1 Tingnaige Moses Midiame cingkube, pe pau Jethro gu kaunehaudung kwa eh la. Moses kaunehaudung de hetaideu kemdeile ngngwa gai di nah Tinggwang lamlwatu, Horeb* ga gwanglu. 2 Cika RAMPAUBE tinggimgwame tsinghum gade miheu ge gade pecu peu ngaugai. Moses piegai, nah ainie, tsinghum be heu bam, dede tsinghum cide heu nggah dima.* 3 Moses rangdi, "Ih nreu npetlu zie nah ma ketsam aide piezie, dai ziemne tsinghum heu nggah dilu mebi."✝ 4 Moses pie zielie nreu mpet kecu RAMPAUBE ngaulu ge, tsinghum gade Tinggwang pecu qu mpet, nah rang, "Moses, Moses." Moses rang, "Ih aika bam lie." 5 Tinggwang rangdi, "Mna si pet talu! N pi gade n picum lwakti lu, kedanemene nang sap kebam ni de au kemci ni ge lu."✝ 6 Pa rang si eh, "Ih n paume Tinggwang, Abraham Tinggwang, Isaac Tinggwang, nah Jacob Tinggwang." Ge Moses pezu kebalu, kedanemene pa Tinggwang de piegai hing kedine. 7 RAMPAUBE rang, "Ih Egypt ga kebam a minadung keherei kebam ngau da. Ih penui mra kwa siu luda, penui heta mpaumedung ziemne, kedanemene Ih penui reidung ci kebamne. 8 Ih penuide Egyptme ba gade kelibeu kera hunglu da nah penuide hangdeu cikade ngngwa mpetlu kera hangdeu keyi gage, hangdeu kedi, tungdui nah heliadui lwa kebambe deu gage; Canaanme, Hittitme, Amorme, Perizzme, Hivitme, nah Jebusitme cuikui gage. 9 Nah cu Israelmedung kesah kwa a da gwang bam dida. Cipaureu de, Egyptme ne teikeherei kebam Ih ngau da. 10 Cine cu, Ih ncu langpwa Egyptme gwangpei Pharaoh dage kai dizie iciu eh nang a minadung, Israelme de, Egypt gade ngngwa mpetlu kerane."✝ 11 Dede Moses Tinggwang dage rang, "Ih cau no, iciu eh Ih ne hegwangpei Pharaoh da mie Egypt gade Israelme de ngngwa mpet kera?" 12 Tinggwang keligai, "Ih ncu ngngwa la zie. Ih ne ncu langgai lie kecu aide marehi ge zie. Nang minadung de Egypt gade ngngwa mpet keludau, lamlwatu aika de nang acu reca zie."✝

13 Moses Tinggwang dage ranggai, "Ih Israelme da mie keludau nah penui dage rang de, ‘Nnui paume Tinggwang ne acu nnui dage langgai lalie,’ nah penui a dage kerang dau, ‘Pe zi cau no?’ Ih penui dage dai rangmai sia zieno?" 14 Tinggwang Moses dage rang, "IH DE IH DA." Tinggwang rang, "Nang Israelme dage rang beulu, ‘Ih LIE kelabe ne acu nnui dage langgai beu la.’" 15 Tinggwang Moses dage de rang, "Nang Israelme dage rang beulu, ‘RAMPAUBE, nnui paume Tinggwang, Abraham Tinggwang, Isaac Tinggwang, nah Jacob Tinggwang, ne acu langpwa nnui dage kaila. Kelungta aide a zi da, nah aide nzwa ceheu leune acu nsung luzie.’* 16 Miecu nah Israel hangkiamedung de qu hekwa lulo. Penui dage rangbeu lo, ‘RAMPAUBE, nnui paume Tinggwang, Abraham Tinggwang, Isaac Tinggwang, nah Jacob Tinggwang, acu peu ngau gai nah rang, "Ih nnui de mcet siakte luda nah Egypt gade nnui dage dai teigai bi Ih ngau luda. 17 Ih nnui Egypt ga keherei kebam gade Canaanme deu gage, Hittitme, Amorme, Perizzme, Hivitme, nah Jebusitme, tungdui nah heliadui lwa kebambe deu, gage ngngwa mpet gai kera a sampet tei luda."’ 18 Penui n kwa kingnei luzie. Nang nah Israel hangkiamedung Egypt ga hegwangpei da mie maisia, nah nang pe dage rang beulu, ‘RAMPAUBE, Hebrewme Tinggwang, anuide redau gaida. Cine cu peu anuide hetaideu ga langcumne beuzie tei eh tet kera peulo, iciu lude anui anui Tinggwang, RAMPAUBE dage ratak teigai lu kerane.’ 19 Dede Ih ci Egypt ga hegwangpei peu nnuide tet kelak, pe kemei teigai kemaktane.✝ 20 Ih a ba ketwa pet luzie nah Ih penui kakga ge miswakegah tadung tei lai kebamde le Egyptme de ketang zie. Iciu kelu caine, pa nnuide püt beuzie. 21 Ih Egyptme de peu Israel mina aidungde de rütlu kera teibeu zie, iciu eh nnui ketet dau, nnui ba mta mrwa eh tetti lak. 22 Mipui leune pe kidabe Egyptme dade nah pe kidabe kiga lungh kebamme puidung keheibe dade kecak nah rangkanggeu nah paihenidung kie luzie. Cidungde nnui napuidung nah napeidung de peu teu zie. Ainzwa eh nnui Egyptme mabam sütteu dizie."