1 Pecai Moses Israelme tingbungme pelane de qu hekwalu delwe penui dage rangdi, "Aidungde RAMPAUBE nnuide tei kera aja kaigai da. 2 Lang herokne ge heta tei lubui, dede n ziemne, lang henane benai au kemci tingba ge zie, Sabbath tingba mtak ziune kecu, RAMPAUBE dwa gade mci. Cipau benai heta keheibe de tei kecume de teitset bi di kerabe. 3 Nnui nnui keheibe ki gade Sabbath benai mi mtau kerabe ma."

4 Moses Israel tingbungme pelane dage marang eh, ranggai, "Aide da RAMPAUBE aja kai kegai de. 5 RAMPAUBE ziemne reca ge keulu, keheibe de teigai beu keneume. RAMPAUBE ziemne makai keu gwanglu, kecak, rangkanggeu, hetageu, 6 kemhei, gieremang, nah mamai gie kecu nah linen pai keyibe; hemeu mai; 7 hemeuseu geudung swagie kelube nah teigeu keyibe; acacia tsing; 8 kerecaki mitaubungdung ziemne maca, keheniak ca nah perim kehengui ziemne mosala, 9 onyx tsudung nah tangtsu pemi kehungbe kedabedung de cingkupei hekeutupai nah hekakrakcum gage kai kerane.

10 Mata tei kecime nnui kakga kebam leune gwang eh RAMPAUBE aja kai kegai pelane de tei lu, 11 recapaiki pe paiki de si eh, hegwale cum, pe gwakdung, perakdung, langkapdung, hetsiadung, nah singkamdung; 12 samkakbung kepwa pakdung de si, pegum, nah cide lim kera kehezu pai. 13 Penui kekairak nah pe pakdung si eh keugwang, pe netdung pelane, nah Tinggwang de reca kebeu tangku; 14 kebaa ziemne mitaubam, nah pe netdung si eh, pe mitaubungdung, nah mitaubungdung ziemne maca; 15 mariem kehengui keru recabam nah pe pakdung, keheniak ca nah periem kehengui; reca paiki kimui ziemne kehezupai; 16 keru reca tei kera recabam, hetageu miheukwak nah pe pakdung nah pe tsiadung de; nah li kedige pesingkam de si eh. 17 Penui kigu ziemne kehezupaidung pwagwang pe tsiadung nah singkamdung de si, nah kigu kimui ziemne kehezupai; 18 nah recapaiki nah kigu ziemne pe gwakdung, pe riadung de si eh. 19 Penui pai dak hemi keludung peu kemci ni ga heta teikera ziemne keugwang, cingkupei Aaron nah pe napeimedung ziemne kemci paidung, penui cingku ta ketei dau teu kera."

20 Pecai Israel leuhme pelane Moses de gidi eh tetti. 21 Mina keheibe de cau pe mlung gade petlu dibi nah rabe gade pesui ludi bi gwang nah paiki de tei kerane RAMPAUBE dage hema teu gwangbeu, penui heta ketei ga teu maikesiabe leune, nah kemci paidung* ziemne. 22 Penui mlung neungga eh kebamme, mipei de nah mipui de gwanglu. Penui tei hezukeyi netdung, mlidung, bakapdung, nah heteidung, kecak le teikelu netdung ketsamtsam keugwang beu. Penui pelane kecak netdung reca teibeu RAMPAUBE dage reca mapeu nzwa eh. 23 Keheibe de kemhei, gieremang, mede mamai kegie, linen pai keyibe, hemeu mai, hemeuseu geudung swa gie kelube, mede teigeu keyibe bam kecume pelane aidungde keugwang beu. 24 Keheibe de rangkanggeu nah hetageu ge le reca tei kebamme cide RAMPAUBE dage reca teigai, nah keheibe de acacia tsing kebamme penui pelane matei kera gage cide keugwang beu. 25 Mipui helangpata tei kecime penui ba le tei keludung keugwang beu, kemhei, gieremang, mede mamai gie kecu, mede linen pai keyibe. 26 Mipuime pelane cauge pe lung gade petlu dibi nah hemeu mai langriadung tei kecime penui teibeu. 27 Muiteume cingkupei hekeutupai nah hekakrakcum gage kai kera onyx tsudung nah pemi kehung tsu kedadung ge de keugwang; 28 penui mitaubungdung ziemne, keheniak ca ziemne, nah perim kehengui ziemne mosala nah pe dui keugwang. 29 Israelme pelane RAMPAUBE dage suiyi makai keugwang beu; mipei nah mipui pelane pe mlung gade neungga eh pet kelume Moses de heta tei kera pelane RAMPAUBE aja kai kebeu ziemne henetdung keugwang beu.

30 Pecai Israelme dage Moses rangdi, "Pielo, RAMPAUBE Uri napei nah Hur capei Bezalel, Judah leuhme ge de pezi gade qulu. 31 Pa pe Rabe le Bezalel de kepui tei luda, maci, kecikecet, nah makeci, heciemta leune teilu kebui pecu peu, 32 marehi ketsamtsam riemlu kera nah kecak, rangkanggeu, nah hetageu tah teilu kera; 33 tangtsu pang nah kai kera nah tsingta tei kera, perehi ketsamtsam riemlu kera nah heciemta teilu kera. 34 RAMPAUBE pecu pe mlung gage nah Dan leuhme gade Ahisamak napei Oholiab penai de kedame de ledeulu kera peu dida. 35 Pa penai de heta leune teilu kera teikeci peu dida, heciemta keteime ge nzwa, keraume ge nzwa, kemhei, gieremang nah mamai gie kecu nah linen pai keyibe teu herui kecume nzwa, nah pai kedakme nzwa. Penui au heta leune gade heciemta tei kecime, nah penui au ma rehi ketsamtsam riem ci kecume.