1 Langcimpai keyi gade nah kemhei, gieremang, nah mamai kegie le tei kelu nah cherubim rehi de si kecu kehezupai kerei le nang recapaiki de teilu. Aide heciemta tei cisüt kecume bata ge zie. 2 Kehezupai ramsang pe tie cubit ngkaie-heset maisia, pe di cubit mdai. Kehezupai pelane nsam ciak maisia. 3 Kehezupai mengei ge herui ncütlu maisia, nah keda mengei de de herui ncütlu maisia. 4 Herui ncüt kelu keraibe kehezupai de tu pekung gage kemhei pai de le nang peri teilu maisia. Ci kesiakte eh, nang herui ncüt kelu pekenabe kehezupai de tu pekung gage cinzwa teilu maisia. 5 Nang kehezupai keraide ga peri riakngei ge teigailu maisia nah nang kehezupai pekenabe pekung gade peri riakngei ge teigailu maisia. Aide teilu iciu eh peridung de ketket de mcwa luzie. 6 Nang kecak gwak riakngei ge teilu maisia nah kehezupaidung de cide le teu ncütlu iciu eh recapaiki de teu ncütlu kerane.

7 Nang hemeumai le kehezupai teilu maisia recapaiki reu gum kerane. Nang kehezupai aide kereieket teilu maisia. 8 Kehezupai leune pe tie cubit camrei maisia, nah kehezupai leune pe di cubit mdai maisia. Kehezupai kereieket cidungde pe tie pe di nsamram kerabe. 9 Nang kehezupai mengei de herui ncütlu nah kehezupai keda herok de de herui ncütlu maisia. Nang kehezupai pe herok de paiki dwa gage hedip kena maisia. 10 Nang kehezupai de tu pekung keraide gage peri riakngei, nah pekenabe de herui ncüt kelu kehezupai de tu pekung gage de peri riakngei teilu maisia. 11 Nang hetageu gwak riakngei ge teilu maisia nah peri gage cidungde kailu. Pecai nang paiki teu ncütlu ciude cide ket teilu kerane. 12 Bang kezeu kehezupai pempie, cide, paiki kehezupai gade twampet eh nzu kenhungdung, recapaiki caile bie ge hezudi maisia. 13 Tu ge lam kehezupai cubit ket, nah keda lamde kehezupai cubit ket bam maisia, cide paiki kehezupai pe tie kebang be recapaiki mbie lule ailam gage teu hezulu maisia, cide gumlu kerane. 14 Nang recapaiki ziemne hemeuseu geu swa gie kelube gum ge teilu maisia, nah cipau reu gage keda gum dai kera teigeu keyibe le teilu.

15 Recapaiki ziemne acacia tsing le pwa radung ra mtipriplu. 16 Pe ra leune pe tie cubit kerei maisia, nah pe di cubit ket eh pempie maisia. 17 Pe ra leune ga pe radung keu ncüt kera tamtwak tie kena ge bam maisia. Aipau rehi gade nang recapaiki radung teilu maisia. 18 Recapaiki ziemne nang pe radung tei kecudau, tingbangle tu ziemne pe radung ngkai ge nang teilu maisia. 19 Cipau pe ra ngkai dung kangga lüt kera pe singkam rangkanggeu le riakdai ge teilu maisia. Pe ra keraibe kangga pe singkam kena ge bam maisia pe pi teilu kerane, nah pe ra kedadung kangga de pe singkam kenana ge teilu maisia pe pidung ziemne. 20 Recapaiki pe mbie pe kenabe ga, tingtünle ge, nang pe ra ngkai teilu maisia 21 nah rangkanggeu le tei kelu pe singkam riakdai teilu maisia. Pe ra keraibe kang ga pe singkam kena bam maisia, pe ra ciabe gade pe singkam kena, nah cinzwa eh tei mielu. 22 Recapaiki pe caile bie naimiak kenlütle tu, pe ra herok nang teilu maisia. 23 Recapaiki pecai kimiakdung ziemne nang pe ra kena teilu maisia. 24 Aipau pe radung de pe sing gade keu ntsamlu maisia, dede pe reu ga ringgoi ge ga mtoklu. Pe cai kimiak kena de ainzwa eh teilu maisia. 25 Pe ra heset ge bam maisia, pe singkam rangkanggeu le tei kelube de si eh. Pelane le singkam kereieherok bam maisia, pe ra keraibe ga singkam kena, pe caibe ra gade singkam kena, nah cinzwa eh tei mielu.

26 Acacia tsing le pwa nang langkaptiedung tei maisia, recapaiki tu ge lambie pe radung ziemne mengei ge, 27 recapaiki keda lam kebam pe radung ziemne langkap mengei ge, nah pe caile naimiak kenlütle lam kebam pe radung ziemne langkap mengei ge. 28 Pe radung sum ga kebam langkaptie, cide, nreule bie hang cang kemak sum ga, tu ge lam de tu ge lam pet cangsiak zie. 29 Nang pe radung de kecak le kezuilu maisia. Nang pe ringgoidung de kecak le teilu maisia, langkaptiedung gi ntip bamlu kerane, nah nang langkaptiedung de kecak le kezuilu maisia. 30 Nang recapaiki de ncu lamlwatu gade keulia kegai riem pwa kebam de nzui eh teilu maisia.

31 Langcimpai keyi nah kemhei, gieremang, nah mamai kegie le nang kehezupai teilu, cherubim rehi de teigai eh, heciemta tei cisüt kecume bata le. 32 Nang cide acacia tsing le tei kelu hetsia mdaidung kecak le kezui pwa kebamdung reu gage keu hezulu maisia. Aipau tsiadung ga kecak gwakdung bam bi maisia rangkanggeu singkam mdai gage mtoklu. 33 Nang kehezupai de pe gwakdung kang gage kailu maisia, nah nang samkakbung de pwa nlüt maisia. Kehezupai de ne kemci ni de nah mcitube ni de tei ntsam dizie. 34 Mcitube ni ga kebam samkakbung gage pe gum nang kailu maisia. 35 Kehezupai gwale bie ge mabam nang kailu maisia. Nang mitaubungbam de mabam de peu mcwalu recapaiki tingbangle tu lebie. Mabam de tingtünle bie bam maisia.*

36 Paiki kenlüt kimui ziemne kehezupai ge nang teilu maisia. Cide nang kemhei, gieremang nah gie kecudung le teilu nah langcimpai dak kelu gele teilu maisia, aide dak kecime ta. 37 Kehezupai ziemne, nang acacia tsing le tei kelu tsia mengei ge teilu maisia nah cidung de kecak le kezuilu. Pe gwakdung au kecak le teilu maisia, nah cidungde ziemne nang hetageu singkam mengei teilu maisia.