1 Pecai RAMPAUBE Moses dage rangdi, "Pharaoh da mie delwe pe dage rang beulo, ‘RAMPAUBE, Hebrewme Tinggwang aide rangla: "Peu a minadung de tetlu iciude penui acu reca lu kerane." 2 Dede nang penuide peu tet rau dicai, penuide nang kam nzeudi cai, 3 RAMPAUBE ba n luhdung ga hetumdung, nah hekwendung, gadadung, utdung, meuründung, nah hemeudung dage kaigai eh cidungde da mateei kehung gwang dizie. 4 RAMPAUBE Israelme kauruine nah Egyptme kauruine de pie ntsamceu dizie nah Israelme gu makaune kette tsaidi lak. 5 RAMPAUBE peting riet luda; pa rang eh, "Ncünne Ih hangdeu aide gage ma aide teigai zie da."’" 6 Pecai benai RAMPAUBE aide teigai: Egypt ga hetumdung pelane tsaidi, dede Israelme kaunedung au kette tsaidi ma. 7 Pharaoh aide keteuling de gwang, nah ainie, Israelme kaune kette tsaidi ma. Dede pa pelung hungdi, cine pa minadung de tet kera peu ma.

8 Pecai RAMPAUBE Moses penai Aaron dage rangdi, "Mimang ge gade mimangbüt bazum kepuih ge keulu. Nang, Moses, mimangbüt cide Pharaoh pie kebam dau tingkai gage kelien nghang gai maisia. 9 Cidungde Egyptme deu pelane reu ga rebui mmi gwang dizie. Cidungde Egyptme deu pelane reu ga minadung nah makaunedung dage kesupzamdung nah reteeidung pet kera teigai zie." 10 Cine Moses penai Aaron mimang ge gade mimangbüt keulu eh Pharaoh dwaga saplu. Iciu eh Moses mimangbüt tingkai gage mrwakgai. Mimangbüt cide ne kesupzamdung nah reteeidung minadung da nah makaunedung da de pwak petti. 11 Kerekame Moses dwaga gwang gailakdi kesupzamdung de ziemne, kedanemene kesupzam penui reu ga nah keda Egyptme pelane da pet kedine. 12 RAMPAUBE Pharaoh mlung tei takdi, cine Pharaoh Moses penai Aaron sam kingnei ma. RAMPAUBE Moses dage Pharaoh ainzwa di kera rang kebeu nzwa.✝

13 Pecai RAMPAUBE Moses dage rangdi, "Ncünne tingcang nuge cuhlu, Pharaoh dwaga saplu nah pe dage rangbeulu, ‘RAMPAUBE, Hebrewme Tinggwang aide rangla: "Peu a minadungde tetlu iciude penui acu reca lu kerane. 14 Kedanemene, henai pia au, Ih mateeidung pelane n dage de, n kilamedung, nah n minadung dage langgai zie da. Ih aide teigai zie iciude kideu pelane ga Ih kenzwa gah lie kecu nang cilu kerane. 15 Ih cu gade a ba hwa cuhlu eh ncu nah n minadungde mateei lepwa teikeherei lubui, nah ncu hangdeu gade tei nggah zingdi eh bamdi kerabe dida. 16 Dede makie aide ziemne Ih ncu ringbam kera peu: Ih a kengking ncu pwalia kerane, iciude a zi kideu pelane ga rang mdu lalu kerane.✝ 17 Nang cude nkatei ncu teucuh pwa a minadungde ncau bam reu penuide tet kera peu mene. 18 Kingneilu! Ncünne aipau tingdau Ih tangheu cisüt kecuge kei gaizie, cide madaude ngau kemak ge Egypt ndeu kelu gade henai kecang de. 19 Cine cu, minadungde langpwa n tumdung nah luh ga kebam leune teu hekwapwa heni kengngi kegah gage kailu. Mina nah makaune keheibe de kilung ga ngngwa gwang mene luh ga kela leune, tangheu penui reu gage kei gai zie, nah penui tsai dizie."’" 20 Ge Pharaoh kilamedung caudung ge RAMPAUBE sam nlumlu dibi, penui kelwa delwe penui gu kilamedung nah hekaunedung de kilung ga ngngwa gwang kera teidi. 21 Dede mina kangge RAMPAUBE sam de malie mene penui kilame nah kauruine de luh gage kainzeu di.

22 Cidau RAMPAUBE Moses dage rangdi, "Tinggim lebie ge n ba hwagai lo iciude Egyptme deu pelane ga tangheu cakmie zie, mina reu ga, makaunedung reu ga, nah luh ga gitseheibwa pelane reu ga Egyptme deu pelane reu ga." 23 Pecai Moses pe tuitie tinggim lebie ge hwagai, nah RAMPAUBE tingkeceu, tangheu, nah tingkehepiak langpwa hangdeu gage kaigai. Pa Egypt deu gage tangheu ruimie gai. 24 Cine cika tangheu nah tingkehepiak tangheu de ncüt, delwe cisüt eh rui, Egyptme deu pelane ga madau de ci kenzwa tei ma reu deudi ndeu kelu benai gade de.* 25 Egyptme deu pelane ga, tangheu kei pwa luh ga maleune reuga kei gai, mina nah makaunedung reu gage. Luh ga gitseheibwa pelane reuga keigai nah tsingbang leune tsumdi. 26 Israelme lunghkebam Goshen deuceu ga rünne, cika tangheu kei ma.

27 Pecai Pharaoh Moses penai Aaron de qu kera mina de langgai. Pa penai dage rangdi, "Ih kemau tei dida henaipia. RAMPAUBE au masang, Ih nah a minadung au kesiame. 28 RAMPAUBE dage kekie tei beulo, kedanemene tingkeceudung nah tangheudung ci hambegu kedine. Ih nnuide peu tet zie da, nah nnui aika bam tie si lakta." 29 Moses pe dage ranggai, "Ih namdi aide tetka herizi, Ih RAMPAUBE dage a ba ketwa gaizie. Tingkeceu mtak luzie, nah tangheu keisi lakta. Ai kenzwa gade kideube RAMPAUBE gu lie kecu nang cilu zie. 30 Dede nang nah n kilamedung ziemne au, nnui RAMPAUBE Tinggwang de rüt kesang mereu lie kecu Ih cibam." 31 Cu au helangbang nah barley bangdung ngkap dida, kedanemene barley ci bam dida, nah helang pepa pabam kedine. 32 Dede wheat nah spelt de au tei ngkapdi ma, kedanemene cidungde pecai ne meula kecune. 33 Moses Pharaoh de pütti eh namdi gwale pet kedi dau, pa RAMPAUBE dage pe ba hwagai; tingkeceu nah tangheu kei mtakdi, nah tingrui si tadi. 34 Cidau Pharaoh tingrui, tangheu, nah tingkeceu mtak kedi ngaulu ge, pa kemau tei daidi nah pe mlung takdi, pe kilamedung de si eh. 35 Pharaoh mlung takdi, nah cine pa Israelmedung de peu tet ma, RAMPAUBE Moses dage rang kebeu de nzwa.