa penai dage rang, "Ih RAMPAUBE nnui Tinggwang dage nah nnui dage kemau tei dida. 17 Cu cine, henai pia a mau gibeulo, nah RAMPAUBE nnui Tinggwang dage kekie teibeu, iciu eh pa ketsai aide a dade keu tetti kerane." 18 Cine Moses Pharaoh dade tet mpet lwe RAMPAUBE dage kekie tei. 19 RAMPAUBE kenlütle tingkai cisüt kecu ge teugwang tangrimdung keucu lwe Kegie Jaadi gage penuide gwagwang gaidi; Egyptme rai lungga tangrim kette bamsi tadi. 20 Dede RAMPAUBE Pharaoh mlung teitakdi, nah Pharaoh Israelme de peu tet tadi.

21 Pecai RAMPAUBE Moses dage rangdi, "N ba ting lege hwa gailo, iciude Egyptme deu reu ga kemui bamdi kerane, kemui cilu kera ge." 22 Moses pe ba le ting lege hwagai, nah langcumne Egyptme deu pelane ga tingmuiting di. 23 Migede keheibe de de kerengau tadi; migede langcumne penui ki püt mene bamdi. Iciuliede, Israelme penui lungh kebam ni ga pelane kebaa bamdi. 24 Pharaoh Moses de qu teugwang delwe rangdi, "Mie eh RAMPAUBE de reca culo. Nnui kilungmedung de de nnui ngngwalwe mie lubui, dede nnui kaunedung nah kauruine haudung de au peu bamlu maisia." 25 Dede Moses rangdi, "Nang anuide makaunedung peu maisia ratakdung nah keru recadung ziemne, iciude anui cidungde RAMPAUBE anui Tinggwang dage ratak teilu kerane. 26 Anui hekaunedung anuide ngngwa tet maisia; penui nginglwak nage de kainzeu di gailak, kedanemene anui penuide keupwa RAMPAUBE anui Tinggwang de reca lu maisia. Kedanemene anui dai dele pwane anui RAMPAUBE de reca ziebi anui cika gwangcang kemaktane ci gailak." 27 Dede RAMPAUBE Pharaoh mlung tei takdi, nah pa penuide peu tet raudi. 28 Pharaoh Moses dage rangdi, "A dade tetdi lulo! Ma kiege gade mriak la lulo, cide nang acu ngau dai tadi lu. Kedanemene nang a zu kengau benai, nang tsai zie." 29 Moses rangdi, "Nang petau. Ih n zu ngau dai lakta."