1 Cidau RAMPAUBE Moses de mpau eh ranggai, 2 "Acu neraibe pelane de keuntsam beulu, Israelme kakga mipeina leune, mina de nah makaunedung liede. Neraibedung au agu."

3 Moses minadung dage rangdi, "Tingbazie aide nsung lalo, Egypt gade nnui mpet kelu tingbazie, kilabaang tei kela ki gade, kedanemene RAMPAUBE kengking ba lepwane heni aikade pa nnuide ngngwa mpetlu. Tangku tsehi kencütpe kette tyei lak. 4 Nnui henai tingbazie Egypt gade mpet zie da, Aviv kei gade. 5 RAMPAUBE nnui paume dage nnuide peu kera pa sampet tei kenzeu Canaanme, Hittitme, Amoritme, Hivitme, nah Jebusitme deu, hangdeu ge tungdui nah heliadui lwa kebambe deu gage nnuide ngngwa gwang luda, aipau kei nnui reca ta aide tei eh mnei lu maisia. 6 Lang henane ziemne nnui tsehi ncüt kemak tangku tyei maisia; lang henane benai RAMPAUBE de herüt kepeu taktyei ge bam zie. 7 Tsehi ncüt kemak tangku lang henane ting pelane tyei maisia; tsehi ncüt kelu tangku kette nnui kakga bam kerabe ma. Nnui deurai lungga kehei gade tsehi kette nnui da bam kerabe ma. 8 Hengyi kecu lang henane benai nnui namedung dage ainzwa rang kerabe, ‘Aide au Ih Egypt gade mpet keludau a ziemne RAMPAUBE dai teigai bi kecu de ziemne da.’ 9 Aide nnuide peu nsung heci dai bam kera ziemne nnui ba ga nah nnui sipie ga bam kerabe zie. Aide RAMPAUBE hezai nnui mui ga bam kerabe, kedanemene heba kengking teu delwe RAMPAUBE ne Egypt gade nnuide ngngwa mpet luda.* 10 Cine nnui aide tingkum ket cai tingkum ket eh riem kelu tingsiakdau hezai aide mneilu maisia.

11 RAMPAUBE nnuide Canaanme deu ga ngngwa gwang keludau, pa nnui dage nah nnui paume dage sampet kelu nzwa, nah pa nnuide hangdeu ncu pwapeu kecudau, 12 nnui mipui ge ne mna kelu neraibe leune RAMPAUBE dage keuntsam maisia. Nnui kaunedung mciu lu raitube peseudung RAMPAUBE gu zie. 13 Nnui gada mciu raitube pelane meurünna le lui dailu maisia. Magade nnui cide lui dai mecai, ciucai nnui pe ngngwang teitsum di maisia. Dede nnui napeimedung kakgade nnui mipeina neraibedung, cidungde nnui lui dailu maisia.* 14 Cidau nnui napei nnui dade, ‘Aide pekie dai no?’ de pecai keteu cai, ciude nnui pecu rang beulu, ‘Cide au Heba kengking gene RAMPAUBE anuide Egypt ga kilabaang ki gade ngngwa mpet beu. 15 Pharaoh mlung tak delwe anuide peu tet mei kedidau, RAMPAUBE Egypt deu ga neraibe pelane de teitset di, mina neraibe de de nah makaune mciu keraibe de de. Aide ziemne Ih RAMPAUBE dage makaune pelane mciu keraibe ratak tei pwapeu la, nah cide ziemne Ih a napeidung dade mciu keraibe lui dai lula.’ 16 Aide nnuide peu nsung heci dai bam kera ziemne nnui ba ga nah nnui sipie ga bam kerabe tei dizie, kedanemene heba cide kengking teu eh RAMPAUBE anuide Egypt gade ngngwa mpetlu."

17 Pharaoh minadung de tet kera kepeu dau, Tinggwang Philistinme deu lampui lege penuide ngngwa gai beuma, cipau deu de kemna ga bam liede. Kedanemene Tinggwang rangdi, "Minadung hereu regi kera dau keludau penui mlung nreulwe Egypt ga cailigwang dai kera penui cet dizie kecune." 18 Cine Tinggwang minadung de twakengwa hetaideu lampui ga Kegie Jaaidi lambie ngngwa gwangdi. Israelme Egyptme deu gade hereu teilu kera reunet teu eh mpet. 19 Moses ne Joseph radung keuteu lu, kedanemene Joseph ne Israelme de peu samkak tei sünne lwe rangdi, "Tinggwang nnuide kelibeu bi zie, nah nnui a rahdung pung tetlu maisia."* 20 Israelme Succoth gade penui beu tei eh tetpwa hetaideu penli Etham gage ramzeuki teilu. 21 RAMPAUBE tingkeba dau hemwa tsia ge tei eh penui lampui sau penui dwaga tet gwang. Tingmui dige mi tsia ge tei eh penuide kebaa peu. Ainzwa eh penui tingna dau de nah tingmui dau de penui beuh teilu. 22 RAMPAUBE minadung dwa gade tingna tingdau gu hemwa tsia mede tingmui tingdau gu mi tsia cide keugi di ma.